រាជធានីវៀងចន្ទន៍ ៖ ប្រទេសថៃ បានបញ្ជាឱ្យផ្អាកការនាំចេញប្រេងឥន្ធនៈជាបណ្តោះអាសន្ន បន្ទាប់ពីការបិទច្រកសមុទ្រហ័រមូសរបស់ប្រទេសអ៊ីរ៉ង់ ដែលបង្កការគំរាមកំហែងដោយផ្ទាល់ដល់ការផ្គត់ផ្គង់ប្រេងឥន្ធនៈរបស់ប្រទេសឡាវ ដោយសារតែការពឹងផ្អែកយ៉ាងខ្លាំងលើការនាំចូលថាមពលពីប្រទេសថៃ នេះបើយោងតាម Laotian Time…
រាជធានីវៀងចន្ទន៍ ៖ ប្រទេសថៃ បានបញ្ជាឱ្យផ្អាកការនាំចេញប្រេងឥន្ធនៈជាបណ្តោះអាសន្ន បន្ទាប់ពីការបិទច្រកសមុទ្រហ័រមូសរបស់ប្រទេសអ៊ីរ៉ង់ ដែលបង្កការគំរាមកំហែងដោយផ្ទាល់ដល់ការផ្គត់ផ្គង់ប្រេងឥន្ធនៈរបស់ប្រទេសឡាវ ដោយសារតែការពឹងផ្អែកយ៉ាងខ្លាំងលើការនាំចូលថាមពលពីប្រទេសថៃ នេះបើយោងតាម Laotian Time ចេញផ្សាយនៅរសៀលថ្ងៃទី០២ មីនា ២០២៦ ។
រដ្ឋមន្ត្រីក្រសួងថាមពលរបស់ប្រទេសថៃ លោក Auttapol Rerkpiboon បានប្រកាសពីវិធានការបន្ទាន់នេះ កាលពីថ្ងៃទី១ ខែមីនា ដោយលើកឡើងពីជម្លោះ ដែលកំពុងកើនឡើងនៅមជ្ឈិមបូព៌ា ជាកត្តាជំរុញឲ្យថៃផ្អាកការនាំចេញប្រេងឥន្ធនៈជាបណ្តោះអាសន្ន ។
រួមជាមួយនឹងការផ្អាកការនាំចេញនេះ រដ្ឋមន្ត្រីក្រសួងថាមពលថៃ បានបញ្ជាឱ្យបង្កើតមជ្ឈមណ្ឌលត្រួតពិនិត្យថាមពលបន្ទាន់ និងបានដឹកនាំភ្នាក់ងារពាក់ព័ន្ធទាំងអស់ឱ្យវាយតម្លៃផលប៉ះពាល់ និងរៀបចំផែនការបន្ទាន់ ដែលគ្របដណ្តប់ទាំងទុនបម្រុងប្រេងឥន្ធនៈ និងតម្លៃ ។
ការសម្រេចចិត្តផ្អាកការនាំចេញនេះ ត្រូវបានគេរំពឹងថា នឹងមានផលវិបាកធ្ងន់ធ្ងរសម្រាប់ប្រទេសឡាវ ។
ប្រទេសថៃ គឺជាដៃគូនាំចូលធំជាងគេរបស់ប្រទេសឡាវ ដោយប្រទេសឡាវ នាំចូលទំនិញជាង ៤.៤ពាន់លានដុល្លារពីប្រទេសថៃក្នុងឆ្នាំ២០២៥ ដែលមានចំនួន ៤៥.៧១ភាគរយនៃការនាំចូលសរុប នេះបើយោងតាមក្រសួងឧស្សាហកម្ម និងពាណិជ្ជកម្មរបស់ប្រទេសឡាវ។ ប្រេងម៉ាស៊ូតតែមួយមុខ គឺមានតម្លៃជាង ១ពាន់លានដុល្លារ ឬប្រហែលមួយភាគបួន នៃការនាំចូលទាំងអស់ពីប្រទេសថៃ ដែលធ្វើឱ្យវាក្លាយជាទំនិញនាំចូលធំបំផុត ។
កត្តាដែលនាំឲ្យប្រទេសថៃសម្រេចផ្អាកការនាំចេញប្រេង គឺការបិទច្រកសមុទ្រហ័រមូស ដែលជាផ្លូវទឹកតែមួយគត់ពីឈូងសមុទ្រពែរ្ស ទៅកាន់មហាសមុទ្របើកចំហ ដែលដឹកជញ្ជូនប្រេងប្រហែលមួយភាគប្រាំ នៃការផ្គត់ផ្គង់ប្រេងប្រចាំថ្ងៃរបស់ពិភពលោក ។
ការបិទច្រកសមុទ្រហ័រមូសនេះ បន្ទាប់ពីការកើនឡើងយ៉ាងខ្លាំងនៃជម្លោះនៅមជ្ឈិមបូព៌ា ក្រោយកងកម្លាំងអាមេរិក និងអ៊ីស្រាអែល បានបើកការវាយប្រហារលើទីក្រុងតេអេរ៉ង់ ដោយបានសម្លាប់មេដឹកនាំកំពូលរបស់អ៊ីរ៉ង់ លោក អាយ៉ាតូឡា អាលី ខាមេនី ។
អ៊ីរ៉ង់បានសងសឹកដោយមីស៊ីលផ្លោង និងការវាយប្រហារដោយយន្តហោះគ្មានមនុស្សបើក ដែលកំណត់គោលដៅទ្រព្យសម្បត្តិ និងសម្ព័ន្ធមិត្តរបស់សហរដ្ឋអាមេរិក នៅទូទាំងតំបន់មជ្ឈិមបូព៌ា ។
ការវាយប្រហារទាំងនេះ បានបង្ខំឱ្យក្រុមហ៊ុនដឹកជញ្ជូនប្រេងធំៗផ្អាក ឬប្តូរផ្លូវដឹកជញ្ជូនប្រេង ដែលជំរុញឱ្យតម្លៃប្រេងសកល កើនឡើងយ៉ាងខ្លាំង ។
ទោះបីជាមានការគំរាមកំហែងកាន់តែខ្លាំងឡើង ចំពោះសន្តិសុខថាមពលក៏ដោយ ក៏រដ្ឋាភិបាលឡាវ មិនទាន់បានចេញសេចក្តីថ្លែងការណ៍ផ្លូវការ ឬវិធានការឆ្លើយតបណាមួយនៅឡើយទេ។ តែទោះជាយ៉ាងណា នៅល្ងាចថ្ងៃទី០២ មីនានេះ ក្រសួងឧស្សាហកម្មឡាវ និយាយថា ការផ្គត់ផ្គង់ប្រេងឥន្ធនៈនៅតែធម្មតា និងគ្រប់គ្រាន់ ទោះបីជាមានភាពចលាចលនៅមជ្ឈិមបូព៌ាក៏ដោយ។ ប៉ុន្តែជំរុញឱ្យប្រើប្រាស់យានយន្ត ចាំបាច់តែប៉ុណ្ណោះ ៕
ចែករំលែកព័តមាននេះ