រាជធានីភ្នំពេញ ៖ នារីម្នាក់ហេតុតែចង់បញ្ចេញឥទ្ធិពលឲ្យអ្នកដទៃខ្លាច និងដើម្បីទាញយកប្រយោជន៍ផ្សេងៗពីឯកសណ្ឋាននេះ ណាមួយចង់ធ្វើជាមន្ត្រីនគរបាលជាតិផងនោះ នាងពុំបានទៅដាក់ពាក្យប្រឡងត្រឹមត្រូវតាមច្បាប់នោះទេ ។ ផ្ទុយទៅវិញនាងបែរជាលេងផ្លូវកាត់ដោយចំណាយប្រាក់ជាង១០០ដុល្លារទៅទិញឯកសណ្ឋាននគរបាលជាតិមានឈុតសម្លៀកបំពាក់ ស័ក្ដិ ផ្លាកឈ្មោះជាដើម…
រាជធានីភ្នំពេញ ៖ នារីម្នាក់ហេតុតែចង់បញ្ចេញឥទ្ធិពលឲ្យអ្នកដទៃខ្លាច និងដើម្បីទាញយកប្រយោជន៍ផ្សេងៗពីឯកសណ្ឋាននេះ ណាមួយចង់ធ្វើជាមន្ត្រីនគរបាលជាតិផងនោះ នាងពុំបានទៅដាក់ពាក្យប្រឡងត្រឹមត្រូវតាមច្បាប់នោះទេ ។
ផ្ទុយទៅវិញនាងបែរជាលេងផ្លូវកាត់ដោយចំណាយប្រាក់ជាង១០០ដុល្លារទៅទិញឯកសណ្ឋាននគរបាលជាតិមានឈុតសម្លៀកបំពាក់ ស័ក្ដិ ផ្លាកឈ្មោះជាដើម ពីផ្សារទឹកថ្លា យកមកស្លៀកពាក់ហ៊ឺហា ព្រមទាំងសៀតកាំភ្លើងខ្លីជ័រ១ដើមសម្ញែងមហាជនទៀតផង ។ ដោយសារតែដឹងច្បាស់ថា នាងម្នាក់នោះពុំមែនជាមន្ត្រីផង ប៉ុន្តែបែរជាស្លៀកឯកសណ្ឋាននគរបាលបែបនេះ ក៏ត្រូវបានមហាជនរាយការណ៍ជូនកម្លាំងនគរបាលខណ្ឌកំបូលឲ្យចុះទៅធ្វើការឃាត់ខ្លួន រួចនាំទៅសាកសួរ និងកសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់ ។
ការឃាត់ខ្លួននោះបានធ្វើឡើងកាលពីវេលាម៉ោង១០និង៣០នាទីព្រឹកថ្ងៃទី៩ ខែឧសភា ឆ្នាំ២០២៦ នៅចំណុចបុរី លី រ៉ានី ភូមិព្រៃតាកែ សង្កាត់បឹងធំ ខណ្ឌកំបូល រាជធានីភ្នំពេញ ។ នារីម្នាក់នោះឈ្មោះ ង៉ែត ចាន់យ៉ា អាយុ២១ឆ្នាំ គ្មានមុខរបរនោះទេឆ្លងកាត់ការធ្វើតេស្តទឹកនោមរកមិនឃើញមានសារធាតុញៀនឡើយបច្ចុប្បន្ននាងមានទីលំនៅក្នុងភូមិខាងលើ ។ នគរបាលបានកសាងសំណុំរឿងចោទប្រកាន់រូបនាងពីបទប្រើប្រាស់នូវឯកសណ្ឋានជាអាទិ៍ ដែលមានភាពប្រហាក់ប្រហែលគ្នា និងនគរបាល ឬយោធា ។
ក្រោយពេលឃាត់ខ្លួននគរបាលដកហូតបានឯកសណ្ឋាននគរបាលជាតិ២កំប្លេរ ចំណែកឯកាំភ្លើងខ្លីជ័រដែលមហាជនអះអាងថាបានឃើញនាងសៀតនៅចង្កេះកាលពីប៉ុន្មានថ្ងៃមុននោះរកមិនឃើញនោះឡើយនេះបើតាមការប្រាប់ឲ្យដឹងពីនគរបាលខណ្ឌកំបូល ។
