លោក ត្រាំ និយាយត្រង់ៗចង់បានប្រេងអ៊ីរ៉ង់ និងពិចារណាដណ្តើមកាន់កា.ប់កោះប្រេងដ៏សំខាន់ប្រទេសនេះ
សហរដ្ឋអាមេរិក ៖ នៅក្នុងបទសម្ភាសន៍ជាមួយនឹងកាសែតចក្រភពអង់គ្លេស Financial Times លោកប្រធានាធិបតី ដូណាល់ ត្រាំ (Donald Trump)…
សហរដ្ឋអាមេរិក ៖ នៅក្នុងបទសម្ភាសន៍ជាមួយនឹងកាសែតចក្រភពអង់គ្លេស Financial Times លោកប្រធានាធិបតី ដូណាល់ ត្រាំ (Donald Trump) បានលើកឡើងពីការរំពឹងទុកថា សហរដ្ឋអាមេរិកចង់បានប្រេងរបស់អ៊ីរ៉ង់ ដោយលោកបានបន្ថែមថា លោកនៅតែពិចារណាដណ្តើមកាន់កាប់កោះ Kharg ដែលជាមជ្ឈមណ្ឌលប្រេងដ៏សំខាន់របស់អ៊ីរ៉ង់។ នេះបើតាមប្រភពពី CNN និង BBC ចេញផ្សាយនៅថ្ងៃទី៣០ ខែមីនា ឆ្នាំ២០២៦។
លោកប្រធានាធិបតី ត្រាំ បានបញ្ជាក់ដូច្នេះថា «និយាយឱ្យស្មោះត្រង់ទៅ រឿងដែលខ្ញុំចូលចិត្តជាងគេគឺយកប្រេងនៅអ៊ីរ៉ង់ ប៉ុន្តែមនុស្សល្ងង់មួយចំនួននៅអាមេរិកនិយាយថា ហេតុអ្វីបានជាអ្នកធ្វើបែបនោះ?»។ លោកបន្តថា «ប្រហែលជាយើងដណ្តើមកាន់កាប់កោះ Kharg ឬក៏ប្រហែលជាយើងមិនធ្វើនោះទេ។ យើងមានជម្រើសច្រើន ហើយវាក៏មានន័យថា យើងត្រូវនៅទីនោះ (កោះ Kharg) មួយរយៈ»។
នៅពេលសួរអំពីការការពាររបស់អ៊ីរ៉ង់លើកោះ Kharg លោក ត្រាំ បានបន្ថែមថា «ខ្ញុំមិនគិតថា ពួកគេអាចការពារបានទេ។ យើងអាចដណ្តើមយកវាបានយ៉ាងងាយស្រួល»។
ការអត្ថាធិប្បាយរបស់ប្រធានាធិបតីបានកើតឡើង នៅពេលដែលកងទ័ពអាមេរិកចំនួន ៣ ៥០០នាក់បន្ថែមទៀតបានទៅដល់មជ្ឈិមបូព៌ា ដោយបង្កើតការភ័យខ្លាចបន្ថែមទៀតអំពីការកើនឡើងកម្តៅកាន់តែខ្លាំងរវាងកងកម្លាំងអាមេរិកប្រឈមមុខនឹងការវាយប្រហាររបស់អ៊ីរ៉ង់។ លោក ត្រាំ ក៏បានបន្ថែមថា ការចរចាដោយប្រយោលរវាងអាមេរិក និងអ៊ីរ៉ង់តាមរយៈអ្នកតំណាងប៉ាគីស្ថានកំពុងតែដំណើរការទៅដោយរលូន ប៉ុន្តែបានបដិសេធធ្វើអត្ថាធិប្បាយលើថា តើកិច្ចព្រមព្រៀងបទឈប់បាញ់អាចសម្រេចបានក្នុងពេលឆាប់ៗនេះដែរឬទេ?
តម្លៃប្រេងអន្តរជាតិបានកើនឡើងជិត ១១៥ ដុល្លារក្នុង១បារ៉ែល នៅថ្ងៃទី៣០ ខែមីនា ឆ្នាំ២០២៦ ខណៈជម្លោះមជ្ឈិមបូព៌ានៅតែបន្តឥតស្រាក់ស្រាន្ត។ តម្លៃប្រេងឆៅប្រភេទ Brent ឡើងដល់ ១១៥,៨៤ ដុល្លារ ដែលជាការកើនឡើង ២,៩% បើធៀបនឹងការជួញដូរនៅប្រហែល ៧២ ដុល្លារក្នុង១បារ៉ែល មុនថ្ងៃទី ២៨ ខែកុម្ភៈ នៅពេលដែលការវាយប្រហាររបស់សហរដ្ឋអាមេរិក និងអ៊ីស្រាអែលគ្រប់ដណ្តប់លើអ៊ីរ៉ង់បានចាប់ផ្តើម។ តម្លៃបានឡើងដល់កំពូល ១១៨ ដុល្លារក្នុង១បារ៉ែល កាលពីថ្ងៃទី ១៩ ខែមីនា ហើយគិតត្រឹមរសៀលថ្ងៃទី២៧ ខែមីនា តម្លៃស្ថិតក្រោម ១១២ ដុល្លារបន្តិចក្នុង១បារ៉ែល៕
ចែករំលែកព័តមាននេះ