បរទេស ៖ មហាសេដ្ឋីរបស់ប្រទេសចិន គឺលោកចេក ម៉ា (Jack Ma) ថ្មីៗនេះបានទទួលការរិះគន់យ៉ាងខ្លាំងដូចទឹកបាក់ទំនប់ បន្ទាប់ពីលោកបានអះអាងថា ខ្លួនគាំទ្រវប្បធម៌ធ្វើការ…
បរទេស ៖ មហាសេដ្ឋីរបស់ប្រទេសចិន គឺលោកចេក ម៉ា (Jack Ma) ថ្មីៗនេះបានទទួលការរិះគន់យ៉ាងខ្លាំងដូចទឹកបាក់ទំនប់ បន្ទាប់ពីលោកបានអះអាងថា ខ្លួនគាំទ្រវប្បធម៌ធ្វើការ ១២ម៉ោងក្នុងមួយថ្ងៃ ក្នុងវិស័យបច្ចេកវិទ្យារបស់ប្រទេសចិន និងបានបន្តថា បុគ្គលិកដែលធ្វើការបានច្រើនម៉ោងនឹងទទួលបានរង្វាន់លើកទឹកចិត្ត ។
ស្ថាបនិកក្រុមហ៊ុន Alibaba រូបនេះបានបង្ហាញការគាំទ្រនឹងវប្បធម៌ការងារ៩៩៦ របស់ប្រទេសចិនដែលមានន័យថា ធ្វើការពីម៉ោង៩ព្រឹកដល់៩យប់ ៦ថ្ងៃក្នុងមួយសប្តាហ៍ដែលភាគច្រើនអាចមើលឃើញក្នុងក្រុមហ៊ុនបច្ចេកវិទ្យា និងក្រុមហ៊ុន Start-up ។
មនុស្សជាច្រើនបានឆ្លើយតបនឹងការចែករំលែកមតិរបស់លោកលើប្រព័ន្ធសង្គមចិនដោយបាននិយាយថាវប្បធម៌នេះមើលរំលងមនុស្សចាស់ដែលត្រូវការកូនៗកំដរនៅផ្ទះជាដើម។
ប៉ុន្តែអ្វីដែលលោកម៉ាបានគាំទ្រមិនមានគោលដៅការពារការធ្វើការច្រើនម៉ោងទេ តែលោកគ្រាន់តែចង់ឲ្យមានការលើកទឹកចិត្តដល់បុគ្គលិកដែលធ្វើដូច្នេះ។
លោកបានបកស្រាយបញ្ជាក់យ៉ាងដូច្នេះថា «វប្បធម៌ ៩៩៦ ពិតប្រាកដមិនមែនគ្រាន់តែជាការធ្វើការថែមម៉ោងទេ»។ លោកបានបន្ថែមទៀតថា មនុស្សគ្រប់រូបមានសិទ្ធិក្នុងការជ្រើសរើសការរស់នៅរៀងៗខ្លួន ប៉ុន្តែអ្នកដែលធ្វើការតិចម៉ោងនឹងមិនអាចមានសុភមង្គល និងទទួលបានរង្វាន់លើកទឹកចិត្តឡើយ។ សម្រាប់ខ្លួនលោកផ្ទាល់ក៏លោកមិនដែលស្តាយក្រោយនឹងការធ្វើការ១២ម៉ោងក្នុងមួយថ្ងៃដែរ។ ផ្ទុយមកវិញ លោកពិតជាពេញចិត្តនឹងវប្បធម៌នេះណាស់ និងចោទជាសំណួរថា «តើអ្នកអាចសម្រេចបានជោគជ័យយ៉ាងណាប្រសិនបើអ្នកមិនចំណាយកម្លាំងនិងពេលវេលាបន្ថែម0x017d7»
ជាមួយគ្នានេះផងដែរ លោកបានបន្ថែមថា បុគ្គលិកដែលមានសក្តានុពលនៅ Alibaba គួរតែត្រៀមខ្លួនក្នុងការធ្វើការ ១២ម៉ោងក្នុងមួយថ្ងៃប្រសិនបើពួកគេចង់ជោគជ័យ ព្រោះលោកមិនខ្វះទេអ្នកដែលមានសមត្ថភាពធ្វើការត្រឹមតែ៨ម៉ោង។
អ្នកដឹកនាំធំៗក្នុងប្រទេសចិនដទៃក៏បានគាំទ្រនឹងវប្បធម៌ការងារនេះដែរដូចជាស្ថាបនិកក្រុមហ៊ុន JD.com ដែលជាដៃគូប្រកួតប្រជែងរបស់លោកម៉ាជាដើម។ ក្រៅពីក្នុងប្រទេសចិនហើយ អ្នកដឹកនាំក្នុងវិស័យបច្ចេកវិទ្យាដូចជាលោក អេឡុន ម៉ាស (Elon Musk) បាននិយាយថាលោកធ្វើការដល់ទៅ ១២០ម៉ោងឯណោះក្នុងមួយសប្តាហ៍ពេលដែលក្រុមហ៊ុនជួបនឹងបញ្ហា ៕ កែសម្រួលដោយ ៖ សុឃាក់
ចែករំលែកព័តមាននេះ