ទីក្រុងវ៉ាស៊ីនតោន៖ អាមេរិកប្រកាសថាខ្លួនត្រៀមវាយប្រហារអ៊ីរ៉ង់ជាថ្មីប្រសិនបើភាគីទាំងសងខាងមិនអាចសម្រេចបានកិច្ចព្រមព្រៀងនោះទេ។ ខាងលើនេះជាប្រសាសន៍របស់រដ្ឋមន្ត្រីការពារជាតិអាមេរិកលោកភីតហេកសិត។ លោកថ្លែងដូច្នេះនៅពេលក្រុមអ្នកចរចាមកពីទីក្រុងវ៉ាស៊ីនតោន និងទីក្រុងតេអេរ៉ង់កំពុងចរចាគ្នាដើម្បីដោះស្រាយបញ្ហាខ្វែងគំនិតគ្នាមួយចំនួនដែលរារាំងដល់ការព្រមព្រៀងគ្នា។ លោកហេកសិតព្រមានថាយើងនឹងវាយប្រហារជាថ្មីនៅក្នុងករណីចាំបាច់។
លោកថាអាវុធនៅក្នុងឃ្លាំងរបស់យើងមានច្រើនគ្រប់គ្រាន់លើសពីតម្រូវការ ហើយមិនត្រឹមតែប៉ុណ្ណឹងទេ យើងក៏មាននៅទីកន្លែងដទៃទៀតនៅទូទាំងសាកលលោកផងដែរ។ ហេតុនេះ យើងកំពុងស្ថិតនៅលើទីតាំងឈរជើងល្អណាស់។ នៅពេលថ្លែងសុន្ទរកថានៅឯវេទិកាសាំងគ្រីឡាដែលរៀបចំនៅសិង្ហបុរី លោកភីតហេកសិតបញ្ជាក់ជាថ្មីថាអាមេរិកមិនបានបោះបង់ចោលតំបន់អាស៊ី-ប៉ាស៊ីហ្វិចទេ ទោះបីខ្លួនកំពុងជាប់ដៃធ្វើសង្គ្រាមនៅអ៊ីរ៉ង់ក៏ដោយ។
លោកថ្លែងបន្តទៀតថាយើងអាចធ្វើរឿង២នៅក្នុងពេលតែមួយ។ យើងកំពុងបង្កើនសមត្ថភាពឱ្យបានខ្លាំងក្លានៅក្នុងវិស័យផលិតកម្មអាវុធដើម្បីឱ្យយើងអាចផលិតជាទម្រង់ស្វ័យគុណ គុណនឹង២ គុណនឹង៣ និងគុណនឹងបួននូវគ្រាប់រំសេវ។ ធ្វើដូច្នេះដើម្បីធានាថាផែនការប្រតិបត្តិការសឹករបស់យើងទទួលបានការជួយជ្រោមជ្រែង និងផ្គត់ផ្គង់បានទូទាំងសាកលលោក។ លោកអះអាងថាលោកត្រាំកំពុងរក្សាចិត្តអត់ធ្មត់ និងចង់សម្រេចឱ្យបានកិច្ចព្រមព្រៀងជាមួយគ្នាដែលធានាថាអ៊ីរ៉ង់នឹងមិនអាចមានអាវុធនុយក្លេអ៊ែរជាដាច់ខាត។
កាលពីថ្ងៃសុក្រ លោកត្រាំថ្លែងថាលោកនឹងជួបប្រជុំនៅក្នុងបន្ទប់សន្តិសុខនៃសេតវិមានដើម្បីសម្រេចជាលើកចុងក្រោយទៅលើសំណើនៃកិច្ចព្រមព្រៀងដើម្បីបញ្ចប់សង្គ្រាមអ៊ីរ៉ង់ និងដើម្បីបន្តសុពលភាពនៃបទឈប់បាញ់រយៈពេល៦០ថ្ងៃទៅមុខទៀត។ នៅអំឡុងពេល៦០ថ្ងៃនេះ ភាគីទាំង២អាចមានពេលចរចាគ្នាជាបន្តទៀតដើម្បីឱ្យមានកិច្ចព្រមព្រៀង។ សង្គ្រាមដែលផ្ទុះឡើងតាំងពីចុងខែកុម្ភៈនោះបានសម្លាប់មនុស្សរាប់ពាន់នាក់នៅអ៊ីរ៉ង់ និងលីបង់ និងធ្វើឱ្យសេដ្ឋកិច្ចពិភពលោករង្គោះរង្គើ៕ ប្រភព៖ Reuters
ចែករំលែកព័តមាននេះ