ប្រទេសកួរ៉េខាងជើង ៖ ប្រទេសកូរ៉េខាងជើងកាលពីថ្ងៃទី២៨វិច្ឆិកា បានបាញ់សាកប្រកបដោយជោគជ័យរ៉ុក្កែតចម្រុះធុនធ្ងន់បំផុត។ មេដឹកនាំប្រទេសនេះលោកគីមជុងអ៊ុនបានសម្ឌែងការពេញចិត្តចំពោះលទ្ធផលនៃការសាកល្បងនោះ។
កងទ័ពកូរ៉េខាងត្បូងបានប្រកាសពីការបាញ់សាកល្បង មីស៊ីលមិនដឹងអត្តសញ្ញាណ២គ្រាប់ របស់ក្រុងព្យុងយ៉ាង ចេញពីខេត្តមួយនាភាគខាងកើតប្រទេស។ កងទ័ពនេះសង្ស័យថា នោះជាការសាកល្បងថ្មីនៃរ៉ុក្កែតចម្រុះធុនធ្ងន់ដែលកូរ៉េខាងជើងធ្លាប់បាញ់សាក៣លើករួចមកហើយ។ កងទ័ពនេះនិយាយថាគ្រាប់មីស៊ីលទាំង២គ្រាប់នោះបាញ់ចេញទៅកាន់សមុទ្រ។
នៅជប៉ុនកងឆ្មាំឆ្នេរសមុទ្រអះអាងពីការចាប់ឃើញ នូវអ្វីដែលហាក់ដូចជាគ្រាប់មីស៊ីលដែលបាញ់ចេញ។ ក្រសួងការពារប្រទេសជប៉ុនបញ្ជាក់ថា មីសីុលទាំង២គ្រាប់ពុំបានហោះចូលក្នុងដែនអាកាសជប៉ុនឬក៏ចូលក្នុងតំបន់សេដ្ឋកិច្ចក្នុងសមុទ្រផ្ដាច់មុខរបស់ខ្លួនឡើយ។
លោកគីមជុងអ៊ុនដែលបានជួប៣លើកជាមួយប្រធានាធិបតីអាមេរិក លោកដូណាល់ត្រាំ ចាប់តាំងពីខែមិថុនាឆ្នាំ២០១៨មក បានកំណត់កាលបរិច្ឆេទត្រឹមដំណាច់ឆ្នាំនេះ សម្រាប់ការចរចាជាមួយក្រុងវ៉ាស៊ិនតោនស្ដីពីការរំសាយនុយក្លេអ៊ែរនៅឧបទ្វីបកូរ៉េ។ ប៉ុន្តែការចរចាត្រូវជាប់គាំង ចាប់តាំងពីបរាជ័យនៃការជួបគ្នា កាលពីថ្ងៃទី៥តុលានៅប្រទេសស៊ុយអែតមក៕ (កែសម្រួលដោយ ៖ បុប្ផា)
ចែករំលែកព័តមាននេះ