សហរដ្ឋអាមេរិក ៖ ក្រុមការពារតំណែងជើងឯកអាហ្សង់ទីន និងអេស្ប៉ាញ ដែលជាក្រុមត្រូវបានគេចាត់ទុកថា លេចធ្លោជាងគេប្រជែងពានរង្វាន់ FIFA World Cup ឆ្នាំ២០២៦…
សហរដ្ឋអាមេរិក ៖ ក្រុមការពារតំណែងជើងឯកអាហ្សង់ទីន និងអេស្ប៉ាញ ដែលជាក្រុមត្រូវបានគេចាត់ទុកថា លេចធ្លោជាងគេប្រជែងពានរង្វាន់ FIFA World Cup ឆ្នាំ២០២៦ មិនស្ថិតក្នុងពូលតានតឹង នៅក្នុងពិធីចាប់ឆ្នោតដ៏អធិកអធមមួយ នៅឯទីក្រុងវ៉ាស៊ីនតោន ខណៈដែលប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានទទួលពានរង្វាន់ «FIFA សន្តិភាព» ដែលជាពានរង្វាន់បង្កើតថ្មីរបស់សហព័ន្ធបាល់ទាត់ពិភពលោក។
ការចាប់ឆ្នោតដែលរៀបចំនៅឯមជ្ឈមណ្ឌល Kennedy កាលពីថ្ងៃទី៥ ខែធ្នូ ឆ្នាំ២០២៥ ក៏បានចាប់ផ្តើមការរាប់ថយក្រោយសម្រាប់ព្រឹត្តិការណ៍ FIFA World Cup ឆ្នាំ២០២៦ ដែលសហរដ្ឋអាមេរិក កាណាដា និងម៉ិកស៊ិកធ្វើជាម្ចាស់ផ្ទះរួមគ្នា ពោលនៅសល់រយៈពេល ៦ ខែទៀតប៉ុណ្ណោះ ហើយក៏ជាការប្រកួតមានក្រុមសរុបរហូតដល់ ៤៨ ក្រុមជាលើកដំបូងក្នុងប្រវត្តិសាស្ត្រផងដែរ។
ខ្សែប្រយុទ្ធ Lionel Messi ប្រធានក្រុមពពកសអាហ្សង់ទីន នឹងចាប់ផ្តើមភារកិច្ចការពារតំណែងជើងឯកពានរង្វាន់ដែលពួកគេបានឈ្នះនៅក្នុងប្រទេសកាតាឆ្នាំ ២០២២ ដោយត្រូវតទល់ជាមួយនឹងអាល់ហ្សេរី អូទ្រីស នៅក្នុងពូល J រួមទាំងហ្ស៊កដានីជាក្រុមបង្ហាញខ្លួនលើកដំបូងក្នុងប្រវត្តិសាស្ត្រ សម្រាប់ការប្រកួតជុំផ្តាច់ព្រ័ត្រពានរង្វាន់ World Cup ផងដែរ។
គោជល់អេស្ប៉ាញ ក្រុមជើងឯកទ្វីបអឺរ៉ុប (Euro) ឆ្នាំ២០២៤ ដែលត្រូវបានគេចាត់ទុកថាក្រុមលេចធ្លោជាងគេប្រជែងជើងឯក World Cup ឆ្នាំ២០២៦ នឹងចាប់ផ្តើមយុទ្ធនាការតទល់នឹងកាប់វែរ ដែលជាក្រុមបង្ហាញខ្លួនជុំផ្តាច់ព្រ័ត្រលើកដំបូង ព្រមទាំងអ៊ុយរូហ្គាយ និងអារ៉ាប៊ីសាអូឌីត នៅក្នុងពូល H។
នៅក្នុងពិធីដ៏អធិកអធមនោះ ក៏មានការចូលរួមជាពិសេសរបស់លោក ដូណាល់ ត្រាំ ផងដែរ ហើយលោកព្រមទាំងទទួលបានពានរង្វាន់ទើបតែបង្កើតថ្មីរបស់ FIFA មានឈ្មោះថា «FIFA សន្តិភាព» (FIFA Peace Prize) ទទួលផ្ទាល់ដៃពីប្រធាន FIFA លោក Gianni Infantino ផងដែរ។ លោក ត្រាំ ក៏បានថ្លែងថា វាពិតជាកិត្តិយសដ៏អស្ចារ្យមួយក្នុងជីវិតរបស់លោក និងជាកិត្តិយសដ៏អស្ចារ្យមួយផងដែរ ដែលបានសហការជាមួយលោក Gianni ដើម្បីធ្វើការងារដ៏អស្ចារ្យមួយ។
គួរបញ្ជាក់ថា FIFA World Cup ឆ្នាំ២០២៦ នឹងប្រព្រឹត្តទៅនៅថ្ងៃទី១១ ខែមិថុនា ដល់ថ្ងៃទី១៩ ខែកក្កដា ឆ្នាំ២០២៦ ខណៈមកទល់ពេលនេះ បានរកឃើញចំនួន ៤២ ក្រុមក្នុងចំណោម ៤៨ ក្រុម (រាប់ទាំងម្ចាស់ផ្ទះ) រួចហើយ ៖
-អឺរ៉ុប ១២ ក្រុម ៖ អង់គ្លេស បារាំង ក្រូអាស៊ី ព័រទុយហ្គាល់ ន័រវេស អាល្លឺម៉ង់ ហូឡង់ ស្កុតឡែន បែលហ្ស៊ិក ស្វីស អេស្ប៉ាញ និងអូទ្រីស
-អាស៊ី ៨ ក្រុម ៖ អូស្ត្រាលី អ៊ីរ៉ង់ ជប៉ុន កូរ៉េខាងត្បូង អារ៉ាប៊ីសាអូឌីត កាតា ហ្ស៊កដានី (លើកដំបូង) និងអ៊ូសបេគីស្ថាន (លើកដំបូង)
-អាមេរិកខាងត្បូង ៦ ក្រុម ៖ អាហ្សង់ទីន (ក្រុមការពារជើងឯក) ប្រេស៊ីល អេក្វាឌ័រ អ៊ុយរូហ្គាយ កូឡុំប៊ី និងប៉ារ៉ាហ្គាយ
-អាហ្វ្រិក ៩ ក្រុម ៖ អាល់ហ្សេរី ទុយនេស៊ី អេហ្ស៊ីប ហ្គាណា ម៉ារ៉ុក កាប់វែរ (លើកដំបូង) កូតឌីវ័រ សេណេហ្គាល់ និងអាហ្វ្រិកខាងត្បូង
-Concacaf ៦ ក្រុម ៖ ម្ចាស់ផ្ទះសហរដ្ឋអាមេរិក កាណាដា និងម៉ិកស៊ិក ព្រមទាំងគូរ៉ាសៅ (លើកដំបូង) ហៃទី និងប៉ាណាម៉ា
-អូសេអានី ១ ក្រុម ៖ នូវែលហ្សេឡង់៕ ដកស្រង់ ៖ VnExpress
ចែករំលែកព័តមាននេះ