តាម​ប្រភព​ព័ត៌មាន Soccer Laduma បានឱ្យ​ដឹង​ថា ក្លិប​យក្ស​នៅ​អង់គ្លេស Premier League ត្រូវ​បាន​គេ​រាយការណ៍​ថា កំពុង​សម្លឹង​មើល​កីឡាករ​ថ្មី​ចំនួន​៧​នាក់ ក្នុង​គោលបំណង​ធ្វើ​ឱ្យ​ក្លិប​ក្លាយទៅជា​ក្លិប​ខ្លាំង​ដូច​កាលពីមុន​វិញ​។

ម្ចាស់​ជើងឯក​លី​ក ២០​សម័យកាល កំពុង​តែ​ស្ថិត​នៅ​ក្នុង​ស្ថានភាព​ពិបាក​ដោយសារ​តែ​មានការ​ធ្លាក់​ជើង ក្រោយ​ពី​លោក Alex Ferguson ចូល​និវត្តន៍​នៅ​ឆ្នាំ​២០១៣​។ គ្រូបង្វឹក​បច្ចុប្បន្ន លោក Ole Gunnar Solskjaer កំពុង​រក​មើល​វិធី​ត្រឡប់​ទៅ​អតីតកាល​វិញ ដែល​ជា​ពេល​រុងរឿង​សម្រាប់​ក្លិប​នេះ​។

Solskjaer ដែល​បាន​ចំណាយពេល​១១​ឆ្នាំ ធ្វើ​ជា​កីឡាករ​នៅ Manchester United បាន​មក​ធ្វើ​ជា​គ្រូបង្វឹក​ជំនួស​លោក Jose Mourinho កាលពី​រដូវ​កាល​មុន ដើម្បី​ជួយ​ក្លិប​ឱ្យ​ខ្លាំង​ជាង​មុន​។ តែ​មក​ដល់​ពេល​នេះ លោក​មិន​បាន​សម្រេច​នោះ​ទេ ហើយ​ឥលូវ​កំពុង​តែ​សម្លឹង​មើល​កីឡាករ​ថ្មី​ៗ​មក​ជួយ​ដល់​ក្លិប​។

តំបន់​ប្រយុទ្ធ និង​ខ្សែបម្រើ​របស់​ក្រុម​បិសាច​ក្រហម គឺជា​តំបន់​ដែល​លោក​ចង់​ពង្រឹង​។ Emre Can របស់ Juventus, Richarlison របស់ Everton, Erling Haaland របស់ Red Bull Salzburg និង Moussa Dembele របស់ Olympique Lyon សុទ្ធតែ​ជា​កីឡាករ​ដែល លោក Solskjaer កំពុង​តែ​សម្លឹង​ចង់បាន មក​ដាក់​នៅ​ក្នុង​តំបន់​ពីរ​ខាងលើ​។ បិសាច​ក្រហម​ក៏​មាន​ទំនាក់ទំនង​ជាមួយ​ខ្សែប្រយុទ្ធ Mario Mandzukic របស់ Bianconeri, James Maddison របស់ Leicester City និង Jadon Sancho របស់ Borussia Dortmund​។

គួរ​បញ្ជាក់​ផង​ដែរ​ថា Man United បាន​ចំណាយ​ប្រាក់​ចំនួន ១៥៩​លាន​អឺ​រ៉ូ សម្រាប់​ការ​ផ្ទេរ​ក្នុង​ទីផ្សារ​ដោះ​ដូរ​កីឡាករ​នា​ពេល​ថ្មី​ៗ​នេះ ដែល​បង្កើត​ឡើង​ដោយ​ជះ​ប្រាក់​ជា​ច្រើន​សម្រាប់ Harry Maguire និង Aaron Wan-Bissaka ក៏​ដូច​ជា​ការ​មក​ដល់​របស់ Daniel James ពី Swansea៕ (​កែសម្រួល​ដោយ ៖ បុប្ផា​)