ទីក្រុងម៉ាឌ្រីត៖ អេស្ប៉ាញប្រកាសបិទដែនអាកាសរបស់ខ្លួនមិនអនុញ្ញាតឱ្យយន្តហោះចម្បាំងរបស់អាមេរិកបើកឆ្លងកាត់បានឡើយប្រសិនបើយន្តហោះទាំងនោះចូលរួមនៅក្នុងយុទ្ធនាការវាយប្រហារអ៊ីរ៉ង់។ កាលពីមុននេះ អេស្ប៉ាញត្រឹមតែមិនអនុញ្ញាតឱ្យអាមេរិកប្រើប្រាស់មូលដ្ឋានយោធារបស់ខ្លួនប៉ុណ្ណោះ។ ដូច្នេះការប្រកាសរបស់អេស្ប៉ាញលើកចុងក្រោយនេះមានន័យថាអេស្ប៉ាញបានឈានមួយជំហានបន្ថែមពីលើគោលជំហររបស់ខ្លួនពីមុន។ នេះបើយោងតាមការថ្លែងរបស់រដ្ឋមន្ត្រីការពារជាតិអេស្ប៉ាញ លោកស្រីម៉ាហ្ការីតា រ៉ូប្លេស (Margarita Robles)។
លោកស្រីថ្លែងប្រាប់អ្នកសារព័ត៌មានថាយើងមិនអនុញ្ញាតឱ្យប្រើប្រាស់មូលដ្ឋានយោធារបស់យើង ឬដែនអាកាសរបស់យើងដើម្បីចូលរួមនៅក្នុងសកម្មភាពនានាពាក់ព័ន្ធនឹងសង្គ្រាមអ៊ីរ៉ង់ជាដាច់ខាត។ សារព័ត៌មានអែលប៉ាអ៊ីស (El Pais) របស់អេស្ប៉ាញបានចុះផ្សាយដំណឹងនេះដំបូងគេដោយដកស្រង់ប្រភពពីមន្ត្រីយោធាដែលស្នើសុំមិនបញ្ចេញឈ្មោះ។ ដោយសារការបិទដែនអាកាសយ៉ាងដូច្នេះ យន្តហោះយោធាដែលចង់ហោះទៅកាន់គោលដៅរបស់ខ្លួននៅមជ្ឈិមបូព៌ាត្រូវតែបង្ខំចិត្តហោះផ្លូវផ្សេងពីអេស្ប៉ាញក្នុងនាមជាសមាជិកអង្គការណាតូជាមួយអាមេរិកដូចគ្នា។ ប៉ុន្តែអេស្ប៉ាញក៏មានករណីលើកលែងខ្លះដែរសម្រាប់ការហោះហើរឆ្លងកាត់ដែនអាកាសរបស់ខ្លួននៅក្នុងស្ថានភាពអាសន្ន។ នេះបើយោងតាមការផ្សាយរបស់សារព័ត៌មានអែលប៉ាអ៊ីស។
ការបិទដែនអាកាសនេះជាផ្នែកមួយនៃចេតនារបស់រដ្ឋាភិបាលអេស្ប៉ាញដែលមិនចង់ពាក់ព័ន្ធនឹងសង្គ្រាមអ៊ីរ៉ង់ព្រោះអាមេរិកធ្វើសង្គ្រាមនេះដោយគ្មានសួរយោបល់អ្នកណាទាំងអស់ ហើយជាទង្វើខុសច្បាប់អន្តរជាតិទៅទៀត។ ខាងលើនេះជាការថ្លែងរបស់រដ្ឋមន្ត្រីសេដ្ឋកិច្ចអេស្ប៉ាញ លោកកាឡូស គូអេប៉ូ (Carlos Cuerpo) ឆ្លើយតបទៅអ្នកសារព័ត៌មានដែលសួរថា «តើអេស្ប៉ាញមិនបារម្ភទេថាបើបិទដែនអាកាសដូច្នេះអាចធ្វើឱ្យប៉ះពាល់ទំនាក់ទំនងអាមេរិក-អេស្ប៉ាញ?»
នាយករដ្ឋមន្ត្រីអេស្ប៉ាញ លោកប៉េដ្រូ សាន់ឆេស (Pedro Sanchez) តែងតែប្រឆាំងជំទាស់នឹងប្រតិបត្តិការរបស់អាមេរិក និងអ៊ីស្រាអែលនៅក្នុងសង្គ្រាមអ៊ីរ៉ង់តាំងពីដើមរៀងមក។ លោកចាត់ទុកថាពួកគេប្រព្រឹត្តទង្វើខ្ជីខ្ជា និងខុសច្បាប់។ តាំងពីពេលអេស្ប៉ាញប្រកាសមិនអនុញ្ញាតឱ្យអាមេរិកប្រើប្រាស់មូលដ្ឋានរបស់ខ្លួនដើម្បីវាយប្រហារអ៊ីរ៉ង់ លោកត្រាំបានព្រមានកាត់ផ្ដាច់ទំនាក់ទំនងពាណិជ្ជកម្មជាមួយអេស្ប៉ាញរួចទៅហើយ។ ដូច្នេះ បន្ទាប់ពីអេស្ប៉ាញបិទខ្ទប់ដែនអាកាសថែមទៀត គេមិនទាន់ដឹងថាតើលោកត្រាំនឹងឆ្លើយតបបែបណាទេ៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