ទីក្រុងវ៉ាស៊ីនតោន៖ លោកដូណាល់ត្រាំឱ្យតម្រុយថាលោកផ្លាស់ប្ដូរជំហរវិញហើយពាក់ព័ន្ធនឹងការបិទខ្ទប់ប្រេងមិនឱ្យដឹកចូលប្រទេសគុយបា។ មានន័យថាលោកនឹងអនុញ្ញាតឱ្យកប៉ាល់ដឹកប្រេងរបស់រុស្ស៊ីអាចបើកចូលដែនសមុទ្រគុយបាដើម្បីផ្ដល់ការផ្គត់ផ្គង់សម្រាប់ប្រទេសនៅសមុទ្រការីប៊ីនមួយនេះ។ លោកត្រាំថ្លែងកាលពីយប់មិញថាលោកមិនយល់ទាស់ទេប្រសិនបើប្រទេសណាមួយដឹកប្រេងឆៅចូលគុយបា។ ការថ្លែងដូច្នេះចំពេលដែលគេឃើញកប៉ាល់ដឹកប្រេងរបស់រុស្ស៊ីបើកទៅកៀកកំពង់ផែគុយបា។ ប្រទេសនេះកំពុងត្រូវការប្រេងយ៉ាងខ្លាំងដើម្បីដំណើរការរោងចក្រអគ្គិសនីជាពិសេស។
យោងតាមទិន្នន័យដែលតាមដានការដឹកជញ្ជូនតាមកប៉ាល់ គេឃើញកប៉ាល់ដឹកប្រេងរបស់រុស្ស៊ីដែលធ្លាប់តែជាប់ទណ្ឌកម្មសេដ្ឋកិច្ចរបស់អាមេរិកនោះស្ថិតនៅក្បែរឆ្នេរសមុទ្រគុយបាកាលពីថ្ងៃអាទិត្យ។ គេរំពឹងថាកប៉ាល់នោះនឹងបើកទៅដល់កំពង់ផែនៅថ្ងៃចន្ទនេះ។ នេះគឺជាការជួយស្រោចស្រង់ប្រទេសគុយបាឱ្យមានដង្ហើមដកបានស្រួលឡើងវិញខណៈដែលប្រទេសនេះស្ទើរតែដួលរលំបះជើងដោយសារអាមេរិកបិទខ្ទប់ប្រេងឆៅ។
ក្រោយការផ្ដួលរំលំលោកម៉ាឌូរ៉ូពីអំណាចកាលពីថ្ងៃទី៣ ខែមករា រាល់ការផ្គត់ផ្គង់ប្រេងឆៅដែលវេណេហ្ស៊ូអេឡាធ្លាប់ធ្វើសម្រាប់គុយបាត្រូវអាមេរិកកាត់ផ្ដាច់ទាំងស្រុង។ មិនតែប៉ុណ្ណោះ លោកត្រាំព្រមានប្រើធម៌ក្ដៅទៅលើប្រទេសទាំងឡាយណាដែលហ៊ានដឹកប្រេងឆៅចូលគុយបា។ ក្រោយមក ប្រទេសម៉ិកស៊ីកូដែលធ្លាប់ផ្គត់ផ្គង់ប្រេងលំដាប់ទី២ទៅឱ្យគុយបា (បន្ទាប់ពីវេណេហ្ស៊ូអេឡា) ក៏លែងហ៊ានដឹកប្រេងទៅទីនោះតទៅទៀតដែរ។
ដោយហេតុនេះហើយ គ្មានកប៉ាល់ដឹកប្រេងណាមួយហ៊ានបើកចូលដែនសមុទ្រគុយបាឡើយអស់រយៈពេលជិតបីខែកន្លងទៅនេះ ។ នេះបើយោងតាមប្រធានាធិបតីគុយបា លោកមីហ្គែល ឌីយ៉ាស់ ខានែល (Miguel Diaz-Canel)។ គុយបានៅពេលនេះកំពុងតែកើតមានវិបត្តិថាមពលធ្ងន់ធ្ងរ។ ពេលខ្លះដាច់ភ្លើងអគ្គិសនីទូទាំងប្រទេស។ មន្ត្រីបម្រើការនៅក្រសួងសុខាភិបាលគុយបាអះអាងថាវិបត្តិនេះធ្វើឱ្យគុយបាមានអត្រាមរណភាពហក់ឡើងខ្ពស់នៅក្នុងចំណោមអ្នកជំងឺមហារីក។
ថ្លែងនៅចំពោះមុខអ្នកសារព័ត៌មាន លោកត្រាំសម្ដែងការអាណិតអាសូរចំពោះប្រជាជនគុយបាដែលត្រូវការថាមពល (ប្រេង, ឧស្ម័ន) ជាចាំបាច់។ លោកថាលោកលែងប្រកាន់តទៅទៀតហើយ ទោះបីប្រទេសណាចង់ដឹកប្រេងទៅគុយបាក៏បានដែរព្រោះគុយបាយូរឬឆាប់គង់តែដួលរលំជាមិនខាន។ លោកថាបើប្រទេសណាចង់ដឹកប្រេងឆៅចូលគុយបាក៏ដឹកទៅ មិនថាប្រទេសរុស្ស៊ី ឬប្រទេសណាផ្សេងឡើយ។ គុយបាដើរដល់ទីបញ្ចប់ហើយ។ ពួកគេមានរបបដឹកនាំអាក្រក់។ ពួកគេមានថ្នាក់ដឹកនាំដែលអន់បំផុត និងប្រព្រឹត្តអំពើពុករលួយ។ ដូច្នេះ ទោះបីពួកគេទទួលបានប្រេងឆៅមួយកប៉ាល់ក៏ដោយ ក៏មិនអាចជួយពួកគេបានប៉ុន្មានដែរ៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