ទីក្រុងតេអេរ៉ង់៖ កប៉ាល់ដឹកហ្គាសមួយគ្រឿងរបស់ប្រទេសកាតាបានធ្វើដំណើរឆ្លងកាត់ច្រកសមុទ្រហ័រម៉ូសនៅថ្ងៃនេះជាលើកដំបូងបំផុតចាប់តាំងពីសង្គ្រាមអ៊ីរ៉ង់ផ្ទុះឡើងកាលពីចុងខែកុម្ភៈ។ គោលដៅនៃនាវានេះគឺធ្វើដំណើរទៅប្រទេសប៉ាគីស្ថាន។ នៅក្នុងដំណាក់កាលនេះ អាមេរិកកំពុងរង់ចាំចម្លើយពីប្រទេសអ៊ីរ៉ង់បន្ទាប់ពីខ្លួនបានបញ្ជូនផែនការសន្តិភាព១៤ចំណុចទៅឱ្យអ៊ីរ៉ង់ពិនិត្យមើល។
បន្ទាប់ពីស្ងប់ស្ងាត់បានរយៈពេល៤៨ម៉ោងក្រោយការប៉ះទង្គិចគ្នាបន្តិចបន្តួចរវាងអាមេរិក និងអ៊ីរ៉ង់កាលពីសប្ដាហ៍មុន ប្រទេសគុយវែតចាប់បានសញ្ញាថាមានដ្រូនរបស់បច្ចាមិត្តជាច្រើនគ្រឿងហោះចូលដែនអាកាសរបស់ខ្លួនកាលពីព្រឹកមិញ។ នេះបើយោងតាមការបង្ហើបឱ្យដឹងពីអាជ្ញាធរ។ ទោះជាមានបញ្ហាអសកម្មខ្លះៗក្ដី កប៉ាល់ដឹកថាមពលរបស់ប្រទេសកាតាឈ្មោះអាល់ ខារ៉ាអ៊ីទីយ៉ាត់ (Al Kharaitiyat) អាចបើកចេញពីច្រកសមុទ្រហ័រម៉ូសដោយរលូនគ្មានបញ្ហាអ្វីទាំងអស់ និងតម្រង់ទិសដៅទៅរកកំពង់ផែកាស៊ីម (Qasim) ប្រទេសប៉ាគីស្ថាន។
ប្រភពខ្លះប្រាប់ថាការដឹកជញ្ជូនលើកនេះធ្វើឡើងដោយមានការអនុម័តយល់ព្រមពីប្រទេសអ៊ីរ៉ង់ដើម្បីកសាងទំនុកចិត្តគ្នាជាមួយប្រទេសកាតា និងប៉ាគីស្ថានដែលទាំង២ប្រទេសនេះដើរតួនាទីជាអ្នកសម្របសម្រួលការចរចាគ្នា។ អាជ្ញាធរអ៊ីរ៉ង់ថ្លែងថាកប៉ាល់ដឹកទំនិញទាំងឡាយណាដែលអនុវត្តតាមវិធានការដាក់ទណ្ឌកម្មរបស់អាមេរិកប្រឆាំងអ៊ីរ៉ង់នឹងមានបញ្ហាប្រសិនបើពួកគេចង់ឆ្លងកាត់ច្រកសមុទ្រហ័រម៉ូស។ នេះបើយោងតាមការផ្សាយរបស់ទីភ្នាក់ងារព័ត៌មានអ៊ីរ៉ង់ថាស់នីម (Tasnim)។
អាមេរិកនៅតែទន្ទឹងរង់ចាំចម្លើយពីអ៊ីរ៉ង់ចំពោះផែនការសន្តិភាពដែលខ្លួនបានបញ្ជូនទៅ។ បន្ទាប់មក ភាគីទាំង២អាចឈានដល់ការជជែកគ្នាពាក់ព័ន្ធនឹងបញ្ហាសំខាន់ៗជាច្រើន។ ក្នុងនោះក៏មានបញ្ហាពាក់ព័ន្ធនឹងកម្មវិធីនុយក្លេអ៊ែររបស់អ៊ីរ៉ង់ផងដែរ។ លោកស្រីម៉ាហ្គោ អាដាត (Margot Haddad) ជាអ្នករាយការណ៍ព័ត៌មានរបស់ប្រព័ន្ធផ្សព្វផ្សាយបារាំង។ យោងតាមលោកស្រីម៉ាហ្គោ អាដាត លោកដូណាល់ត្រាំនៅតែរំពឹងថានឹងទទួលបានចម្លើយពីអ៊ីរ៉ង់នាពេលឆាប់ៗបំផុត៕ ប្រភព៖ អារ៉ាប់ញូស៍ (Arab News) និងប្រភពដទៃទៀត
ចែករំលែកព័តមាននេះ