រាជធានីភ្នំពេញ ៖ ថ្លែងជាវាគ្មិនក្នុងកិច្ចពិភាក្សាពិសេសស្តីពី “ការធ្វើអន្តរកាលកម្លាំងពលកម្មកម្ពុជាទៅរកសេដ្ឋកិច្ចឌីជីថល និងសេដ្ឋកិច្ចចក្រា” នៃសន្និសីទថ្នាក់ជាតិលើកទី ២ ស្ដីពីសេដ្ឋកិច្ចការងារ ឆ្នាំ២០២៥ នៅព្រឹកថ្ងៃចន្ទ…
រាជធានីភ្នំពេញ ៖ ថ្លែងជាវាគ្មិនក្នុងកិច្ចពិភាក្សាពិសេសស្តីពី “ការធ្វើអន្តរកាលកម្លាំងពលកម្មកម្ពុជាទៅរកសេដ្ឋកិច្ចឌីជីថល និងសេដ្ឋកិច្ចចក្រា” នៃសន្និសីទថ្នាក់ជាតិលើកទី ២ ស្ដីពីសេដ្ឋកិច្ចការងារ ឆ្នាំ២០២៥ នៅព្រឹកថ្ងៃចន្ទ ទី ១៥ ខែធ្នូ ឆ្នាំ ២០២៥ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ការធ្វើអន្តរកាលកម្លាំងពលកម្មកម្ពុជាទៅរកសេដ្ឋកិច្ចឌីជីថល និងសេដ្ឋកិច្ចចក្រា គឺជាការផ្លាស់ប្តូរ និងការអភិវឌ្ឍជំនាញ ការងារ និងរៀបចំរចនាសម្ព័ន្ធកម្លាំងពលកម្ម ដើម្បីឆ្លើយតបទៅនឹងបម្រែបម្រួលនៃរចនាសម្ព័ន្ធសេដ្ឋកិច្ចសម័យថ្មី ដែលផ្អែកលើបច្ចេកវិទ្យាឌីជីថល និងការប្រើប្រាស់ធនធានប្រកបដោយចីរភាព ។
ឯកឧត្តមរដ្ឋមន្ត្រី ក៏បានបញ្ជាក់ផងដែរអំពីសារសំខាន់នៃកម្លាំងពលកម្ម ដែលមានជំនាញខ្ពស់ ក្នុងការបង្កើនឱកាសការងារ និងចំណូលប្រកបដោយចីរភាព ការកាត់បន្ថយផលប៉ះពាល់បរិស្ថាន និងឆ្លើយតបទៅនឹងបម្រែបម្រួលអាកាសធាតុ សំដៅសម្រេចបាននូវចក្ខុវិស័យកម្ពុជាឆ្នាំ២០៥០។
ឯកឧត្តមរដ្ឋមន្ត្រី ក៏បានគូសបញ្ជាក់ផងដែរថា ក្រសួងការងារ និងបណ្ដុះបណ្ដាលវិជ្ជាជីវៈ និងក្រសួងអប់រំ យុវជន និងកីឡា បាននិងកំពុងសហការយ៉ាងជិតស្និទ្ធក្នុងការរៀបចំគន្លងអប់រំនៅកម្ពុជា ដែលនឹងប្រកាសដាក់ឱ្យអនុវត្តនាពេលឆាប់ៗនេះ ហើយគន្លងអប់រំថ្មីនេះនឹងផ្តល់នូវច្រកសិក្សាប្រកបដោយភាពបត់បែន ដោយបញ្ចូលនូវគន្លងវិជ្ជាជីវៈនៅកម្រិតមធ្យមសិក្សាទុតិយភូមិ ដើម្បីបើកច្រក និងផ្ដល់ជម្រើសកាន់តែប្រសើរសម្រាប់សិស្សានុសិស្ស ក្នុងការចាប់យកការសិក្សាជំនាញវិជ្ជាជីវៈ ទៅតាមចំណង់ចំណូលចិត្ត សំដៅឆ្លើយតបនឹងបម្រែបម្រួលរចនាសម្ព័ន្ធសេដ្ឋកិច្ចកម្ពុជាសម័យថ្មី កាត់បន្ថយអត្រាសិស្សបោះបង់ការសិក្សា ជាពិសេស បង្កើនអត្រាសិស្សចាប់យកជំនាញបច្ចេកទេស និងវិជ្ជាជីវៈ ដែលចាំបាច់សម្រាប់ទីផ្សារការងារ និងសក្តានុពលសេដ្ឋកិច្ចនៅតាមមូលដ្ឋាន។
សន្និសីទថ្នាក់ជាតិលើកទី២នេះ ត្រូវបានរៀបចំឡើងដើម្បីបើកលំហរជាវេទិកាសម្រាប់ជំរុញកិច្ចសហការ និងការផ្លាស់ប្តូរចំណេះដឹង តាមរយៈការចែករំលែកលទ្ធផលនៃការសិក្សាស្រាវជ្រាវ និងនវានុវត្តន៍ថ្មីៗ។ សន្និសីទនេះក៏ផ្តល់ឱកាសក្នុងការស្វែងយល់ស៊ីជម្រៅអំពីបញ្ហាប្រឈម និងដំណោះស្រាយជាយុទ្ធសាស្ត្រក្នុងទីផ្សារការងារនៅកម្ពុជា សំដៅដល់ការតម្រង់ទិសទស្សនវិស័យការងាររបស់កម្ពុជានាពេលអនាគត ឱ្យមានសង្គតិភាពនឹងការវិវត្តនៃសេដ្ឋកិច្ចសង្គម និងជាការចូលរួមចំណែកកសាងមូលដ្ឋានគ្រឹះដ៏រឹងមាំ ឆ្ពោះទៅសម្រេចបាននូវចក្ខុវិស័យកម្ពុជាឆ្នាំ២០៥០៕ អត្ថបទសហការ
ចែករំលែកព័តមាននេះ