រាជធានីភ្នំពេញ ៖ តំណាងអយ្យការអមសាលាដំបូងរាជធានីភ្នំពេញ កាលពីព្រឹកថ្ងៃទី៣ ខែមីនា ឆ្នាំ២០២៦ បានបញ្ចប់លើការស៊ើបសួរលើក្រុមអ្នកបើកល្បែងស៊ីសងដោយខុសច្បាប់ តាមអនឡាញចំពោះជនជាតចិន៥នាក់ រួចសំណុំរឿងត្រូវបញ្ជូនទៅចៅក្រមស៊ើបសួរ ដើម្បីសម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន…
រាជធានីភ្នំពេញ ៖ តំណាងអយ្យការអមសាលាដំបូងរាជធានីភ្នំពេញ កាលពីព្រឹកថ្ងៃទី៣ ខែមីនា ឆ្នាំ២០២៦ បានបញ្ចប់លើការស៊ើបសួរលើក្រុមអ្នកបើកល្បែងស៊ីសងដោយខុសច្បាប់ តាមអនឡាញចំពោះជនជាតចិន៥នាក់ រួចសំណុំរឿងត្រូវបញ្ជូនទៅចៅក្រមស៊ើបសួរ ដើម្បីសម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន ។
ជនសង្ស័យទាំង៥ នាក់នោះមាន ៖
១-ឈ្មោះ LIGING XIN ភេទប្រុស អាយុ២៩ឆ្នាំ ជនជាតិចិន ។
២-ឈ្មោះ QI QIAN ភេទប្រុស អាយុ៣៥ឆ្នាំ ជនជាតិចិន ។
៣-ឈ្មោះ LIU ZE XIN ភេទប្រុស អាយុ២៨ឆ្នាំ ជនជាតិចិន ។
៤-ឈ្មោះ HUANG WEN WEI ភេទប្រុស អាយុ៣៥ឆ្នាំ ជនជាតិចិន ។
៥-ឈ្មោះ LIANG KANG HAI ភេទប្រុស អាយុ៣៤ឆ្នាំ ជនជាតិចិន ។
សូមជម្រាបថា កាលពីរសៀលថ្ងៃទី២៥ ខែកុម្ភៈ ឆ្នាំ២០២៦ ដោយមានការចង្អុលបង្ហាញដឹកនាំបញ្ជាពីលោកឧត្តមសេនីយ៍ឯក ជួន ណារិន្ទ អគ្គស្នងការរង ជាស្នងការនគរបាលរាជធានីភ្នំពេញ កម្លាំងចម្រុះផែនការងារនគរបាលព្រហ្មទណ្ឌ ផែនការងារសន្តិសុខ ផែនអន្តោប្រវេសន៍ និងកម្លាំងអធិការដ្ឋាននគរបាលខណ្ឌសែនសុខ ។
ក្រោមការសម្របសម្រួលពីលោក ឆាយ ហុង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានចុះបង្ក្រាបបទល្មើសជាក់ស្ដែង ករណីឆបោកតាមប្រព័ន្ធបច្ចេកវិទ្យា (SCAM ONLINE) នៅចំណុចអគារ stay city អគារទី២ ជាន់ទី៩ បន្ទប់លេខ៩១២ បន្ទប់លេខ៩១០ និងអគារទី៤ ជាន់ទី៨ បន្ទប់លេខ៨២២ ស្ថិតនៅចំណុចសង្កាត់អូរបែកក្អម ខណ្ឌសែនសុខ រាជធានីភ្នំពេញ ដោយបានឃាត់មនុស្សជាច្រើននាក់ ។ ប៉ុន្តែរកឃើញជនសង្ស័យដែលជាប់ពាក់ព័ន្ធបទល្មើស Scams Online តែ៥នាក់ទេ និងបានធ្វើការដកហូតសម្ភារៈរួមមាន ៖
