សិង្ហបុរី៖ រដ្ឋមន្ត្រីការពារជាតិជប៉ុនច្រានចោលការចោទប្រកាន់ដែលថាប្រទេសរបស់លោកចង់ងាកទៅរករបបយោធានិយមជាថ្មី។ លោករិះគន់ថាប្រទេសចិនទៅវិញទេកំពុងបង្កើនសមត្ថភាពយោធាកាន់តែឆាប់រហ័សដោយគ្មានប្រកាសប្រាប់គេឯងឱ្យដឹងឮដើម្បីធានាតម្លាភាពនោះឡើយ។ ការថ្លែងដូច្នេះមានន័យថាប្រទេសទាំង២កំពុងមានភាពតានតឹងនឹងគ្នាកាន់តែខ្លាំង។ លោកថ្លែងនៅឯកិច្ចប្រជុំសាំងគ្រីឡាដែលរៀបចំនៅសិង្ហបុរីថាប្រទេសចិននៅតែបន្តចំណាយថវិកាច្រើនឡើងៗលើវិស័យការពារជាតិ។ នយោបាយក្រៅប្រទេសរបស់ចិន និងសកម្មភាពយោធារបស់ប្រទេសចិនជាកង្វល់ដ៏ធំមួយសម្រាប់ជប៉ុន និងសហគមន៍អន្តរជាតិ។
លោកច្រានចោលការអះអាងថាប្រទេសជប៉ុនកំពុងងាកទៅរកលទ្ធិយោធានិយមជាថ្មី។ លោកថាសាកគិតទៅមើល ប្រទេសមួយមានឃ្លាំងអាវុធនុយក្លេអ៊ែរដ៏ធំ និងមានយន្តហោះទម្លាក់គ្រាប់ជាយុទ្ធសាស្ត្រក៏ធំ។ ងាកមកជប៉ុនគ្មានអាវុធបែបនេះទេ។ តើបែបនេះឬដែលថាជប៉ុនងាកទៅរកលទ្ធិយោធានិយមនោះ? ចាប់តាំងពីសង្គ្រាមលោកលើកទីពីរមក ជប៉ុនបន្តអនុវត្តយ៉ាងខ្ជាប់ខ្ជួនតាមច្បាប់អន្តរជាតិរួមទាំងធម្មនុញ្ញអង្គការសហប្រជាជាតិ ហើយជប៉ុនខិតខំដោយសុទ្ធចិត្តដើម្បីថែរក្សា និងពង្រឹងសណ្ដាប់ធ្នាប់ពិភពលោក។
កាលពីខែឧសភា ក្រសួងការបរទេសចិនបានអំពាវនាវឱ្យបណ្ដាប្រទេសនៅអាស៊ីប៉ាស៊ីហ្វិចបន្តឃ្លាំមើល និងប្រឆាំងនឹងទង្វើរបស់ជប៉ុនដែលងាកទៅរករបបដឹកនាំបែបយោធានិយមជាថ្មី។ ទំនាក់ទំនងរវាងជប៉ុន និងចិនបានធ្លាក់ចុះបន្ទាប់ពីនាយករដ្ឋមន្ត្រីជប៉ុន លោកស្រីតាកាអ៊ីឈិ ថ្លែងកាលពីខែវិច្ឆិកា ឆ្នាំ២០២៥ថាជប៉ុនអាចនឹងបញ្ជូនកងទ័ពទៅជួយតៃវ៉ាន់ប្រសិនបើកោះនេះរងការវាយប្រហារពីសំណាក់កងទ័ពចិន។
រដ្ឋមន្ត្រីការពារជាតិជប៉ុនសម្ដែងការសោកស្ដាយដែលគ្មានឱកាសបានជួបសមភាគីចិននៅឯវេទិកានោះ។ ប៉ុន្តែជាថ្មីម្ដងទៀត យើងបើកទ្វារទូលាយជានិច្ចសម្រាប់ការជជែកគ្នា។ លោកនៅតែបន្តគាំទ្រការទំនាក់ទំនងគ្នានៅក្នុងចំណោមប្រទេសពាក់ព័ន្ធទាំងអស់រួមទាំងប្រទេសចិនផងដែរដើម្បីថែរក្សាសន្តិភាព និងស្ថិរភាពនៅក្នុងតំបន់ និងសាកលលោក។ គិតទាំងឆ្នាំនេះទៀតរយៈពេល២ឆ្នាំហើយដែលរដ្ឋមន្ត្រីការពារជាតិចិនអវត្តមានពីកិច្ចប្រជុំសាំងគ្រីឡា ហើយខកខានមិនបានជួបសមភាគីរបស់លោក៕ ប្រភព៖ Channel News Asia
ចែករំលែកព័តមាននេះ