ក្រុងហុងកុង ៖ ប៉ូលិសក្រុងហុងកុងកាលពីថ្ងៃទី១ធ្នូ បានបាញ់ឧស្ម័នបង្ហូរទឹកភ្នែកនិងឧស្ម័នម្រេច ខណៈបាតុករស្និទ្ធប្រជាធិបតេយ្យច្រើនពាន់នាក់ បានវិលត្រឡប់ជាថ្មីមកកាន់ដងវិថីនានា ក្រោយស្ងប់ស្ងាត់១សប្ដាហ៍ បន្ទាប់ពីជោគជ័យរបស់ពួកគេក្នុងការបោះឆ្នោតមូលដ្ឋានមក។ បាតុកម្មថ្ងៃទី១ធ្នូហាក់ជាការសាកល្បងនិងជាការស្ទង់មើលគ្នា សម្រាប់អាជ្ញាធរនិងពួកបាតុករ…
ក្រុងហុងកុង ៖ ប៉ូលិសក្រុងហុងកុងកាលពីថ្ងៃទី១ធ្នូ បានបាញ់ឧស្ម័នបង្ហូរទឹកភ្នែកនិងឧស្ម័នម្រេច ខណៈបាតុករស្និទ្ធប្រជាធិបតេយ្យច្រើនពាន់នាក់ បានវិលត្រឡប់ជាថ្មីមកកាន់ដងវិថីនានា ក្រោយស្ងប់ស្ងាត់១សប្ដាហ៍ បន្ទាប់ពីជោគជ័យរបស់ពួកគេក្នុងការបោះឆ្នោតមូលដ្ឋានមក។
បាតុកម្មថ្ងៃទី១ធ្នូហាក់ជាការសាកល្បងនិងជាការស្ទង់មើលគ្នា សម្រាប់អាជ្ញាធរនិងពួកបាតុករ ក្រោយការបោះឆ្នោតមូលដ្ឋានកំណត់ពីជោគជ័យដ៏ធំធេងរបស់ក្រុមស្និទ្ធប្រជាធិបតេយ្យ ខណៈក្រុងប៉េកាំងនិងរដ្ឋាភិបាលហុងកុងបដិសេធរាល់សម្បទានថ្មី។
ប៉ុន្តែក្នុងបាតុកម្មថ្មីមានការវិលត្រឡប់ នៃការប៉ះទង្គិចគ្នាដោយហិង្សា រវាងបាតុករមួយចំនួននិងប៉ូលិស ដែលបាញ់ឧស្ម័នបង្ហូរទឹកភ្នែកលើបាតុករ។ បាតុកម្មហុងកុងនាថ្ងៃទី១ធ្នូ មានការប្រមូលផ្ដុំគ្នា៣ទទួលការអនុញ្ញាតពីអាជ្ញាធរ ដោយប្ដេជ្ញាដាក់ការកៀបសង្កត់ លើអាជ្ញាធរហុងកុងដើម្បីឲ្យព្រមធ្វើតាមការទាមទាររបស់ពួកគេ។ ពួកបាតុករនិយាយថារដ្ឋាភិបាលនៅតែពុំមានចេតនាស្ដាប់យើងដូច្នេះបាតុកម្មនឹងនៅបន្តហើយនឹងមិនបញ្ឈប់ឡើយ។
នាព្រឹកថ្ងៃទី១ធ្នូបណ្ដាកុមារនិងមនុស្សចាស់ បានចូលរួមក្នុងបាតុកម្មដោយសន្តិវិធីមួយ ដែលប្រព្រឹត្តទៅដោយពុំមានឧប្បត្តិហេតុ។ នាវេលារសៀលបាតុកម្មពុំសូវធំមួយ កើតមាននៅមុខស្ថានកុងស៊ុលអាមេរិក ដើម្បីថ្លែងអំណរគុណដល់ក្រុងវ៉ាសិុនតោន ដែលគាំទ្រចលនាតវ៉ារបស់ពួកគេ៕ (កែសម្រួលដោយ ៖ បុប្ផា)
ចែករំលែកព័តមាននេះ