មន្ត្រីនគរបាលបានប្រាប់ឲ្យដឹងបន្តទៀតថា កាលពីថ្ងៃទី២៩ ខែមេសា ឆ្នាំ២០២៦ វេលាម៉ោងប្រហែល៨និង៣០នាទីព្រឹក នាងម្នាក់នោះបានទៅផ្សារទឹកថ្លាខណ្ឌសែនសុខ រាជធានីភ្នំពេញ រួចបានទិញឯកសណ្ឋាននគរបាលជាតិពណ៌ទឹកដោះគោ (ខោអាវការងារ) ១កំប្លេ ពាក់អត្តលេខ៨៨០០៧ អត្តលេខនេះបានជាន់គ្នាជាមួយថ្នាក់ដឹកនាំ ។ ស័ក្ដិ៥១គូ និងឯកសណ្ឋាននគរបាលប្រយុទ្ធ ១កំប្លេរ ប៉ាក់ផ្លាកឈ្មោះ ង៉ែត ចន្យា អត្តលេខ៨៨០០៧ ក្នុងតម្លៃ១០៥ដុល្លាអាមេរិក បន្ទាប់មកបានយកមកស្លៀកពាក់ ។
នគរបាលបានប្រាប់ឲ្យដឹងបន្ថែមទៀតថា ខណៈនោះមហាជនក៏បានឃើញនាងសៀតកាំភ្លើងខ្លីជ័រ១ដើមនៅនឹងចង្កេះទៀតផង សម្ញែងដាក់គេឯងគ្រប់គ្នាធ្វើដូចខ្លូនឯងជាមន្ត្រីនគរបាលពិតៗអុីចឹង ដោយនាងស្មានថាការក្លែងខ្លួនជាមន្ត្រីនគរបាលបែបនេះគ្មានអ្នកដឹង ។
លុះដល់ព្រឹកថ្ងៃទី៩ ខែឧសភា ឆ្នាំ២០២៦ មហាជនក៏បានរាយការណ៍ប្រាប់ឲ្យកម្លាំងប៉ុស្តិ៍នគរបាលរដ្ឋបាលបឹងធំនិងនគរបាលខណ្ឌកំបូលបានដឹង ហើយនគរបាលខាងលើក៏បានចុះទៅឃាត់ខ្លួននារីម្នាក់នោះនាំទៅធ្វើការសួរនាំនៅប៉ុស្ដិ៍ ។ ពេលនោះនាងបាននិយាយថា ព្រោះតែចង់បានឥទ្ធិពលឲ្យគេខ្លាចញញើត និងដើម្បីទាញយកប្រយោជន៍ផ្សេងៗពីឯកសណ្ឋាននគរបាលជាតិនេះ (ប៉ុន្តែនាងពុំបានបញ្ជាក់ប្រយោជន៍អ្វីខ្លះទេ) ទើបនាងចំណាយប្រាក់ទៅទិញវាពីផ្សារទឹកថ្លា យកមកស្លៀកបែបនេះតែម្ដង ។
នគរបាលដដែលបានបញ្ជាក់ប្រាប់ថា ស្ត្រីរូបនេះចង់ធ្វើជាមន្ត្រីនគរបាលជាតិ ប៉ុន្តែកន្លងមកនាងពុំដែលមានប្រវត្តិទៅដាក់ពាក្យធ្វើជានគរបាលឡើយ ហើយក្នុងពេលក្លែងបន្លំជានគរបាលនារយៈពេលប៉ុន្មានថ្ងៃមកនេះ នាងពុំទាន់បានយកឥទ្ធិពលទៅដើរប្រព្រឹត្តបទល្មើសអ្វីមួយនៅឡើយទេ ។
ប៉ុន្តែការគ្រងឯកសណ្ឋាននគរបាលជាតិ ទាំងខ្លួនពុំមែនជានគរបាលបែបនេះ គឺជាទង្វើខុសច្បាប់ ហើយក្រោយពេលឃាត់ខ្លួននគរបាលក៏បានរង់ចាំមើលក្រែងមានប្រជាពលរដ្ឋណាម្នាក់ចាញ់បោកនាងទៅដាក់ពាក្យប្ដឹងដែរ ប៉ុន្តែរហូតមកដល់ថ្ងៃទី១០ ខែឧសភានេះពុំទាន់ឃើញមានអ្នកទៅប្ដឹងទេ ។
បច្ចុប្បន្នស្ត្រីក្លែងខ្លួនជានគរបាលរូបនោះកំពុងត្រូវបានឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌកំបូល ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញចាត់ការតាមនីតិវិធី ៕
ចែករំលែកព័តមាននេះ