ខេត្តកំពត ៖ នេះជាការក្រើនរំលឹករបស់លោកអភិបាលខេត្តកំពត ដល់លោកអភិបាលក្រុងពីរដែលត្រូវផ្លាស់ប្តូរការដឹកនាំ គឺកំពត និងក្រុងបូកគោ ហើយក្រុងទាំងពីនេះ គឺជាបេះដូងរបស់ខេត្ត ពិសេសក្រុងកំពតផ្ទាល់តែម្តង ដែលទាមទាឲ្យអភិបាលក្រុងទាំងពីរបន្តការយកចិត្តទុកដាក់ខ្ពស់…
ខេត្តកំពត ៖ នេះជាការក្រើនរំលឹករបស់លោកអភិបាលខេត្តកំពត ដល់លោកអភិបាលក្រុងពីរដែលត្រូវផ្លាស់ប្តូរការដឹកនាំ គឺកំពត និងក្រុងបូកគោ ហើយក្រុងទាំងពីនេះ គឺជាបេះដូងរបស់ខេត្ត ពិសេសក្រុងកំពតផ្ទាល់តែម្តង ដែលទាមទាឲ្យអភិបាលក្រុងទាំងពីរបន្តការយកចិត្តទុកដាក់ខ្ពស់ ក្នុងការដឹកនាំរៀបចំ កែលម្អ និងអភិវឌ្ឍឲ្យកាន់តែស្អាតទាក់ទាញ ហើយធានាដល់ភាពសុខសាន្ត និងភាពកក់ក្តៅរបស់ប្រជាពលរដ្ឋ និងភ្ញៀវទេសចរដែលមកលេងកម្សាន្តក្នុងមួយនេះផងដែរ។
ថ្លែងនៅក្នុងពិធីប្រកាសផ្ទេរភារកិច្ច លោកអភិបាលក្រុងកំពតទៅជាអភិបាលក្រុងបូកគោ និងផ្ទេរលោកស្រីអភិបាលក្រុងបូកគោ មកជាអភិបាលក្រុងកំពត នៅព្រឹកថ្ងៃទី២ខែ មីនា ឆ្នាំ២០២៦ នៅសាលសន្និសីទបូកគោ ខេត្តកំពត លោក ម៉ៅ ធនិន អភិបាលខេត្តកំពត បានលើកឡើងថា ការផ្លាស់ប្តូរ និងផ្ទេរតំណែងពីកន្លែងមួយទៅកន្លែងមួយទៀត គឺជារឿងធម្មតាសម្រាប់ថ្នាក់ដឹកនាំ មន្ត្រីរាជការរបស់រដ្ឋ ដើម្បីដោះដូរនូវបទពិសោធន៍ និងរួមគ្នាបន្តការអភិវឌ្ឍន៍មូលដ្ឋានឲ្យកាន់តែល្អប្រសើរ។ យ៉ាងណាមិញ ការផ្ទេរភារកិច្ចរបស់លោកអភិបាលក្រុងកំពត និងលោកស្រីអភិបាលក្រុងបូកគោនាពេលនេះ ក៏ដូចគ្នាដែរ ដូច្នេះសូមលោក និងលោកស្រីអភិបាលក្រុងទាំងពីរ ចេះពិភាក្សា សួរនាំគ្នាទៅវិញទៅមក ចំពោះចំណុចណាមួយ ឬការងារណាមួយ ដែលសេសសល់ត្រូវធ្វើបន្ត ឲ្យបានច្បាស់លាស់ ។
លោកអភិបាលខេត្តបានបញ្ជាក់ថា: ខេត្តកំពតមានភូមិសាស្ត្រអំណោយផល ហើយមានក្រុងពីរដែលមានសក្តានុពលខ្លាំងដូចគ្នា ហើយលោកជឿជាក់ថា លោក និងលោកស្រីអភិបាលក្រុងទាំងពីរ នឹងបន្តខិតខំដឹកនាំ រៀបចំ និងអភិវឌ្ឍន៍ក្រុងឲ្យកាន់តែល្អប្រសើរថែមទៀត ដើម្បីផ្តល់ជូននូវភាពសុខសាន្ត និងកក់ក្តៅ ដល់ប្រជាពលរដ្ឋ និងភ្ញៀវទេសចរ ដែលមកលេង និងស្នាក់នៅក្រុងទាំងពីរ។ លោកអភិបាលខេត្ត បានលើកទឹកចិត្តឲ្យអភិបាលក្រុងទាំងពីរ ត្រូវធ្វើជាមេដឹកនាំគំរូ សម្រាប់មន្ត្រី និងប្រជាជន។
សូមបញ្ជាក់ថា លោកស្រី ងឹន ផលរ័ត្ន ជាអភិបាលក្រុងបូកគោដំបូងគេ បន្ទាប់ពីក្រុងនេះត្រូវបានបង្កើតកាលពីជាង៤ឆ្នាំមុន ខណៈដែលលោក លាង រឿនសុធី បានបម្រើការងារជាអភិបាលក្រុងកំពតគ្រប់ពីរអាណត្តិហើយ៕
ចែករំលែកព័តមាននេះ