រាជធានីភ្នំពេញ ៖ លោក Timothy Donnellan មេបញ្ជាការ​កងកម្លាំង​ឆ្មាំ​ការពារ​ជាតិ នៃ​រដ្ឋ Idaho បាន​បំពេញ​ទស្សនកិច្ច​នៅ​កម្ពុជា ២ថ្ងៃ កាលពី​ថ្ងៃ​ទី​១៥-១៦ ខែកញ្ញា ឆ្នាំ​២០២៥ ដើម្បី​ពង្រឹង​កិច្ច​សហប្រតិបត្តិការ​យោធា​ទ្វេភាគី ។

ជាក់ស្តែង ស្ថានទូត​អា​មេ​រិ​ក​ប្រចាំ​កម្ពុជា បាន​ប្រកាស​នៅ​លើ​បណ្តាញ​សង្គមហ្វេសប៊ុក នា​ព្រឹក​ថ្ងៃ​ទី​១៨ ខែកញ្ញា ឆ្នាំ​២០២៥​នេះ​ថា ៖ ស្ថានទូត​អា​មេ​រិ​ក​នៅ​ភ្នំពេញ ស្វាគមន៍​លោក​ឧត្តមសេនីយ៍ទោ Timothy Donnellan មេបញ្ជាការ​កងកម្លាំង​ឆ្មាំ​ការពារ​ជាតិ នៃ​រដ្ឋ Idaho (IDNG) ក្នុងអំឡុងពេល​ថ្ងៃ​ទី​១៥-១៦ ខែកញ្ញា ។

ជាមួយ​គ្នា​នោះ​ដែរ ស្ថានទូត​អា​មេ​រិ​ក​ប្រចាំ​កម្ពុជា បាន​បញ្ជាក់​ថា ក្នុង​អំឡុង​ទស្សនកិច្ច​ផ្លូវការ​នេះ លោក​ឧត្តមសេនីយ៍ទោ Donnellan បាន​ទៅ​កាន់ សាលា​ហ្វឺ​ក​ហ្វឹ​ន​កងកម្លាំង​រក្សា​សន្តិភាព​ពហុ​ជាតិ ដើម្បី​ជួប​ជាមួយ​ឯកឧត្តម ឧត្តមសេនីយ៍ឯក ហួត គឹ​ម​សាន អគ្គនាយករង​មជ្ឈមណ្ឌល​ជាតិ​រក្សា​សន្តិភាព និង​ជា​នាយក​សាលា​ហ្វឹកហ្វឺន​កងកម្លាំង​រក្សា​សន្តិភាព​ពហុ​ជាតិ ហើយ​បាន​សង្កេត​មើល​ការ​ផ្លាស់​ប្តូរ​ចំណេះដឹង​រវាង​អ្នកជំនាញ (Subject Matter Expert Exchange) រវាង IDNG និង RCAF ជា​លើក​ដំបូង ចាប់តាំងពី​ឆ្នាំ​២០១៩ ដែល​ជា​ដំណាក់កាល​សំខាន់​មួយ ក្នុង​ការ​ស្ដារ​ឡើង​វិញ​កិច្ច​សហប្រតិបត្តិការ​យោធា​ទ្វេភាគី ។

ក្រៅពី​ការ​ចូលរួម​នៅ​សាលា​ហ្វឹកហ្វឺន​នេះ លោក​ឧត្តមសេនីយ៍ទោ Donnellan ក៏​បាន​ពិភាក្សា​ជាមួយ​ថ្នាក់ដឹកនាំ​ការពារ​ជាតិ និង​ភាគី​ពាក់ព័ន្ធ​សំខាន់​ៗ ដើម្បី​បញ្ជាក់​ឡើង​វិញ​នូវ​ការ​ប្តេជ្ញា​របស់​សហរដ្ឋអាមេរិក ក្នុង​ការ​គាំទ្រ​កិច្ច​សមត្ថភាព​រក្សា​សន្តិភាព​របស់​កម្ពុជា និង​ជំរុញ​ការ​ខិតខំ​ប្រឹងប្រែង​ស្ដារ​ឡើង​វិញ កម្មវិធី State Partnership Program (SPP) រវាង​កងកម្លាំង​ឆ្មាំ​ការពារ​ជាតិ​នៃ​រដ្ឋ Idaho និង​កង​យោធពលខេមរភូមិន្ទ ៕