ខេត្តស្ទឹងត្រែង ៖ អគារសាលាបឋមសិក្សា អ៊ីប៊ុ ក្នុងភូមិឧបសម្ព័ន្ធអ៊ីប៊ុ ឃុំអូរស្វាយ ខេត្តស្ទឹងត្រែង បានបង្ហាញនូវមុខមាត់ថ្មីស្រឡាង ត្រៀមខ្លួនជាស្រេចក្នុងការទទួលស្វាគមន៍សិស្សានុសិស្សសម្រាប់ឆ្នាំសិក្សាថ្មី ២០២៥-២០២៦…
ខេត្តស្ទឹងត្រែង ៖ អគារសាលាបឋមសិក្សា អ៊ីប៊ុ ក្នុងភូមិឧបសម្ព័ន្ធអ៊ីប៊ុ ឃុំអូរស្វាយ ខេត្តស្ទឹងត្រែង បានបង្ហាញនូវមុខមាត់ថ្មីស្រឡាង ត្រៀមខ្លួនជាស្រេចក្នុងការទទួលស្វាគមន៍សិស្សានុសិស្សសម្រាប់ឆ្នាំសិក្សាថ្មី ២០២៥-២០២៦ ។
ពន្លឺនៃក្តីសង្ឃឹម និងឱកាសសម្រាប់កុមារនៅតំបន់ដាច់ស្រយាល ក្រោមជំនួយដ៏ថ្លៃថ្លារបស់អង្គការសប្បុរសធម៌កម្ពុជាអន្តរជាតិ (Cambodian International Charity organization) អគារសិក្សាថ្មី ចំនួន ០១ខ្នង មាន ០៣បន្ទប់ បន្ទប់ទឹកថ្មី ចំនួន ០១ខ្នង មាន ០៦បន្ទប់ ។
សមិទ្ធផលថ្មីនេះ នឹងផ្តល់នូវបរិស្ថានសិក្សាប្រកបដោយផាសុកភាព សុវត្ថិភាព និងអនាម័យខ្ពស់ ជូនដល់កូនៗក្នុងសហគមន៍ ដើម្បីឲ្យពួកគាត់បានផ្តោតសំខាន់លើការសិក្សារបស់ពួកគេ ។
សាលាបឋមសិក្សាអ៊ីប៊ុ ស្ថិតនៅភូមិឧបសម្ព័ន្ធអ៊ីប៊ុ ឃុំអូរស្វាយ ដែលជាភូមិមួយ ដាច់ស្រយាលជាប់ដងទន្លេសេកុង ដែលមានចម្ងាយប្រមាណ ១៨គីឡូម៉ែត្រពីផ្លូវជាតិលេខ ៧ និងប្រហែល ៦០ គីឡូម៉ែត្រ ពីទីរួមស្រុក ។
ការខិតខំកសាងអគារសិក្សានៅទីនេះ គឺបានបង្ហាញពីការយកចិត្តទុកដាក់ខ្ពស់ចំពោះវិស័យអប់រំ និងកិច្ចខិតខំប្រឹងប្រែងរួមគ្នា ក្នុងការកាត់បន្ថយគម្លាតអប់រំរវាងតំបន់ទីក្រុង និងទីជនបទដាច់ស្រយាល ។
ការមានហេដ្ឋារចនាសម្ព័ន្ធអប់រំគ្រប់គ្រាន់ គឺជាកត្តាចម្បងមួយក្នុងការលើកកម្ពស់គុណភាពជីវិត និងការអភិវឌ្ឍធនធានមនុស្សសម្រាប់អនាគតប្រទេសជាតិ ។
ការចាប់ផ្តើមឆ្នាំសិក្សាថ្មីក្នុងអគារថ្មី គឺជាសក្ខីភាពនៃក្តីស្រឡាញ់ និងការលះបង់របស់អ្នកផ្តល់ជំនួយ ក៏ដូចជាការប្តេជ្ញាចិត្តរបស់អាជ្ញាធរ និងលោកគ្រូអ្នកគ្រូនៅក្នុងការជំរុញវិស័យអប់រំ ៕
ចែករំលែកព័តមាននេះ