មិនមានអាជីវកររូបណាដែលមិនជួបបញ្ហា ឬឧបសគ្គស្មុគស្មាញផ្សេងៗទេ ។ ហើយភាពស្មុគស្មាញទាំងនេះអាចបង្កការប៉ះពាល់ដល់អាជីវករយ៉ាងខ្លាំង ប្រសិនបើមិនមានការប្រុងប្រយ័ត្នព្រោះតែភាពមិនប្រាកដប្រជានៃការចាប់ផ្តើម និងគ្រប់គ្រងអាជីវកម្ម ។ ដូច្នេះតើអាជីវករគួរឆ្លើយតបយ៉ាងដូចម្តេចទៅនឹងពិភពលោកដ៏មិនប្រាកដប្រជាមួយនេះ និងកាត់បន្ថយភាពស្មុគស្មាញក្នុងជីវិត?ខាងក្រោមនេះគឺជាគោលការណ៍មួយចំនួនអ្នកជំនាញផ្តល់យោបល់ឲ្យអាជីវករ ឬសហគ្រិនប្រកាន់ខ្ជាប់៖
១. ឱកាស និងក្តីស្រម៉ៃ៖
ក្នុងនាមជាអាជីវករ អ្នកប្រហែលជាពូកែមើលឃើញឱកាសដើម្បីវិនិយោគ ឬរកលុយ ប៉ុន្តែមិនមែនមានន័យថាអ្នកត្រូវតែចាប់យកគ្រប់ឱកាសដែលមើលឃើញទេ ។ ប្រសិនបើអ្នកចង់ទទួលបានភាពជោគជ័យពិតមែន អ្នកត្រូវរៀនចេះមើលរំលងជម្រើសដែលមានភាពទាក់ទាញ កាត់ផ្តាច់ទំនាក់ទំនងជាមួយមនុស្សមួយចំនួន និងផ្តោតស្មារតីទៅលើឱកាសមួយដែលអ្នកខុសចិត្តប្តូរជីវិតដើម្បីសម្រេចជាដើម ។
វាប្រៀបបានជាការផ្លាស់ប្តូរដែលអ្នកចង់មើលឃើញក្នុងពិភពលោក និងជីវិតរបស់អ្នក ។ វាមានទំនាក់ទំនងជាមួយនឹងបទពិសោធន៍ដែលអ្នកឆ្លងកាត់ និងត្រូវការទេពកោសល្យរបស់អ្នកទើបអាចកើតមានឡើង ។ ពេលដែលអ្នករកឃើញវាហើយ អ្នកត្រូវតែព្យាយាមរកវិធីដើម្បីធ្វើឲ្យអាជីវកម្មរបស់អ្នកទាក់ទិននឹងវាដើម្បីអាចបង្កើតការផ្លាស់ប្តូរដែលអ្នកចង់មើលឃើញនោះ ។
២. ផ្តោតស្មារតីលើចំណូលបច្ចុប្បន្ន៖
អាជីវករជាច្រើនជាប់ក្នុងអន្ទាក់មើលទៅថ្ងៃមុខ ដែលធ្វើឲ្យពួកគេមើលរំលងឱកាសរកលុយក្នុងពេលបច្ចុប្បន្ន តែគិតតែឱកាសដែលរកលុយនៅថ្ងៃមុខទៅវិញ ។ គោលដៅរយៈពេលវែងមិនអាក្រក់ទាំងស្រុងទេ ប៉ុន្តែអ្នកត្រូវចងចាំថាដើម្បីទៅដល់គោលដៅនោះ អ្នកត្រូវព្យាយាមរកចំណូលក្នុងពេលនេះជាមុនសិន ។
ដូច្នេះប្រសិនបើអ្នកមិនទាន់មានសមត្ថភាពគ្រប់គ្រាន់ដើម្បីសម្រេចគោលដៅធំទេ វាមិនមែនជាបញ្ហាឡើយក្នុងការយកពេលវេលាទៅប្តូរយកលុយជាមុនសិន ។ អ្វីដែលសំខាន់គឺបច្ចុប្បន្ននេះអ្នកមានចំណូលជាប់លាប់ ។
៣. ខួរក្បាលអ្នកប្រៀបបានជាម៉ាស៊ីនសម្រាប់ការសម្រេចគោលដៅ៖
៩០% នៃភាពជោគជ័យគឺអាស្រ័យលើទស្សនៈរបស់មនុស្ស ។ អ្វីដែលអ្នកគិតប្រៀបបានជាសន្មតិកម្មដែលអ្នកចង់បង្ហាញថាពិត ។ ប្រសិនបើអ្នកគិតថាអ្នកមិនល្អគ្រប់គ្រាន់ទេនោះ អ្នកនឹងមើលឃើញតែភស្តុតាងដែលបញ្ជាក់ថាអ្នកមិនល្អគ្រប់គ្រាន់ប៉ុណ្ណោះ និងមើលរំលងភស្តុតាងដទៃដែលបង្ហាញថាអ្នកជាមនុស្សពូកែមានសមត្ថភាព ។ ខួរក្បាលរបស់អ្នកគឺជាម៉ាស៊ីនសម្រាប់សម្រេចគោលដៅ តែវាមិនអាចធ្វើដូច្នេះបានទេប្រសិនបើអ្នកមិនលុបបំបាត់នូវទស្សនៈអវិជ្ជមានដែលអ្នកគិតឃើញ ៕ កែសម្រួលដោយ ៖ សុឃាក់
ចែករំលែកព័តមាននេះ