ទីក្រុងប៉េកាំង ៖ ទិន្នន័យផ្លូវការដែលបានចេញផ្សាយនៅថ្ងៃទី៣១ ខែឧសភា ឆ្នាំ២០២៦ បានបង្ហាញថា សកម្មភាពរោងចក្ររបស់ប្រទេសចិននៅទ្រឹងក្នុងខែឧសភា បន្ទាប់ពីមានការកើនឡើងក្នុងរយៈពេល២ខែកន្លងមក ដោយសារតែកម្សោយតម្រូវការ និងការកើនឡើងថ្លៃដើមថាមពលដែលបណ្តាលមកពីសង្គ្រាមនៅមជ្ឈិមបូព៌ា បានដាក់សម្ពាធលើកំណើនសេដ្ឋកិច្ចរបស់ប្រទេសសេដ្ឋកិច្ចធំទី២លើពិភពលោកមួយនេះ។ នេះបើតាមប្រភពពី AFP និង Reuters បានចេញផ្សាយ។
យោងតាមការបញ្ជាក់ពីការិយាល័យស្ថិតិជាតិចិន (NBS) បានឱ្យដឹងថា សន្ទស្សន៍អ្នកគ្រប់គ្រងការបញ្ជាទិញផ្លូវការ (PMI) ដែលជាទិន្នន័យវាស់វែងដ៏សំខាន់នៃសកម្មភាពឧស្សាហកម្មនោះ ស្ថិតនៅ ៥០.០ ក្នុងខែឧសភា ដែលនេះគឺជាខ្សែបន្ទាត់ខណ្ឌចែករវាងការពង្រីក និងការធ្លាក់ចុះ។ តួលេខនេះ គឺជាការធ្លាក់ចុះពី ៥០,៣ នៅក្នុងខែមេសា និង ៥០,៤ នៅក្នុងខែមីនាកន្លងទៅ។
ការធ្លាក់ចុះនេះបានកើតឡើងចំពេលដែលសង្គ្រាមនៅមជ្ឈិមបូព៌ា បង្អាក់ដំណើរការដឹកជញ្ជូនតាមច្រកសមុទ្រហ័រមូស (Hormuz) បាននិងកំពុងរុញច្រានតម្លៃថាមពលសកលឱ្យកើនឡើង និងដាក់សម្ពាធលើក្រុមហ៊ុនផលិតនានា។ ដ្បិតបណ្តារោងចក្រចិនកំពុងប្រឈមមុខនឹងការកើនឡើងថ្លៃដើម ដោយសារតម្លៃវត្ថុធាតុដើមកើនឡើង ជាពិសេសនៅក្នុងវិស័យថាមពល និងគីមី។
ប្រទេសចិនបាននិងកំពុងជួបការលំបាកជាមួយនឹងការធ្លាក់ចុះនៃតម្រូវការក្នុងស្រុក ព្រមទាំងការវិនិយោគក្នុងរយៈពេលប៉ុន្មានឆ្នាំថ្មីៗនេះ ដែលដាក់សម្ពាធលើវិស័យផលិតកម្មដ៏ធំសម្បើមរបស់ខ្លួន។ បើទោះបីជាទិន្នន័យរោងចក្របានការធ្លាក់ចុះបន្តិចក៏ដោយ ក៏សន្ទស្សន៍អ្នកគ្រប់គ្រងការបញ្ជាទិញក្រៅផ្នែកផលិតកម្មរបស់ប្រទេសនេះ ដែលជាឧបករណ៍វាស់វែងសកម្មភាពទូទាំងផ្នែកសេវាកម្ម និងសំណង់ បានកើនឡើងដល់ ៥០,១ ក្នុងខែឧសភា ពោលគឺកើនឡើងពី ៤៩,៤ ក្នុងខែមេសាកន្លងទៅ៕
ចែករំលែកព័តមាននេះ