សប្បាយ​ណាស់! បុណ្យអុំទូក​​នៅ​​​សៀម​រាប និង​ជំនឿ​ដ៏​យូរយារ​មក​ហើយ


ខេត្តសៀមរាប ៖ នា​រសៀល​ថ្ងៃ​ទី​១០ ខែវិច្ឆិកា ឆ្នាំ​២០១៩ តាម​ដងស្ទឹង​ប្រវត្តិសាស្ត្រ​ខេត្តសៀមរាប មាន​ធ្វើការ​ប្រកួត​ប្រណាំងទូក​(​ង​) ដើម្បី​អបអរសាទរ​ព្រះរាជ​ពិធីបុណ្យ​អុំទូក បណ្តែតប្រទីប និង​សំពះ​ព្រះ​ខែ អកអំបុក ដែល​ប្រព្រឹត្ត​ទៅ​ក្រោម​អធិបតីភាព​របស់​លោក អ៊ឹ​ង ហឿ​ន ប្រធាន​ក្រុមប្រឹក្សា​ខេត្ត លោក​ទៀ សីហា អភិបាល​នៃ​គណៈ​អភិបាលខេត្ត និង​លោក​ជំទាវ ដោយ​មានការ​អញ្ជើញ​ចូលរួម​ពី​ជា​សមាជិក​ព្រឹទ្ធសភា រដ្ឋសភា គណៈ​អភិបាលខេត្ត សមាជិក​ក្រុមប្រឹក្សា​ខេត្ត និង​វត្តមាន​របស់​លោក​ប្រធាន​ក្រុមប្រឹក្សា​ខេត្តឧត្តរមានជ័យ និង​ខេត្តបន្ទាយមានជ័យ ព្រះ​វិហារ ខេត្តកំពង់ធំ និង​ក្រុង​សម្ព័ន្ធមេត្រីភាព ព្រមទាំង​ថ្នាក់ដឹកនាំ​មន្ទីរ មន្ត្រីរាជការ អាជ្ញាធរ​ក្រុង ស្រុក ភ្ញៀវ​ជាតិ អន្តរជាតិ និង​ប្រជាពលរដ្ឋ​ចូលរួម​ទស្សនា​កម្សាន្ត​យ៉ាងច្រើន​កុះករ​ផង​ដែរ ។

តាម​សេចក្តីរាយការណ៍​របស់​អនុ​គណៈកម្មការ​បច្ចេកទេស​បាន​ឲ្យ​ដឹង​ថា ក្នុង​ឆ្នាំ​២០១៩​នេះ ការ​ប្រណាំងទូក​(​ង​) មាន​ទូក​ចូលរួម​ចំនួន​៣៣​ទូក មាន​ទូក​នារី​៥​ទូក ដែល​មាន​ចំណុះ ២២​នាក់ ហើយ​មាន​កីឡាករ កីឡាការិនី​សរុប​១​ពាន់​៥២៨​នាក់ នារី​១១០​នាក់ និង​កីឡាករ កីឡាការិនី​បម្រុង​សរុប​ចំនួន​១៨៦​នាក់ អ្នកដឹកនាំ​៦២​នាក់ តាម​ប្រភេទ​ទូក​ខ្នាត​អន្តរជាតិ ដែល​បាន​កំណត់​ដោយ​គណៈកម្មាធិការ​ជាតិ​កីឡា​អូ​ឡាំ​ពិ​ច ដើម្បី​សម្រាប់​ប្រកួត​ជា​លក្ខណៈ​ជាតិ និង​អន្តរជាតិ ។ ក្នុង​ពិធី​ប្រណាំងទូក​(​ង​)​នេះ ក៏​មានការ​ចូលរួម​ប្រកួតប្រណាំង​នូវ​ក្រឡោ​ចំនួន ៦​គូរ និង​ទូក​ខ្នាត​តូច​២​គូរ ដែល​ជា​សម្បត្តិ​វប្បធម៌​ប្រពៃណី​ខ្មែរ​យើង​នៅ​ខេត្តសៀមរាប ។

