ក្រុងហុងកុង ៖ ការប៉ះទង្គិចគ្នានានាកើតមានកាលពីថ្ងៃទី៣១តុលានៅហុងកុង រវាងកងកម្លាំងប៉ូលិសនិងពួកបាតុករស្និទ្ធលទ្ធិប្រជាធិបតេយ្យដែលនាំគ្នាដើរហែក្បួនសម្រាប់បុណ្យHALLOWEEN ជាមួយការពាក់ម៉ាស់HALLOWEENបិទមុខ។
ចលនាតវ៉ានៅហុងកុងដែលហាក់គ្មានមេដឹកនាំពិតប្រាកដ បានលើកទឹកចិត្តពួកបាតុករឲ្យពាក់ម៉ាស់HALLOWEENជាបុណ្យដ៏មានប្រជាប្រិយបំផុតមួយ ក្នុងដែនដីអតីតអាណានិគមអង់គ្លេសនោះ ក៏ទោះបីមានការព្រមានបករបាំងមុខទាំងនោះចេញ ក្នុងនាមនៃការហាមឃាត់មិនឲ្យមានការបិទមុខក្ដី។
ទោះបីយ៉ាងណាការប្រមូលផ្ដុំមនុស្សជាក្រុមតូចៗ កើតមាននាថ្ងៃទី៣១តុលាខណៈហុងកុងឆ្លងកាត់ចាប់តាំងពីខែមិថុនាមក វិបត្តិនយោបាយដ៏អាក្រក់បំផុត ចាប់តាំងពីការប្រគល់ដែនដីនោះឲ្យចិនវិញពីឆ្នាំ១៩៩៧ ជាមួយបាតុកម្មនិងសកម្មភាពនានាស្ទើររាល់ថ្ងៃ ដើម្បីបរិហារការស្រុតចុះនៃសេរីភាពនិងការជ្រៀតជ្រែកកាន់តែខ្លាំងរបស់ចិន ចូលកិច្ចការផ្ទៃក្នុងនៃតំបន់ពាក់កណ្ដាលស្វយ័តនោះ។
ដោយសារវិបត្តិនោះដែលចេះតែអូសបន្លាយពេកយូរ នាំឲ្យហុងកុងជួបប្រទះនឹងត្រីមាសទី៣នៃការស្រុតចុះខាងសេដ្ឋកិច្ច ដែលបែបនេះជាលើកដំបូងចាប់តាំងពីវិបត្តិហិរញ្ញវត្ថុឆ្នាំ២០០៨មក។ ផលទុនជាតិសរុបរបស់ហុងកុងបានធ្លាក់ចុះ៣,២%ក្នុងត្រីមាសទី៣ បន្ទាប់ពីស្រុតចុះ០,៤%ក្នុង៣ខែមុននេះ។
ថ្ងៃទី៣១តុលានៅឧទ្យានវិកតូរៀរបាតុករប្រមាណជា១០០នាក់ភាគច្រើនពាក់ម៉ាស់បិទមុខ បានប្រមូលផ្ដុំគ្នាដើម្បីហែក្បួនទៅកាន់សង្កាត់មួយដែលសម្បួរដោយក្លឹបរាត្រី។ ក្នុងសង្កាត់PRINCE EDWARDមានការប៉ះទង្គិចគ្នាដោយប៉ូលិសបាញ់ឧស្ម័នបង្ហូរទឹកភ្នែកទៅលើពួកបាតុករ៕ (កែសម្រួលដោយ ៖ បុប្ផា)
ចែករំលែកព័តមាននេះ