ទីក្រុងបាងកក៖ មេដឹកនាំថៃទទួលស្គាល់ពីបរាជ័យរបស់ខ្លួនក្នុងការដោះស្រាយបញ្ហាគ្រោះទឹកជំនន់ដែលវាយប្រហារខេត្តភាគខាងត្បូងបណ្ដាលឱ្យស្លាប់មនុស្សយ៉ាងរង្គាល។ រហូតមកដល់ពេលនេះ ចំនួនអ្នកស្លាប់នៅប្រទេសថៃកើនឡើងដល់១៦២នាក់ ខណៈដែលទឹកជំនន់ក៏លិចធ្ងន់ធ្ងរផងដែរនៅម៉ាឡេស៊ីប៉ុន្តែអ្នកស្លាប់មានចំនួនតិចតួច។ ដើម្បីបន្សាបកំហឹងរបស់មហាជន លោកអនុទីនចាន់វីរៈគល់បានប្រកាសដាក់ចេញផែនការស្ដារសម្បទាឡើងវិញក្រោយគ្រោះទឹកជំនន់ និងផែនការផ្ដល់ប្រាក់ឧបត្ថម្ភជូនប្រជាជនដែលរងគ្រោះដោយទឹកជំនន់លើកនេះ។
ផ្ទះជាង១,៤លានខ្នង និងប្រជាជន៣,៨លាននាក់រងគ្រោះដោយទឹកជំនន់ដែលហក់ឡើងយ៉ាងគំហុកក្រោយការធ្លាក់ភ្លៀងខ្លាំងនៅក្នុងខេត្តចំនួន១២។ នេះបើយោងតាមនាយកដ្ឋានបង្ការ និងដោះស្រាយគ្រោះមហន្តរាយ។ អ្នកនាំពាក្យរដ្ឋាភិបាលថ្លែងថាមនុស្ស១៦២នាក់ត្រូវបានបញ្ជាក់ថាបានស្លាប់នៅក្នុងខេត្តចំនួន៨។ ក្នុងនោះ ខេត្តសុងខ្លាមានអ្នកស្លាប់ច្រើនជាងគេរហូតដល់១២៦នាក់។
ដោយសារទឹកជំនន់ក៏ធំ មនុស្សក៏ស្លាប់ច្រើនធ្វើឱ្យមហាជនថៃផ្ទុះកំហឹង និងរិះគន់រដ្ឋាភិបាលយ៉ាងខ្លាំង។ លោកអនុទីនប្រាប់អ្នកសារព័ត៌មានថាលោកសូមទទួលស្គាល់ពីភាពខ្វះខាតរបស់រដ្ឋាភិបាលដែលគ្រប់គ្រងស្ថានការណ៍គ្រោះទឹកជំនន់មិនបានល្អ។ នៅពេលចុះទៅដល់តំបន់រងគ្រោះនៅកន្លែងណា លោកតែងតែសូមទោសប្រជាជននៅកន្លែងនោះដែលរដ្ឋាភិបាលមិនមានលទ្ធភាពជួយដោះស្រាយទុក្ខធុរៈ និងការពារពួកគេឱ្យបានដិតដល់។
លោកអនុទីនថ្លែងថានៅសប្ដាហ៍ក្រោយ រដ្ឋាភិបាលនឹងចាប់ផ្ដើមចែកលុយជូនប្រជាជនដែលរងគ្រោះដោយទឹកជំនន់។ រដ្ឋាភិបាលក៏នឹងដាក់ចេញវិធានការបន្ធូរបន្ថយទុក្ខលំបាកដទៃទៀតដូចជាពន្យារពេលសងបំណុល និងផ្ដល់ប្រាក់កម្ចីរយៈពេលខ្លីដោយគ្មានការប្រាក់សម្រាប់ជួសជុលហាងលក់ទំនិញ និងផ្ទះដែលខូចខាត។ នេះបើយោងតាមការផ្សាយរបស់អេភី (AP) និងប្រភពដទៃទៀត៕
ចែករំលែកព័តមាននេះ