រាជធានីភ្នំពេញ ៖ ក្រុមកីឡាបាល់ទាត់ជម្រើសជាតិកម្ពុជាអាយុក្រោម១៩ឆ្នាំ បានប្រកួតឈ្នះក្រុមជម្រើសជាតិអាយុក្រោម១៩ឆ្នាំកោះម៉ារីណាខាងជើង ក្នុងលទ្ធផល៩-០ នៅក្នុងជំនួបវគ្គជម្រុះពូលGនៃពានរង្វាន់ AFC U-19 Championship 2019 ដែលបានប្រព្រឹត្តទៅនៅទីលានពហុកីឡដ្ឋានជាតិអូឡាំពិក កាលពីល្ងាច ថ្ងៃទី៤ខែវិច្ឆិកា ។ ចំណែកក្រុមជម្រើសជាតិអាយុក្រោម១៩ឆ្នាប្រទេសថៃ យកឈ្នះលើក្រុមប្រទេសប៊ុយណេ ៩-០ ដូចគ្នា។
គួររំឭកថា សម្រាប់ការប្រកួតថ្ងៃបើកឆាកដំបូង ក្រុមជម្រើសជាតិអាយុក្រោម១៩ឆ្នាំកម្ពុជាចាញ់ក្រុមជម្រើសជាតិអាយុក្រោម១៩ឆ្នាំម៉ាឡេស៊ី ក្នុងលទ្ធផល៥-៤ ។ ដូច្នេះ ជាមួយនឹងការយកឈ្នះក្រុមប្រទេសម៉ារីណាខាងជើង៩-០ធ្វើឱ្យក្រុមកម្ពុជាឈរនៅលេខរៀងទី២ក្នុងពូលជាបណ្ដោះអាសន្ន ដោយទទួលបាន៣ពិន្ទុ ។
ការប្រកួតលើកនេះ គ្រាន់តែកីឡាករ សៀង ចន្ធា ម្នាក់ឯងមានឱកាសទាត់បាល់បញ្ចូលទីបានសម្រេចរហូតដល់៣គ្រាប់នៅក្នុងតង់ទី២ ខណៈដែលរូបគេបានប្ដូរចូលជំនួសមិត្តរួមក្រុម វុធ តុលា។
គ្រាប់បាល់ទី១ រកបាននៅនាទីទី៨៣ បន្ទាប់ពីអូសដាច់ខ្សែការពារកោះម៉ារីណាខាងជើង ហើយស៊ុតបញ្ចូលទីបានយ៉ាងល្អ ។ ចំណែកគ្រាប់បាល់ទី២ រកបាននៅនាទីទី៨៨ និងគ្រាប់បាល់ទី៣សម្រេចបាននៅចុងម៉ោងបញ្ចប់ការប្រកួតក្នុងតង់ទី២ ។
រីឯគ្រាប់បាល់៦គ្រាប់ទៀត ជាចំណែករបស់មិត្តរួមក្រុម ដោយកីឡាករ ធី លាង និងកីឡាករ លឹម ពិសុទ្ធ រកបាន២គ្រាប់ម្នាក់ ក្រោយពេលកីឡាករ លី ម៉ាអែល និង វុធ តុលា រកបានម្នាក់១គ្រាប់កាលពីតង់ទី១ ។
ទោះជាយ៉ាងណា គ្រូក្រុមជម្រើសជាតិកម្ពុជា លោក Koji Gyotoku ប្រាប់ថា កុំអាលអរ ព្រោះថាសម្រាប់ការប្រកួតបន្ទាប់នៅថ្ងៃទី៨ ខែវិច្ឆិកាខាងមុខ នឹងត្រូវប៉ះជាមួយក្រុមប្រទេសថៃដែលជាក្រុមខ្លាំងមួយ ។ លោកគ្រូជនជាតិជប៉ុនម្នាក់នេះប្រាប់ថា បច្ចេកទេសលេងរបស់កូនក្រុមលោកធ្វើមិនសូវបានល្អទាល់តែសោះ ។
លោកបានបញ្ជាក់ទៀតថា ថ្វីដ្បិតការប្រកួតពានAFFកាលពីនៅប្រទេសវៀតណាមកម្ពុជាបានយកឈ្នះក្រុមថៃមែន តែសម្រាប់ការប្រកួតលើកនេះ ថៃមានទម្រង់លេងល្អជាងមុនឆ្ងាយណាស់៕ (កែសម្រួលដោយ ៖ បុប្ផា)
ចែករំលែកព័តមាននេះ