ខេត្តសៀមរាប ៖ ផ្លូវចំនួន០៥ខ្សែ មានប្រវៃង៣ពាន់៩៩០ម៉ែត្រ និងដាក់លូមូល លូប្រអប់តាមបណ្តោយផ្លូវទាំង៥ខ្សែ ត្រូវបានបើកការដ្ឋានសាងសង់ផ្លូវចាក់បេតុងកាលពីចុងសប្តាហ៍ថ្ងៃ សៅរិ៍ ទី២៣ ខែវិច្ឆិកានេះ ក្រោមវត្តមានរបស់លោក ពិន ប្រាកដ អភិបាលរងនៃគណៈអភិបាលខេត្តសៀមរាប ស្ថិតនៅដងផ្លូវតាអុច ក្នុងភូមិតាវៀន សង្កាត់សាលាកំរើក ក្រុង-ខេត្តសៀមរាប ។
ដោយមានការចូលរួមរបស់នាយករដ្ឋបាលទីចាត់ការអង្គភាពចំណុះសាលាខេត្តមន្ទីរ អង្គភាពជុំវិញខេត្ត អាជ្ញាធរមូលដ្ឋាន និងប្រជាពលរដ្ឋរស់នៅអមសងខាងផ្លូវផងដែរ ។ ការស្ថាបនាផ្លូវបេតុងទាំង០៥ខ្សែជូនបងប្អូនប្រជាពលរដ្ឋទាំងសងខាងផ្លូវនេះ ធ្វើឡើងដោយកងវិស្វកម្មសម្តេចតេជោ ហ៊ុន សែន នៅខេត្តសៀមរាប ។
តាមការបញ្ជាក់របស់លោក សុខ ថុល នាយករដ្ឋបាលសាលាខេត្តបានឲ្យដឹងថា ក្នុងឆ្នាំ២០១៩នេះរដ្ឋបាលខេត្តបានលើគម្រោងថវិកាសាងសង់ផ្លូវចំនួន១៧គម្រោង ក្នុងក្រុងសៀមរាប ហើយផ្លូវទាំង៥ខ្សែនេះ គឺស្ថិតក្នុងចំណោមផ្លូវនៃគម្រោងទាំង១៧ខ្សែនេះផងដែរ ។
ការបើកការដ្ឋានសាងសង់ផ្លូវបេតុងចំនួន៥ខ្សែ ប្រវែង៣៩៩០ម៉ែត្រ នាពេលនេះរួមមាន ទី១-សាងសង់ផ្លូវបេតុង និងដាក់លូបណ្តោយផ្លូវមុខ១ម៉ែត្រ នៅភូមិតាវៀន ពីក្រោយផ្សារលើកាត់ផ្ទះតាអុច ដល់ផ្លូវវាងក្រុង ប្រវែង១ពាន់២៥៩ ម៉ែត្រ ,ទី២-សាងសង់ផ្លូវបេតុង និងដាក់លូប្រអប់បណ្តោយផ្លូវ៣,៥ម៉ែត្រ នៅភូមិតាវៀនពីផ្លូ ៧មករា ចំណុចហាងលក់គ្រឿងសំណង់ លី ហាំងសេង ដល់ផ្លូវអតីត គ្លីនិកពេទ្យនាគទេព ប្រវែង៧៩០ម៉ែត្រ , ទី៣- សាងសង់ផ្លូវបេតុង និងដាក់លូបណ្តោយផ្លូវមុខ១ម៉ែត្រ នៅភូមិចុងកៅស៊ូពីផ្លូវជាតិលេខ៦ ចំណុចភ្លើងស្តុបស្មាញលីង ដល់ផ្លូវផ្ទះតាអុច មានប្រវែង៣៣៥ម៉ែត្រ , ទី៤-សាងសង់ផ្លូវបេតុង និងដាក់លូបណ្តោយផ្លូវ ០,៨ម៉ែត្រ នៅភូមិតាវៀនពីផ្លូវក្រោយផ្សារលើដល់ផ្លូវវាងក្រុង ចំណុចតារាងបាល់ជន្លង់ ប្រវែង ៧៣០ម៉ែត្រ និងទី៥- សាងសង់ផ្លូវបេតុង និងដាក់លូបណ្តោយផ្លូវមុខ០,៨ម៉ែត្រ នៅភូមិតាវៀន ពីភោជនីយ ដ្ឋានស្វាយមាស ដល់ផ្លូវវាងក្រុងប្រវែង៨៨៥ម៉ែត្រ ។
លោកបានបញ្ជាក់ថា រដ្ឋបាលខេត្តបានជម្រុញឲ្យរៀបចំបណ្តាញលូប្រឡាយឲ្យបានរួចរាល់មុនពេលដំណើរការសាងសង់ផ្លូវព្រមទាំងការរៀបចំបណ្តាញក្រោមដីនានាផងដែរ ។ក្នុងដំណើរសំណេះសំណាលជាមួយបងប្អូនប្រជាពលរដ្ឋ ដែលមានលំនៅដ្ឋានអមតាមដងផ្លូវទាំង០៥ខ្សែនោះ លោក ពិន ប្រាកដ អភិបាលរងខេត្ត ក៏បានសុំការអធ្យាស្រ័យពីបងប្អូននូវរាល់ផលប៉ះពាល់ ព្រមទាំងបានសំណូមពរដល់បងប្អូនឲ្យមាន ការចូលរួមជាមួយអាជ្ញាធរ ក្នុងការរៀបចំសណ្តាប់ធ្នាប់តាមបណ្តោយផ្លូវទាំងអស់ និងចូលរួមក្នុងការរៀបចំប្រព័ន្ធលូ តាម មុខផ្ទះរបស់បងប្អូន ។
ក្នុងនោះដែរលោកអភិបាលរងខេត្តក៏បានសំណូមពរដល់បណ្តាមន្ទីរអង្គភាព និងក្រុមហ៊ុន ដែលមានការពាក់ព័ន្ធក្នុងការជីកបង្កប់ប្រព័ន្ធបណ្តាញក្រោមដីត្រូវមកធ្វើការទំនាក់ទំនងជាមួយកងវិស្វកម្មដែលកំពុងធ្វើការស្ថាបនាផ្លូវទាំងនេះដោយបច្ចុប្បន្នបានកំពុងធ្វើការដាក់លូកាត់ផ្លូវតែនៅពេលដែលការស្ថាបនាផ្លូវបានបញ្ចប់រួចរាល់ ហើយនោះអាជ្ញាធរខេត្ត គឺមិនអនុញ្ញាតឲ្យធ្វើការជីកកកាយកប់បណ្តាញទាំងនោះឡើយដែលធ្វើឲ្យបាត់បង់គុណភាពផ្លូវ ព្រមទាំងងាយទទួលរងការខូចខាតទៀតផង ។
លោកអភិបាលរងខេត្តក៏បានសំណូមពរដល់ប្រជាពលរដ្ឋទាំងអស់ដែលទទួលផលប្រយោជន៍ពីបណ្តាញផ្លូវទាំង៥ខ្សែនេះសុំឲ្យចូលរួមក្នុងការថែរក្សាការពារឲ្យផ្លូវនេះប្រើប្រាស់បានយូរអង្វែង និងសូមបងប្អូនសាធារណជនសំខាន់បងប្អូនរស់នៅតាមដងផ្លូវ ដែលដំណើរការសាងសង់ មេត្តាយោគយល់អំឡុងពេលដំណើរការសាងសង់ដែលអាចបង្កការលំបាកក្នុងការធ្វើ ដំណើរ ការកកស្ទះចរាចរ និងផលប៉ះពាល់បរិស្ថានផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