ទីក្រុងម៉ូស្គូ៖ អាជ្ញាធររុស្ស៊ីនៅរដ្ឋធានីនៃតំបន់ដាហ្គេស្ថាន (Dagestan) ប្រកាសដាក់តំបន់នោះនៅក្នុងស្ថានភាពអាសន្នបន្ទាប់ពីមានភ្លៀងធ្លាក់ខ្លាំងធ្វើឱ្យមានគ្រោះទឹកជំនន់ និងដាច់ភ្លើងអគ្គិសនី។ ទីភ្នាក់ងារសង្គ្រោះត្រូវស្ថិតនៅក្នុងការប្រុងជើងការកម្រិតខ្ពស់។ ពួកគេក៏កំពុងខិតខំប្រឹងប្រែងដើម្បីដោះស្រាយបញ្ហានៅចំពោះមុខផងដែរ។ អាជ្ញាធរនឹងជួយដោះស្រាយទុក្ខលំបាករបស់ប្រជាជនដែលរស់នៅក្នុងតំបន់រងគ្រោះ។
សម្រាប់ពេលនេះ ប្រជាជនជាង៣សែននាក់នៅតែគ្មានភ្លើងអគ្គិសនីប្រើប្រាស់ដដែលនៅតំបន់ដាហ្គេស្ថានដោយសារអាកាសធាតុមិនល្អ។ នេះបើយោងតាមការប្រកាសរបស់ការិយាល័យសង្គ្រោះនៃតំបន់ខាងលើ។ គិតត្រឹមម៉ោង១២ ទីតាំង២៨៣កន្លែងដែលមានប្រជាជនរស់នៅសរុបជាង៣សែននាក់នៅតែគ្មានភ្លើងអគ្គិសនីប្រើប្រាស់នៅឡើយទេ។ ក្នុងនោះ ជាង៨ម៉ឺននាក់ជាកុមារ។
អភិបាលតំបន់នេះគឺលោកសឺហ្គេ មេលីកូស (Sergei Melikov) ថ្លែងថាសេវាជួយសង្គ្រោះ និងមន្ត្រីរដ្ឋាភិបាលកំពុងត្រៀមលក្ខណៈសម្បត្តិទុកឱ្យហើយដើម្បីឆ្លើយតបទៅនឹងសេណារីយោដែលកាន់តែអាក្រក់ជាងនេះ។ គេបានគន់គូរអំពីសេណារីយោដ៏អាក្រក់បំផុតដែលអាចនឹងកើតមានឡើង។ ប៉ុន្តែស្ថានការណ៍ជាក់ស្ដែងវាកាន់អាក្រក់ជាងការគិតនោះទៅទៀត។
មន្ត្រីមូលដ្ឋាននៅទីក្រុងខាសាយើត (Khasavyurt) ដែលជាទីក្រុងធំលំដាប់ទី២របស់តំបន់ដាហ្គេស្ថានថ្លែងថាស្ពានសម្រាប់រថភ្លើងឆ្លងកាត់មួយខ្សែបានរងការខូចខាតដោយសារភ្លៀងធ្លាក់ខ្លាំង។ ស្ពាននេះ២កន្លែងបានបាក់។ នេះបើយោងតាមការបង្ហើបឱ្យដឹងពីអភិបាលនៃគណៈអភិបាលតំបន់ដាហ្គេស្ថាន។ គេព្យាករថាភ្លៀងនឹងបន្តធ្លាក់ខ្លាំងរហូតដល់ថ្ងៃអាទិត្យ៕ ប្រភព៖ រ៉យទ័រ (Reuters) និងប្រភពដទៃទៀត
ចែករំលែកព័តមាននេះ