រាជធានីភ្នំពេញ ៖ រថយន្តម៉ាក Ford everest ១គ្រឿង បានបើកបរបោះពួយជ្រុលទៅបុកពីក្រោយរថយន្តម៉ាកព្រូស Toyota Prius ១គ្រឿងដែលកំពុងឈប់គោរពភ្លើងស្តុប…
រាជធានីភ្នំពេញ ៖ រថយន្តម៉ាក Ford everest ១គ្រឿង បានបើកបរបោះពួយជ្រុលទៅបុកពីក្រោយរថយន្តម៉ាកព្រូស Toyota Prius ១គ្រឿងដែលកំពុងឈប់គោរពភ្លើងស្តុប ធ្វើឲ្យរថយន្តPriusនេះរេចង្កូតជ្រុលចូលទៅចំណែកផ្លូវម្ខាងទៀត ។ ស្របពេលនោះក៏មានរថយន្តម៉ាកហ៊ីយ៉ាន់ដាយHyundaiធុនធំសណ្ដោងកន្ទុយរ៉ឺម៉កដឹកទំនិញ ១គ្រឿងទៀត បើកបរក្នុងទិសដៅបញ្ច្រាស់គ្នា ក្នុងល្បឿនលឿនទៅដល់បុកពេញទំហឹង ហើយរថយន្តធំនេះក៏បានរេចង្កូតបុករបាំងថ្មពុះចែកទ្រូងផ្លូវ១តង់ទៀតផងដែរ ។ ជាលទ្ធផលបណ្ដាលឲ្យរថយន្តទាំង៣គ្រឿងនោះរងការខូចខាតយ៉ាងដំណំដូចគ្នា ចំណែករបាំងថ្មពុះចែកទ្រូងផ្លូវ ក៏បានរបើកដួលរាបរាយប៉ាយរងការខូចខាតច្រើនកង់ ប៉ុន្តែពុំបណ្ដាលឲ្យមានមនុស្សរងរបួសធ្ងន់ធ្ងរនោះឡើយ ។
ឧប្បត្តិហេតុគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង២និង២០នាទីរសៀលថ្ងៃទី១៧ ខែកញ្ញា ឆ្នាំ២០២៥ នៅតាមផ្លូវ៦០ម៉ែត្រ ត្រង់ចំណុចភ្លើងស្តុបស្ថិតនៅក្នុងភូមិរលួស សង្កាត់ជើងឯក ខណ្ឌដង្កោ រាជធានីភ្នំពេញ ។
រថយន្តទាំង៣គ្រឿង ដែលបើកបុកគ្នាបង្កការខូចខាតនោះរួមមានទី១, ម៉ាកFord everest ពណ៍ស ពាក់ស្លាកលេខ ភ្នំពេញ 2BU-4015 ខូចខាតខ្ទេចមុខ ។ ទី២, ម៉ាកToyota Prius ពណ៌ប្រផេះ ពាក់ស្លាកលេខ ភ្នំពេញ 2CC-9134 ខូចខាតក្រពិតដាច់រយះមុខនិងតួខ្លួនខ្ទេចទាំងស្រុងតែម្ដង ។ និងទី៣, រថយន្តធុនធំម៉ាកHyundai ពណ៍សឆ្នូតបៃតង សណ្ដោងន្ទុយរ៉ឺម៉កបានក្រឡាប់កាប៊ីន និងដាច់ជន្ទាសធ្លាក់រាយប៉ាយលើផ្លូវ ព្រមទាំងដាច់កង់និងដាច់កាឡេហូរប្រេងកក្លាក់លើផ្លូវផងដែរ ។
តាមប្រភពីកន្លែងកើតហេតុបានប្រាប់ឲ្យដឹងស្របជាមួយនិងរូបភាពវីដេអូកាមេរ៉ាសុវត្ថិភាពថា នៅមុនពេលកើតហេតុរថយន្តម៉ាក Ford everest និងរថយន្តម៉ាក Toyota Prius បានបើកបរធ្វើដំណើរក្នុងទិសដៅស្របគ្នា ពីត្បូងទៅជើង ។ លុះពេលទៅដល់ត្រង់ចំណុចកើតហេតុរថយន្តម៉ាកToyota Prius បានឈប់ភ្លើងស្តុប ស្រាប់តែរថយន្តម៉ាក Ford everestជ្រុលទៅបុកពីក្រោយខ្ទាតចូលចំណែកផ្លូវម្ខាងទៀត ។
ប្រភពដដែលបានប្រាប់ឲ្យដឹងបន្តទៀតថា ស្របពេលនោះរថយន្តម៉ាក Hyundai ធុនធំសណ្ដោងកន្ទុយរ៉ឺម៉កដឹកទំនិញ១គ្រឿងខាងលើបើកបរក្នុងទិសដៅបញ្ច្រាស់គ្នា ពីជើងទៅត្បូងក្នុងល្បឿនលឿនទៅដល់បុករថយន្ត Toyota Prius ពេញទំហឹងតែម្ដង ។ បន្ទាប់មករថយន្តHyundai នោះបានជ្រុលទៅមុខ ហើយក៏បានរេចង្កូតជ្រុលទៅបុករបាំងថ្មពុះចែកទ្រូងផ្លូវ១តង់ទៀត បណ្ដាឲ្យក្រឡាប់កាប៊ីន និងដាច់ជន្ទាសដាច់កង់ និងដាច់កាឡេហូរប្រេងលើផ្លូវទៅមុខលែងរួច ចំណែករបាំងថ្មពុះចែកទ្រូងផ្លូវបានរបើកដួលខ្ទាតរាយប៉ាយ ច្រើនកង់ ។
ក្រោយកើតហេតុនគរបាលខណ្ឌដង្កោបាននិងនគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញធ្វើការវាស់វែងនិងនាំយករថយន្តទាំង៣គ្រឿងទៅរក្សាទុករង់ចាំដោះស្រាយនៅពេលក្រោយ ៕
ចែករំលែកព័តមាននេះ