ខេត្តឈុនបុរី ៖ អត្តពលិកថៃចំនួន ៨ នាក់ ដែលចូលរួមប្រកួតប្រជែងនៅក្នុងព្រឹត្តិការណ៍កីឡាស៊ីហ្គេមលើកទី ៣៣ ឆ្នាំ២០២៥ ត្រូវបានបញ្ជូនទៅកាន់មន្ទីរពេទ្យក្នុងខេត្តឈុនបុរី (Chonburi)…
ខេត្តឈុនបុរី ៖ អត្តពលិកថៃចំនួន ៨ នាក់ ដែលចូលរួមប្រកួតប្រជែងនៅក្នុងព្រឹត្តិការណ៍កីឡាស៊ីហ្គេមលើកទី ៣៣ ឆ្នាំ២០២៥ ត្រូវបានបញ្ជូនទៅកាន់មន្ទីរពេទ្យក្នុងខេត្តឈុនបុរី (Chonburi) ដោយមានរោគសញ្ញាមិនស្រួលខ្លួនខ្លាំង ដោយសារការពុលអាហារ។
បើតាមក្រុមជួយសង្គ្រោះខេត្តឈុនបុរី បានឱ្យដឹងថា ពួកគេត្រូវបានជូនដំណឹងនៅល្ងាចថ្ងៃទី១២ ខែធ្នូ ឆ្នាំ២០២៥ អំពីករណីសង្គ្រោះបន្ទាន់មនុស្សចំនួន ៨ នាក់ក្នុងកន្លែងស្នាក់នៅរបស់ក្រុមអត្តពលិកកីឡាស៊ីហ្គេម។ អត្តពលិកទាំងនោះ បង្ហាញអាការៈមិនស្រួលខ្លួនខ្លាំងដោយសារឈឺពោះ ក្អួតចង្អោរ វិលមុខ និងរាគ ហើយត្រូវបានបញ្ជូនទៅមន្ទីរពេទ្យខេត្តឈុនបុរី ដើម្បីព្យាបាល។ មន្ត្រីពេទ្យក្រោយមកបានបញ្ជាក់ថា អត្តពលិកទាំង ៨ នាក់នោះ គឺជាសមាជិកក្រុមជម្រើសជាតិថៃផ្ទាល់តែម្តង ដោយក្នុង ៧ នាក់ជាអត្តពលិកកីឡាបាល់ទះ។
យោងតាមការបញ្ជាក់ពីលោកវេជ្ជបណ្ឌិត ស៊ឺមសក្តិ ស៊ូម៉ាណុន (Sermsak Sumanon) ប្រធានគណៈកម្មាធិការវេជ្ជសាស្ត្រគណៈប្រតិភូថៃថា អត្តពលិកទាំងនោះបានញ៉ាំអាហារប្រអប់ពីសណ្ឋាគារខាងក្រៅពេលអាហារថ្ងៃត្រង់ នៅថ្ងៃទី១១ ខែធ្នូ កន្លងទៅ មុនពេលពួកគេចូលទៅកាន់កន្លែងស្នាក់នៅផ្លូវការរបស់អត្តពលិកកីឡាស៊ីហ្គេម។ លោកបានគូសបញ្ជាក់ដូច្នេះថា «អាហារត្រូវបានបរិភោគមុនពេលអត្តពលិកចូលទៅក្នុងកន្លែងស្នាក់នៅរបស់អ្នករៀបចំ ហើយមិនមានទំនាក់ទំនងជាមួយអាហារដែលផ្តល់ដោយអ្នករៀបចំកីឡាស៊ីហ្គេមនោះទេ»។
យ៉ាងណាមិញ ស្ថានភាពរបស់អត្តពលិកទាំងនោះ ត្រូវបានរាយការណ៍ថាវិលមករកភាពប្រក្រតីវិញហើយ។ ក្រុមទាំងនោះក៏ត្រូវបានអនុញ្ញាតឱ្យចេញពីមន្ទីរពេទ្យ និងវិលត្រឡប់ទៅកាន់សណ្ឋាគាររបស់ក្រុមវិញផងដែរ។ ទោះយ៉ាងណានៅទីនោះ បុគ្គលិកពេទ្យនឹងបន្តតាមដានសុខភាពរបស់ពួកគេបន្ថែមទៀត។
