ខណៈដែលអ្នកនៅរាជធានីកាន់តែមានការយល់ដឹង និងកាន់តែប្រុងប្រយ័ត្ន ឥឡូវនេះ ក្រុមជនខិលខូចខ្លះបានធ្វើសកម្មភាពបោកប្រាស់រហូតដល់តាមខេត្ត សូម្បីតែនៅខេត្តមណ្ឌលគីរី ក៏មានជនរងគ្រោះអស់ប្រាក់ខ្ទង់ម៉ឺនដុល្លារដែរ ។ សមត្ថកិច្ចនៅខេត្តមណ្ឌលគីរី បានឲ្យដឹងនៅថ្ងៃទី១៧ ខែកញ្ញាថា…
ខណៈដែលអ្នកនៅរាជធានីកាន់តែមានការយល់ដឹង និងកាន់តែប្រុងប្រយ័ត្ន ឥឡូវនេះ ក្រុមជនខិលខូចខ្លះបានធ្វើសកម្មភាពបោកប្រាស់រហូតដល់តាមខេត្ត សូម្បីតែនៅខេត្តមណ្ឌលគីរី ក៏មានជនរងគ្រោះអស់ប្រាក់ខ្ទង់ម៉ឺនដុល្លារដែរ ។
សមត្ថកិច្ចនៅខេត្តមណ្ឌលគីរី បានឲ្យដឹងនៅថ្ងៃទី១៧ ខែកញ្ញាថា មេក្លោងដែលឆបោកតាមបណ្តាញសង្គមម្នាក់ត្រូវបានសមត្ថកិច្ចខេត្តមណ្ឌលគិរីចាប់ខ្លួនបញ្ជូនទៅសាលាដំបូងខេត្ត ក្រោយបានប្រព្រឹត្តសកម្មភាពបោកប្រាស់យកប្រាក់ពីជនរងគ្រោះអស់ជិតមួយម៉ឺនដុល្លារ ។
ប្រភពបានឲ្យដឹង ករណីនេះវាបានកើតឡើង តាំងពីថ្ងៃទី០២ ខែសីហា មកនៅពេលដែលជនរងគ្រោះបានទាក់ទងទៅបណ្ដាញទំនាក់ទំនងសង្គម Facebook Page មួយឈ្មោះ ហេង ហេង ប្រាក់កម្ចី ដែលគ្រប់គ្រងដោយបុគ្គលម្នាក់ឈ្មោះ ទូច ចន្ធូ និងមានក្រុមការងាររបស់ខ្លួនបីនាក់ផ្សេងទៀតមានទាំងអ្នកចាំជួយកាត់តក្លែងឯកសារ អ្នកទទួលប្រាក់ ជាដើម ។
សេចក្តីរាយការណ៍បានបន្តថា គោលបំណងរបស់ជនរងគ្រោះ ដែលបានទាក់ទងទៅបណ្ដាញទំនាក់ទំនងសង្គម Facebook Page ឈ្មោះ ហេង ហេង ប្រាក់កម្ចី គឺដើម្បីខ្ចីប្រាក់សរុបចំនួន១៥.០០០ដុល្លារ ប៉ុន្តែបែរជាមិនបានលុយដែលខ្ចី គឺទៅជាអស់លុយជិតមួយម៉ឺនដុល្លារទៅវិញ ។
ប្រភពបានបន្តថា ជនរងគ្រោះត្រូវឈ្មោះ ទូច ចន្ធូ និងបក្ខពួកបានប្រើប្រាស់ឧបាយកល ក្នុងនាមជាអ្នកឲ្យខ្ចីប្រាក់ និងលួងលោមក្នុងរូបភាពផ្សេងៗ ដើម្បីឲ្យជនរងគ្រោះត្រូវផ្ញើរប្រាក់មកខ្លួនជាបន្ដបន្ទាប់ រហូតដល់ចំនួន៩.៥០០ដុល្លារ ។
ដោយសារតែត្រូវការលុយបន្ទាន់ និងត្រូវជនឆបោកប្រើប្រាស់វិធីសាស្ត្រជាច្រើន បណ្តាលឲ្យជនរងគ្រោះធ្លាក់ក្នុងឧបាយកល រហូតផុងខ្លួនផ្ញើប្រាក់ឲ្យទៅក្រុមជនឆបោក តាមរយៈគណនីABA ឈ្មោះ TOUCH CHANTHOU និងវេរប្រាក់តាមវីងមានលេខទូរស័ព្ទ០៧៧ ៩១៦ ៦៦៣ ជាបន្តបន្ទាប់ទើបដឹងខ្លួនថា ចាញ់បោកគេ ៕
ចែករំលែកព័តមាននេះ