រាជធានីភ្នំពេញ ៖ ថៃកំពុងធ្វើសង្គ្រាមពីរមកលើកម្ពុជា គឺទី១.សង្គ្រាមប្រដាប់អាវុធ និងទី២. សង្គ្រាមចិត្តសាស្ត្រ ដែលមានគោលដៅបំបាក់ស្មារតី និងញុះញង់ ដើម្បីបំបែកសាមគ្គីភាពរវាងពលរដ្ឋខ្មែរ និងថ្នាក់ដឹកនាំ…
រាជធានីភ្នំពេញ ៖ ថៃកំពុងធ្វើសង្គ្រាមពីរមកលើកម្ពុជា គឺទី១.សង្គ្រាមប្រដាប់អាវុធ និងទី២. សង្គ្រាមចិត្តសាស្ត្រ ដែលមានគោលដៅបំបាក់ស្មារតី និងញុះញង់ ដើម្បីបំបែកសាមគ្គីភាពរវាងពលរដ្ឋខ្មែរ និងថ្នាក់ដឹកនាំ ហើយតួយ៉ាងថៃ បានបង្កើតគណនីបណ្ដាញសង្គមក្លែងក្លាយ ដាក់ឈ្មោះខ្មែរចែករំលែកព័ត៌មាន តែបម្រើឱ្យប្រយោជន៍ថៃ ការបង្ហោះរូប ឬព័ត៌មានប្រឌិតថា កម្ពុជាចាញ់ ឬបាក់ប្រៀប ។
នេះបើតាមការលើកឡើងរបស់ លោក ប៉ែន បូណា អ្នកនាំពាក្យរាជរដ្ឋាភិបាលក្នុងឱកាសនៃការធ្វើបច្ចុប្បន្នភាពស្តីពីស្ថានការណ៍ព្រំដែនកម្ពុជា-ថៃ បន្ទាប់ពីកងទ័ពថៃ បានបើកការវាយប្រហារមុនមកលើកងទ័ព និងជនស៊ីវិលកម្ពុជា នាព្រឹកថ្ងៃទី១៦ ខែធ្នូ ឆ្នាំ២០២៥ ។
លោក ប៉ែន បូណា បានលើកឡើងថា សង្គ្រាមប្រដាប់អាវុធខាងយោធាថៃ បានប្រើប្រាស់នូវអាវុធធុនធ្ងន់គ្រប់ប្រភេទ រួមទាំងយន្តហោះទម្លាក់គ្រាប់បែកផង ដ្រូនផង គ្រាប់បែកចង្កោម និងការបាញ់ផ្សែងពុលថែមទៀត មកលើកងទ័ព និងពលរដ្ឋកម្ពុជា ។
ចំណែកឯសង្គ្រាមចិត្តសាស្ត្រវិញ បើតាមឯកឧត្តម ប៉ែន បូណា ថា សង្គ្រាមមួយនេះក៏គ្រោះថ្នាក់ណាស់ដែរ ប្រសិនណាបើយើងមិនបានយល់ មិនបានប្រុងប្រយ័ត្ន ហើយធ្លាក់ចូលក្នុងអន្ទាក់របស់ពួកគេ ដោយគោលដៅនៃសង្គ្រាមនេះ គឺបំបាក់ស្មារតី បំបាក់ទឹកចិត្តកងទ័ព ប្រជាពលរដ្ឋ ហើយក៏មានចរិតញុះញង់ បំបែកបំបាក់សាមគ្គីភាពរវាងប្រជាពលរដ្ឋខ្មែរ និងថ្នាក់ដឹកនាំ ពីព្រោះគេយល់ឃើញថា ការបំបែកបំបាក់បាននេះគឺជាចំណុចខ្សោយរបស់យើង ដែលក្នុង សង្គ្រាមចិត្តសាស្ត្រនេះសត្រូវឈ្លានពានរបស់យើងបានប្រើប្រាស់វិធីសាស្ត្រច្រើនយ៉ាង គឺប្រើប្រាស់បណ្តាញសង្គម តាមរយៈការបង្កើតគណនីក្លែងក្លាយជាច្រើនដោយដាក់ឈ្មោះជាខ្មែរ សរសេរអក្សរខ្មែរ តែគោលដៅរបស់គេគឺបម្រើផលប្រយោជន៍ឱ្យប្រទេសឈ្លានពាន ដូចដែលបងប្អូនបានឃើញថានៅក្នុងបណ្តាញសង្គមសព្វថ្ងៃនេះប្រាកដជាបានឃើញថាពួកគេបានបន្លំធ្វើជាខ្មែរ ជាឧទាហរណ៍គេបានបង្ហោះរូបភាពមួយចំនួនដើម្បីបំបាក់ទឹកចិត្តកងទ័ពរបស់យើង រួមនឹងប្រជាពលរដ្ឋរបស់យើង ដោយគេមានបង្ហោះនូវរូបសញ្ញា (ឡូហ្គោ) និងស្លាកឈ្មោះនៃកងកម្លាំងរបស់យើង ដោយតុបតែង និងបង្កើតឡើង ដោយនិយាយរៀបរាប់ថានេះគឺជាអ្វីដែលគេបានចាប់បាន ដើម្បីឱ្យកងទ័ព និងពលរដ្ឋកម្ពុជាយល់់ថាយើងបានចាញ់ នេះគឺជាចិត្តសាស្ត្រមួយយ៉ាងធំធេង ដែលត្រូវតែប្រុងប្រយ័ត្ន។
លោក ប៉ែន បូណា បានបន្ថែមថា ខាងសត្រូវបានយករូបភាព បេអឹម២១ ដែលបានឆេះក្នុងសង្គ្រាមនៅប្រទេសផ្សេងមកបង្ហោះថា នេះ គឺជាអាវុធរបស់ ជាវុធសម្រាប់បាញ់រថក្រោះដែលគេរឹបអូសបានពីទាហានកម្ពុជា តែធាតុពិតរូបភាពមួយនេះ គឺគេបានយកមកពីប្រទេសផ្សេង ។ ទាំងនេះ គឺជាសង្គ្រាមចិត្តសាស្ត្រដែលគេបានជះចូលមកក្នុងប្រទេសកម្ពុជារបស់យើង ។
បន្ថែមពីលើនេះ ថៃគេបានប្រើប្រាស់បណ្តាញព័ត៌មានផ្លូវការរបស់គេតែម្តង ដោយស្ទើរតែទាំងអស់គេបានផ្សាយភូតកុហក បំផ្លឹស បំភ្លៃ ដើម្បីបម្រើឱ្យគោលដៅនៃសង្គ្រាមចិត្តសាស្ត្ររបស់អ្នកឈ្លានពាន ដោយគេបានផ្សាយថាកងទ័ពរបស់យើងប៉ុណ្ណេះនាក់ ប៉ុណ្ណោះនាក់បានស្លាប់នៅក្នុងមរភូមិ ដែលយើងអាចយល់បានពីបញ្ហានេះ តែពលរដ្ឋកម្ពុជាពុំបានធ្លាក់ចូលទៅក្នុងរឿងបោកប្រាស់មួយនេះទេ ។ នេះ គឺជាចំណុចគួរឱ្យកត់សម្គាល់ខ្លាំងណាស់សម្រាប់បងប្អូនប្រជាពលរដ្ឋរបស់យើង៕
ចែករំលែកព័តមាននេះ