រឿងរ៉ាវនេះបាននិងកំពុងទាក់ទាញការចាប់អារម្មណ៍ឡើងវិញ ចំពោះការរៀបចំអាហារនៅក្នុងព្រឹត្តិការណ៍កីឡាស៊ីហ្គេមលើកទី ៣៣ ដែលប្រទេសថៃជាម្ចាស់ផ្ទះ ខណៈដែលកន្លងមក គណៈប្រតិភូកីឡាជាច្រើនបានរាយការណ៍ពីភាពចម្រុះនៃអាហារមានកម្រិត និងមិនគ្រប់គ្រាន់ ដែលជាបញ្ហាប្រឈមនៃរបបអាហាររបស់បណ្តាអត្តពលិក ជាពិសេសសម្រាប់ក្រុមមានតម្រូវការអាហារូបត្ថម្ភខ្ពស់ ឬប្រទេសកាន់សាសនាអ៊ីស្លាម។
ជាក់ស្តែង ក្រុមវៀតណាម រួមទាំងក្រុមបាល់ទាត់ ហ្វុតសាល និងបាល់ទះ ក៏ធ្លាប់បានលើកឡើងពីការព្រួយបារម្ភអំពីមុខម្ហូបដដែលៗ និងអាហារប្រអប់តូចៗនៅសណ្ឋាគារនៅទីក្រុងបាងកក និងខេត្តឈុនបុរី។ សហព័ន្ធបាល់ទាត់វៀតណាមបានលើកឡើងថា ខ្លួនបានរំពឹងទុកពីបញ្ហាបែបនេះរួបហើយ ដោយបានរៀបចំអាហារបន្ថែមពីភោជនីយដ្ឋានវៀតណាមនៅក្នុងប្រទេសថៃផ្ទាល់តែម្តង។
ក្រៅពីវៀតណាម ងាកទៅម៉ាឡេស៊ីក៏បានត្អូញត្អែរផងដែរថា ការរៀបចំអាហារហាឡាល់ (Halal) ដែលសន្យាដោយប្រទេសម្ចាស់ផ្ទះថៃ មិនបានបំពេញតម្រូវការប្រចាំថ្ងៃជាប់លាប់នោះទេ។ ក្រៅពីបញ្ហាអាហារ គណៈប្រតិភូមួយចំនួនក៏បានរាយការណ៍ពីបញ្ហាភស្តុភារកម្ម រាប់ចាប់ពីការដឹកជញ្ជូនចេញពីអាកាសយានដ្ឋានយឺតពេល រហូតដល់ការច្រឡំកន្លែងស្នាក់នៅនៅខេត្តឈៀងម៉ៃ។
វៀតណាមក៏បានតវ៉ាប្រឆាំងនឹងកំហុសឆ្គងម្តងហើយម្តងទៀត ដែលពាក់ព័ន្ធនឹងការប្រើប្រាស់ទង់ជាតិរបស់ខ្លួន អំឡុងពេលផ្សាយតាមទូរទស្សន៍ និងពិធីប្រគល់មេដាយ រួមទាំងកំហុសឆ្គង អំឡុងពេលការប្រកួតបាល់ទាត់បុរស U22 ទល់នឹងម៉ាឡេស៊ីផងដែរ។
ពាក់ព័ន្ធបញ្ហានេះ អាជ្ញាធរកីឡាថៃ (SAT) បានទទួលស្គាល់ ព្រមទាំងបានសន្យាថានឹងចាត់វិធានការកែតម្រូវឱ្យបានឆាប់រហ័ស។ ទោះយ៉ាងណាក៏ដោយ ប្រធានគណៈប្រតិភូថៃ លោក ថាណា ឆៃប្រាសិទ្ធិ (Thana Chaiprasit) បានព្រមានថា ការធ្វេសប្រហែសប្រតិបត្តិការម្តងហើយម្តងទៀតនេះ អាចប៉ះពាល់ដល់មុខមាត់របស់ប្រទេសថៃក្នុងនាមជាម្ចាស់ផ្ទះព្រឹត្តិការណ៍កីឡាស៊ីហ្គេម៕ ប្រភព ៖ VnExpress និង Khaosod
ចែករំលែកព័តមាននេះ