ប្រទេសអង់គ្លេស ៖ នាយករដ្ឋមន្ត្រីអង់គ្លេសលោកបូរីសចនសុន កាលពីថ្ងៃទី៣វិច្ឆិកា បានសុំទោសដែលពុំអាចអនុវត្តBREXITបានដូចការសន្យារបស់លោកត្រឹមថ្ងៃទី៣១តុលា។
នាយករដ្ឋមន្ត្រីបានធ្វើយុទ្ធនាការឃោសនាបោះឆ្នោតសម្រាប់ការបោះឆ្នោតមុនកាលកំណត់ថ្ងៃទី១២ធ្នូ ដោយលោកសង្ឃឹមថាលោកអាចដណ្ដើមបានវិញសំឡេងភាគច្រើនក្នុងសភា។ ឡើងកាន់អំណាចពីខែកក្កដាមក ដោយសន្យាអនុវត្តBREXITត្រឹមដំណាច់ខែតុលា លោកបូរីសចនសុនធ្លាប់សច្ចាថា លោកសុខចិត្តស្លាប់នៅបាតរណ្ដៅជាជាងស្នើឲ្យមានការពន្យារពេលBREXITជាលើកទី៣។ ប៉ុន្តែលោកបានលេបសម្ដីវិញហើយស្នើពន្យារពេលBREXITរហូតដល់ថ្ងៃទី៣១មករា ជាមួយកិច្ចព្រមព្រៀងថ្មីជាមួយសហភាពអឺរ៉ុប។
មេដឹកនាំអភិរក្សនិយមបានសម្ដែងការសោកស្ដាយដ៏ជ្រាលជ្រៅ តាមកាសែតSKY NEWSហើយការពារកិច្ចព្រមព្រៀងចាកចេញដែលចរចាដោយលំបាក ជាមួយសហភាពអឺរ៉ុប តែត្រូវបានសម្ព័ន្ធមិត្តប្រធានាធិបតីអាមេរិកលោកដូណាល់ត្រាំមិនពេញចិត្ត។ លោកត្រាំយល់ថាកិច្ចព្រមព្រៀងនោះ នឹងមិនអាចចុះហត្ថលេខាលើកិច្ចព្រមព្រៀងពាណិជ្ជកម្ម ជាមួយអង់គ្លេសឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