ខេត្តស្ទឹងត្រែង ៖ សេចក្តីរាយការណ៍បឋមបានឲ្យដឹងថា ទេសចរជាង៥ម៉ឺននាក់ បានទៅទស្សនាកម្សាន្តពិធីបុណ្យប្រណាំងទូកងនៅ ទន្លេសេកុង ខេត្តស្ទឹងត្រែង ដើម្បីអបអរសាទព្រះរាជពិធីបុណ្យអុំទូក អកអំបុក សំពះព្រះខែ នាថ្ងៃខាងមុខនេះ ។
រដ្ឋបាលខេត្តស្ទឹងត្រែងផ្តួចផ្តើមដោយលោក ម៉ុម សាររឿន អភិបាលនៃគណៈ អភិបាលខេត្តស្ទឹងត្រែងរៀបចំប្រារព្ធពិធីប្រណាំងទូកងចំណុះ២២នាក់ ដែលបាន ចូលរួមប្រណាំងមកពីតាមមន្ទីរអង្គភាពជុំវិញខេត្តស្ទឹងត្រែង និងមកពីស្រុកទាំង៥ និងក្រុង១ គឺមានរយៈពេល២ថ្ងៃ គឺនៅថ្ងៃទី០១ និងថ្ងៃទី០២ ខែវិច្ឆិកានេះ នៅលើផ្ទៃទឹកទន្លេសេកុង ក្រុងស្ទឹងត្រែង ដើម្បីអបអរសាទព្រះរាជពិធីបុណ្យអុំទូក អកអំបុក សំពះព្រះខែ ដែលនឹងប្រព្រឹត្តទៅនៅថ្ងៃទី១០, ១១, ១២ ខែវិច្ឆិកាខាងមុខនេះ ។
ភ្ញៀវទេសចរបានចូលមកកម្សាន្តសប្បាយ និងទស្សនាពិធីប្រណាំងទូក ងនៅខេត្តស្ទឹងត្រែងលើសពីការរំពឹងទុកដែលមន្ទីរទេសចរណ៍ខេត្តទស្សន៍ទាយថា នឹងមានអ្នកមកទស្សនាកម្សាន្តត្រឹមតែជាង៣ម៉ឺននាក់ប៉ុណ្ណោះ តែផ្ទុយទៅវិញ មានការកើនឡើងរហូតជាង៥ម៉ឺននាក់ ។ នេះជាឆ្នាំទី៣ នៃខេត្តស្ទឹងត្រែងដែលប្រារព្ធពិធីអុំទូកតាមបែបប្រពៃណី ដើម្បីបង្កលក្ខណៈ ផ្តល់ភាពសប្បាយរីករាយជូនប្រជាពលរដ្ឋក៏ដូចជា ប្រជាកសិកររួចរាល់ពីការធ្វើចំការស្រែ បានមកទស្សនាកម្សាន្តលំហែកាយសប្បាយក្នុងអារម្មណ៍ ។
ក្នុងឱកាសនៃពិធីអុំទូកដែលប្រារព្ធឡើងនៅក្រុងស្ទឹងត្រែង គឺសង្កេតឃើញ ប្រជាពលរដ្ឋបានចូលរួមទស្សនាការប្រណាំងទូកផង និងទិញទំនិញសម្ភារៈនានា នៅកន្លែងតាំងពិព័រណ៍រៀបចំឡើងដោយរដ្ឋបាលខេត្តស្ទឹងត្រែង ។
កម្លាំងប្រដាប់អាវុធទាំង៣ប្រភេទដើរល្បាតការពារសន្តិសុខនៅចំណុចទីតាំង ប្រារព្ធពីធីបុណ្យទទួលបានជោគជ័យដោយរក្សាបានសុខសុវត្ថិភាពជូនប្រជាពលរដ្ឋ ជាទេសចររាប់ម៉ឺននាក់ ឈរ អង្គុយ តាមច្រាំងទន្លេ សេកុង គយគន យ៉ាងជក់ចិត្តទៅលើទូក ង ប្រណាំងបង្អួតរាងលើផ្ទៃទឹកពិតជាសប្បាយក្រៃលែង ទោះបីព្រះអាទិត្យខំប្រឹងបញ្ជេញ ពន្លឺយ៉ាងណាក្តីក៏ក្រុមប្រជាពលរដ្ឋនៅតែបន្តទស្សនារហូតដល់ទីបញ្ចប់នៃការប្រណាំងទូក ដែលប្រព្រឹត្តទៅយ៉ាងអធិកអធម ។
លោក សុវណ្ណ ពិសេដ្ឋ អភិបាលស្រុកសេសានបានឱ្យដឹងថា ឆ្នាំនេះទោះបីប្រជាកសិករ ខ្លះមមាញឹកបោកបែនស្រូវយ៉ាងណាក៏ដោយនៅតែឆ្លៀតពេលមកទស្សនាពិធី ប្រណាំងទូកនេះដែរ ព្រោះជាពិធីតាមបែបប្រពៃណីខ្មែរ ហើយប្រជាពលរដ្ឋនៅស្រុក សេសានមកទស្សនា និងគាំទ្រទូកងមកពីស្រុកសេសានចំនួន២ទូកចូលរួមប្រលង ប្រណាំងជាមួយទូក ង ផ្សេងៗទៀត ៕ កែសម្រួលដោយ ៖ សុឃាក់
ចែករំលែកព័តមាននេះ