តើអ្នកធ្លាប់មានអាការៈរមាស់ ឈឺចាប់ ឬមានសារធាតុរាវហូរចេញពីត្រចៀកដែរឬទេ? ការសម្គាល់រោគសញ្ញាទាំងនេះជារឿងសំខាន់ ព្រោះវាអាចជាសញ្ញានៃ ជំងឺផ្សិតរន្ធត្រចៀក ដែលជាការឆ្លងមេរោគផ្សិតនៅក្នុងរន្ធត្រចៀក។ យោងតាមការចុះផ្សាយរបស់មន្ទីរពេទ្យមិត្តភាពកម្ពុជា-ចិន ព្រះកុសុមៈ បានបង្ហាញពីរោគសញ្ញា…
តើអ្នកធ្លាប់មានអាការៈរមាស់ ឈឺចាប់ ឬមានសារធាតុរាវហូរចេញពីត្រចៀកដែរឬទេ? ការសម្គាល់រោគសញ្ញាទាំងនេះជារឿងសំខាន់ ព្រោះវាអាចជាសញ្ញានៃ ជំងឺផ្សិតរន្ធត្រចៀក ដែលជាការឆ្លងមេរោគផ្សិតនៅក្នុងរន្ធត្រចៀក។
យោងតាមការចុះផ្សាយរបស់មន្ទីរពេទ្យមិត្តភាពកម្ពុជា-ចិន ព្រះកុសុមៈ បានបង្ហាញពីរោគសញ្ញា និងក្រុមមនុស្សដែលងាយប្រឈមមុខនឹងបញ្ហាសុខភាពត្រចៀកនេះ៖
១. រោគសញ្ញា ៤ យ៉ាងនៃការឆ្លងផ្សិតក្នុងត្រចៀក
នៅពេលរន្ធត្រចៀកត្រូវបានវាយលុកដោយផ្សិត អ្នកជំងឺនឹងបង្ហាញសញ្ញាដូចតទៅ៖
ឈឺចាប់ និងរមាស់ក្នុងត្រចៀក: ជាអាការៈទូទៅបំផុត ដែលបង្កភាពមិនស្រួល។
មានសារធាតុរាវហូរចេញពីត្រចៀក: មានហូរចេញនូវទឹកឬសារធាតុរងៃពីរន្ធត្រចៀក។
អារម្មណ៍ហ៊ឹងណែនក្នុងត្រចៀក: មានអារម្មណ៍ថាត្រចៀកតឹង ឬណែន។
ការថយចុះ ឬបាត់បង់ការស្តាប់: សមត្ថភាពស្តាប់ចាប់ផ្តើមចុះខ្សោយ។
២. អ្នកដែលប្រឈមនឹងជំងឺផ្សិតត្រចៀកបំផុត
ជំងឺផ្សិតរន្ធត្រចៀកនេះងាយកើតឡើងចំពោះមនុស្សដែលមានលក្ខខណ្ឌសុខភាពជាក់លាក់ ឬបានប្រើប្រាស់ថ្នាំមួយចំនួន៖
អ្នកជំងឺទឹកនោមផ្អែម៖ ដោយសារមានកម្រិតជាតិស្ករខ្ពស់ ដែលជួយជំរុញការលូតលាស់របស់ផ្សិត។
អ្នកមានប្រព័ន្ធភាពស៊ាំខ្សោយ៖ រាងកាយមិនអាចទប់ទល់នឹងការវាយលុករបស់មេរោគនិងផ្សិតបានល្អ។
អ្នកប្រើប្រាស់ថ្នាំផ្សះ (អង់ទីប៊ីយោទិក) បន្តក់ត្រចៀករយៈពេលវែង: ការប្រើថ្នាំអង់ទីប៊ីយោទិកយូរពេក អាចសម្លាប់បាក់តេរីល្អក្នុងត្រចៀក ដែលធ្វើឲ្យផ្សិតលូតលាស់បានដោយងាយ។
ការដាស់តឿន: ប្រសិនបើលោកអ្នកជាក្រុមប្រឈមខាងលើ ហើយមានអាការៈទាំងនេះ សូមទៅជួបគ្រូពេទ្យឯកទេសត្រចៀកច្រមុះបំពង់កជាបន្ទាន់ ដើម្បីទទួលការពិនិត្យ និងព្យាបាលត្រឹមត្រូវ ជៀសវាងការបាត់បង់ការស្តាប់៕
ចែករំលែកព័តមាននេះ