Monitor ចំនួន១៣គ្រឿង កុំព្យូទ័រall in one ចំនួន២៨គ្រឿង កុំព្យូទ័រយួរដៃចំនួន៩គ្រឿង cpu ចំនួន១៣គ្រឿង និងទូរស័ព្ទបម្រើឲ្យបទល្មើសជាច្រើនគ្រឿង ។
បន្ទាប់មនុស្សមិនជាប់ពាក់ព័ន្ធបទល្មើស សមត្ថកិច្ចអនុវត្តតាមនីតិវិធី ចំណែកជនសង្ស័យជាជនជាតិចិន៥នាក់ បានប្រគល់ឲ្យការិយាល័យនគរបាលព្រហ្មទណ្ឌកម្រិតធ្ងន់ កសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមផ្លូវច្បាប់ ។
មុននេះ ប្រតិបត្តិការចុះត្រួតពិនិត្យទីតាំងសង្ស័យលួចប្រព្រឹត្តបទល្មើសឆបោកតាមអនឡាញនេះ ដឹកនាំដោយឯកឧត្តម ឃួង ស្រេង អភិបាលរាជធានីភ្នំពេញ ដែលមានការសម្របសម្រួលផ្ទាល់ពីលេខាធិការដ្ឋាននៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប) ត្រួតពិនិត្យពីថ្ងៃទី៣ ដល់ទី១៨ ខែកុម្ភៈ នោះគឺមានអគារខុនដូ អាផាតមិន បុរី ផ្ទះសំណាក់ និងសណ្ឋាគារ ស្ថិតនៅក្នុងភូមិសាស្ត្រខណ្ឌទាំង១៤ នៃរាជធានីភ្នំពេញ ដោយរកឃើញជនបរទេសស្នាក់នៅចំនួន ២១ ១០៤នាក់ (ស្រី ៦ ៦៨៣នាក់) ។
គ.ប.ឆ.ប បានបញ្ជាក់ថា ក្នុងរយៈពេល១៥ថ្ងៃនេះ សមត្ថកិច្ចបង្ក្រាបទីតាំងប្រព្រឹត្តបទល្មើសបាន៤០ករណី ដោយឃាត់ខ្លួនជនជាតិបរទេសបានចំនួន ២៨៤នាក់ (ស្រី៣១នាក់) មកពី១៣សញ្ជាតិរួមមាន ៖ វៀតណាម ចិន មីយ៉ាន់ម៉ា កូរ៉េខាងត្បូង ម៉ាឡេស៊ី នេប៉ាល់ បង់ក្លាដេស ឥណ្ឌា ស្រីលង្កា ហ្វីលីពីន ឥណ្ឌូណេស៊ី ប៉ាគីស្ថាន និងសិង្ហបុរី ។
ក្នុងចំណោមករណីបង្ក្រាបទីតាំង Online Scams នេះ គឺមាន១១ករណី ត្រូវបានស្នងការនគរបាលរាជធានីភ្នំពេញបញ្ជូនទៅតុលាការ ។ ការបញ្ជូនទៅតុលាការនេះ គឺមានទាំងមេខ្លោង និងអ្នកពាក់ព័ន្ធផ្ទាល់ជាជនជាតិចិន២២នាក់ សិង្ហបុរី១នាក់ និងខ្មែរ១នាក់ ។ សរុបទាំងអស់ ២៤នាក់ ដើម្បីផ្តន្ទាទោសតាមច្បាប់ជាធរមាន ។
សម្តេចធិបតីនាយករដ្ឋមន្ត្រី ហ៊ុន ម៉ាណែត បានបញ្ជាក់យ៉ាងច្បាស់ថា កម្ពុជាមិនមែនជាកន្លែងសម្រាប់ឧក្រិដ្ឋជនបច្ចេកវិទ្យាប្រើប្រាស់ក្នុងការប្រព្រឹត្តការឆបោក ឬបទល្មើសឆ្លងដែនឡើយ ។ សម្តេចថ្លែងថា រាល់បុគ្គល ឬអង្គភាពទាំងឡាយណាដែលនៅពីក្រោយសកម្មភាពឆបោកទាំងនេះ នឹងត្រូវប្រឈមមុខនឹងទោស ទណ្ឌខ្ពស់បំផុតដោយគ្មានការយោគយល់ ៕
ចែករំលែកព័តមាននេះ