ទីក្រុងយេរូសាឡឹម៖ បន្ទាប់ពីទទួលរងការវាយប្រហារពីក្រុមហេសបូឡានៅប្រទេសលីបង់ថ្មីៗនេះ អ៊ីស្រាអែលបានចាត់វិធានការវាយបកវិញទៅលើរដ្ឋធានីបេរូតរបស់ប្រទេសនេះបណ្ដាលឱ្យស្លាប់មនុស្សជាង៣០នាក់។ ក្រុមហេសបូឡាអះអាងថាខ្លួនបានបើកការវាយប្រហារចូលអ៊ីស្រាអែលដោយប្រើប្រាស់រ៉ុកកែត និងដ្រូន។ គោលដៅធំរបស់ពួកគេគឺវាយប្រហារមូលដ្ឋានយោធាមួយកន្លែងនៅតំបន់ហាយហ្វា (Haifa) នៃប្រទេសអ៊ីស្រាអែលភាគខាងជើង។
ដូច្នេះសង្គ្រាមដែលមុនដំបូងកើតឡើងតទល់គ្នាតែរវាងអ៊ីរ៉ង់ទល់នឹងអ៊ីស្រាអែល និងអាមេរិកឥឡូវនេះបែកសាយាមោដល់ប្រទេសដទៃទៀតនៅក្នុងតំបន់។ ប្រទេសខ្លះអត់ដឹងរឿងអីសោះ ឬក៏ថាចង់បានត្រឹមតែមួយសុខខ្លួន ប៉ុន្តែត្រូវគេអូសចូលទៅក្នុងសង្គ្រាមនេះឱ្យទាល់តែបាន។ សូមជម្រាបថានៅប្រទេសលីបង់សព្វថ្ងៃនេះបែងចែកជារដ្ឋាភិបាលលីបង់ដែលមិនសូវមានកម្លាំងយោធារឹងមាំប៉ុន្មានទេ ហើយនិងក្រុមហេសបូឡាដែលមានកងទ័ពរាប់ម៉ឺននាក់ និងទទួលបានការឧបត្ថម្ភគាំទ្រទាំងអាវុធយុទ្ធភ័ណ្ឌ និងលុយកាក់ពីអ៊ីរ៉ង់។
គេអាចនិយាយម៉្យាងទៀតថាអ៊ីរ៉ង់ចិញ្ចឹមក្រុមហេសបូឡាទុកប្រឆាំងអ៊ីស្រាអែលក៏បានដែរ។ អ៊ីរ៉ង់មិនមែនគាំទ្រតែហេសបូឡាមួយទេ។ ចលនាណាក៏ដោយឱ្យតែប្រឆាំងអ៊ីស្រាអែល និងអាមេរិក អ៊ីរ៉ង់គាំទ្រទាំងអស់រួមទាំងក្រុមហាម៉ាស់នៅហ្កាហ្សា, ក្រុមហ៊ូទីនៅយេម៉ែន និងចលនាប្រដាប់អាវុធនៅស៊ីរី អ៊ីរ៉ាក់ និងប្រទេសដទៃទៀតនៃតំបន់មជ្ឈិមបូព៌ា។ ក្រុមហេសបូឡាប្រកាសថាមូលហេតុដែលពួកគេវាយប្រហារអ៊ីស្រាអែលដើម្បីសងសឹកឱ្យអតីតមេដឹកនាំកំពូលអ៊ីរ៉ង់ (អគ្គមគ្គុទ្ទេសក៍) លោកអាយ៉ាតូឡា អាលី ខាមេនីដែលស្លាប់កាលពីព្រឹកថ្ងៃសៅរ៍ដោយសារការវាយប្រហាររបស់អាមេរិក និងអ៊ីស្រាអែល។ ហេសបូឡាថាខ្លួនធ្វើបែបនេះដើម្បីការពារប្រទេសលីបង់ និងប្រជាជនលីបង់ទប់ទល់នឹងអំពើឈ្លានពានរបស់អ៊ីស្រាអែល។
ទីភ្នាក់ងារព័ត៌មានជាតិរបស់ប្រទេសលីបង់ផ្សាយថាមនុស្ស៣១នាក់បានស្លាប់ និង១៤៩នាក់រងរបួសដោយសារការវាយបករបស់អ៊ីស្រាអែល។ រដ្ឋមន្ត្រីការពារជាតិអ៊ីស្រាអែល លោកអ៊ីស្រាអែល ខាត (Israel Katz) ថ្លែងថាក្រុមហេសបូឡាត្រូវតែសងនូវតម្លៃដ៏ខ្ពស់មួយដែលពួកគេហ៊ានវាយប្រហារមកលើអ៊ីស្រាអែល។ លោកថ្លែងថាឥឡូវនេះ អ៊ីស្រាអែលដាក់ផែនការកម្ទេចមេចលនារបស់ហេសបូឡាឈ្មោះណាអ៊ីម កាសឹម (Naim Qassem)៕ ប្រភព៖ អាល់ចាស៊ីរ៉ា និងប្រភពដទៃទៀត
រដ្ឋមន្ត្រីការពារជាតិអ៊ីស្រាអែល
ចែករំលែកព័តមាននេះ