ព្រឹត្តិការណ៍​បើក​ការ​ប្រកួត​ប្រណាំងទូក​(​ង​)​នា​ឱកាស​នោះ លោក ទៀ សីហា ក៏​គូសបញ្ជាក់​ថា ជា​រៀង​រាល់​ឆ្នាំ នៅ​ថ្ងៃ​១៤-១៥​កើត ខែកត្តិក នៅ​ខេត្ត​ប្រវត្តិសាស្ត្រ​មួយ​នេះ តែង​ប្រារព្ធ​ធ្វើ​ទៅ​តាម​ប្រពៃណី​ខ្មែរ ហើយ​ប្រព្រឹត្ត​ទៅ​ក្នុង​លក្ខខណ្ឌ សន្តិសុខ សណ្តាប់​ធ្នាប់ និង​សុវត្ថិភាព​សង្គម​ល្អ​ប្រសើរ ដែល​កត្តា​ចំបង​នេះ បាន​និង​កំពុង​មាន​ឥទ្ធិពល​ទាក់ទាញ​ភ្ញៀវ​ទេសចរ​ជាតិ និង​អន្តរជាតិ​ឲ្យ​ចូល​មក​ទស្សនា​កំសាន្ត​ខេត្តសៀមរាប​កាន់តែ​ច្រើន​ឡើង​ៗ ។

លើស​ពី​នេះ​ទៀត ការ​រៀបចំ​ព្រឹត្តិការណ៍​វប្បធម៌​នេះ ក៏​ជា​ការ​ឧទ្ទិស​ដល់​អតីតកាល​នៃ​អ​ធិ​រាជាណាចក្រ​ខ្មែរ ក្រោម​ព្រះរាជកិច្ច​ដឹកនាំ​របស់​ព្រះបាទ​សម្តេច​ជ័យ​វ​រ័​ន្ម​ទី​៧ ព្រះ​មហា​​វីរក្សត្រ​ជំនាន់​នោះ ដែល​ព្រះ​អង្គ​ទ្រង់​បាន​ដឹកនាំ​កងទ័ពជើងទឹក​ដ៏​ក្លាហាន ប្រកប​ដោយ​វីរៈភាព​អង់អាច និង​ពោរពេញ​ដោយ​សមត្ថភាព​ប្រយុទ្ធ​បាន​រំដោះជាតិ​មាតុភូមិ ចេញ​ផុត​ពី​ការ​ឈ្លានពាន​របស់​បច្ចាមិត្ត ហើយ​សម្រេច​នូវ​ការ​បង្រួបបង្រួម​ជាតិ និង​កសាង​សង្គម​ជាតិ​ឲ្យ​រីក​ចម្រើន​ថ្កុំថ្កើង ។

លោក ទៀ សីហា បាន​បន្ត​ទៀត​ថា ម្យ៉ាងវិញទៀត យើង​ទាំងអស់​គ្នា​ប្រាកដជា​យល់​ដឹង​ហើយ​ថា ព្រះរាជ​ពិធីបុណ្យ​នេះ គឺជា​បុណ្យប្រពៃណី​ជាតិ​ដ៏​ធំ ពាក់ព័ន្ធ​នឹង​ជំនឿ​យ៉ាង​ជ្រាលជ្រៅ​ក្នុង​មនោសញ្ចេតនា​របស់​យើង ដែល​បុព្វបុរស​ខែ្ម​របា​ន​ប្រារព្ធ​ធ្វើ​តាំងពី​យូរ​យារ​​ណាស់​មក​ហើយ ដើម្បី​ជា​ការ​រំលឹក​ដឹងគុណ​ដល់​ព្រះ​គង្គារ ដែល​ហូរ​នាំ​ដីល្បាប់​ដ៏​មាន​ជីជាតិ​សម្រាប់​បង្កបង្កើន​ផល​នៃ​ប្រជា​កសិករ​យើង ហើយ​ក៏​ជា​រំលឹក​ដឹងគុណ​ដល់​ព្រះ​បរមគ្រូ​ដែល​យកកំណើត​ជា​សត្វ​ទន្សាយ​ព្រះ​ពោធិសត្វ ហើយ​ឧទ្ទិស​ថ្វាយខ្លួន ដើម្បី​សម្រេច​នូវ​ព្រះ​សម្មា​សម្ពោធិញ្ញាណ​។

ជាមួយ​គ្នា​នេះ​ដែរ ព្រះរាជ​ពិធីបុណ្យ​បណ្តែត ប្រទីប គឺជា​ការ​ឧទ្ទិស ដល់​អា​រុក្ខ អារក្ស អ្នកតា បារមី​ថែរក្សា​ទឹកដី ដើម្បី​សុំ​សេចក្តីសុខ​ក្សេមក្សាន្ត​ដល់​កូនចៅ ដែល​រស់នៅ​ឲ្យ​ទទួល​បាន​សុខ​សុភមង្គល​ចំរើន​រុងរឿង និង​ដើម្បី​ព្យាករណ៍​អាកាសធាតុ​សម្រាប់​បង្កបង្កើន​ផល​នៅ​ឆ្នាំ បន្ទាប់​ផង​ដែរ ។

លោក ទៀ សីហា គូសបញ្ជាក់​ថា ព្រះរាជ​ពិធីបុណ្យ​នេះ គឺជា​តម្លៃ​នៃ​ទស្សនវិជ្ជា​របស់​បុព្វបុរស​ខ្មែរ ដែល​មាន​គតិបណ្ឌិត​ក្នុង​ការ​សំយោគ​ចូល​គ្នា​រវាង​ជំនឿ​សាសនា និង​ទំ​លៀម​ទំលាប់​បង្កើត​បានជា​ពិធីបុណ្យ​មួយ​ប្រកបដោយ​សភាព​រស់​រវើក ទន់ភ្លន់ និង​មាន​លក្ខណៈ​សកល ភាព​ឲ្យ​ទៅ​ជា​អត្តសញ្ញាណ​ជា​ព្រលឹង​ជាតិ​ក្នុង​ស្មារតី នៃ​ការ​រួបរួមសាម​គ្គី កិច្ច​សហប្រតិបត្តិការ និង​ការ​យោគយល់​អា​ធ្យា​ស្រ័យ​គ្នា ដើម្បី​ឧត្តម​ប្រយោជន៍​ជាតិ។

ស្ថិត​លើ​ហេតុផល​ទាំង​អស់នេះ សក្ខីភាព​បញ្ជាក់​ឲ្យ​ឃើញ​ថា បុព្វបុរស​ខ្មែរ​បាន​បង្កើត​ពូជពង្ស​ជាតិ​សាសន៍​ខ្មែរ​យើង ដែល​ជា​និច្ចកាល​មាន​សីលធម៌ មាន​អរិយធម៌ និង​អត្តសញ្ញាណ​ខ្ពង់ ខ្ពស់​ឧត្តុង្គឧត្តម ល្បីល្បាញ​តាំងពី​ដើម​រៀង​មក ។ ក្នុង​ន័យ​នេះ​យើង​ក៏​មាន​មោទនភាព ដោយ​មានកេរ្តិ៍ឈ្មោះ​ដ៏​ល្បីល្បាញ នៃ​ទីក្រុង​ប្រវត្តិសាស្ត្រ​សៀមរាប ដែល​ជាទី​ក្រុង​មានការ​ទាក់ទាញ​បំផុត​សម្រាប់​ភ្ញៀវ​ទេសចរ​ចូល​មក​ទស្សនា​កម្សាន្ត ។

លោក​ក៏​បាន​ធ្វើការ​ផ្តាំផ្ញើ​ដល់​ជនរួមជាតិ​ទាំងអស់ ដែល​ចូលរួម​ក្នុង​ព្រះរាជ​ពិធីបុណ្យ​អុំទូក សូម​ចូលរួម​ថែរក្សា​នូវ​អនាម័យ បរិស្ថាន ក្នុង​ការ​លើក​ស្ទួយ​វប្បធម៌ សោ​ភ័​ណ្ឌ​ភាព​ក្រុង​ប្រវត្តិសាស្ត្រ​អង្គរ ព្រមទាំង​រក្សា​ការពារ​នូវ​ទ្រព្យសម្បត្តិ​ផ្ទាល់ខ្លួន សំខាន់​កុមារ​តូច​ៗ នៅ​ក្នុង​ពិធីបុណ្យ​នេះ​ផង​ដែរ​៕ (​កែសម្រួល​ដោយ ៖ បុប្ផា​)

Facebook Google Twitter Email

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Sponsored News

ការស្ទង់មតិគេហទំព័រថ្មី




សូម​អរគុណ