ខេត្តកំពង់ឆ្នាំង ៖ អាជ្ញាធរឃុំក្តុលសែនជ័យ ស្រុកទឹកផុស មានមោទនភាពចំពោះរមណីយដ្ឋានទឹកធ្លាក់ស្រែអំពិល នៅក្នុងភូមិដំណាក់អំពិល ឃុំក្តុលសែនជ័យ ដែលបច្ចុប្បន្នមានអ្នកទេសចរច្រើនជាងកាលពីមុនទៅកម្សាន្ត ។ ជាក់ស្ដែងអ្នកទេសចរជាង១ម៉ឺននាក់ក្នុងមួយថ្ងៃទៅកម្សាន្តក្នុងឱកាសបុណ្យភ្ជុំបិណ្ឌកន្លងទៅ ដែលជាចំនួនច្រើនមិនដែលមានពីមុនមក ។ ដើម្បីសម្រួលដល់ភ្ញៀវទេសចរ ដែលបានទៅលេងកម្សាន្តឱ្យកាន់តែងាយស្រួល ពេលនេះអាជ្ញាធរ ឃុំ និងសហគមន៍នេសាទ កំពុងតែរៀបចំជួសជុលកែលម្អ និងកសាងទីកន្លែងកម្សាន្តឲ្យបានច្រើន និងធំទូលាយជាងមុន ។
លោកម៉ឹង វិសាលសុខ មេឃុំក្តុលសែនជ័យ ស្រុកទឹកផុសលើកឡើងកាលពីពេល ថ្មីៗកន្លងមកថា៖ ដោយសារតែអ្នកទេសចរចេះតែកើនឡើងជារៀងរាល់ថ្ងៃ ជាពិសេសក្នុងឱកាសបុណ្យទាន ម្តងៗ បច្ចុប្បន្នអាជ្ញាធរឃុំរួមជាមួយសហគមន៍បាន និងកំពុងកែលម្អជួសជុលកសាងឡើងវិញ មានដូចជាការធ្វើផ្លូវរថយន្តសម្រាប់ឡើងទៅលើ ដើម្បីជួយដល់ភ្ញៀវដែលមានវ័យចំណាស់ និងជនពិការ បានជិះរថយន្តឡើងទៅខាងលើមិនពិបាកដើរឆ្ងាយ ។ បានធ្វើខ្យូសអង្គុយលេងកម្សាន្តចំនួន១៨ខ្យូស ក្រោមការឧបត្ថមរបស់សប្បុរសជនខ្លះ សហគមន៍ និងអាជ្ញាធរឃុំខ្លះ ក្នុងនោះខ្យូសដែលកសាងដោយសប្បុរសជនមានទំហំ ធំៗ ១តម្លៃជាង១ពាន់ដុល្លា ។ បានកសាងស្ពានឈើ១ តែពេលនេះសហគមន៍ ក៏ដូចជាអាជ្ញាធរកំពុងតែកសាងស្ពានដែកមួយទៀតកាត់ពីលើស្ទឹង សម្រាប់ភ្ញៀវដើរកម្សាន្ត និងថតទិដ្ឋភាពទឹកស្ទឹង ។
ជាងនេះទៅទៀតបានកសាងរានហាលធ្វើអំពីដែក២កន្លែង មួយកន្លែងមានប្រវែងជាង៣០ម៉ែត្រ តាមបណ្តោយស្ទឹង សម្រាប់ភ្ញៀវអង្គុយលេងកម្សាន្ត ។ នៅតាមជម្រាលមាត់ស្ទឹងបានធ្វើផ្លូវសម្រាប់ធ្វើដំណើរឱ្យធំទូលាយជាងមុន ព្រោះជាបទពិសោធន៍កាលពីបុណ្យភ្ជុំកន្លងទៅនេះភ្ញៀវសម្រុកទៅច្រើនធ្វើឲ្យលំបាកក្នុងការធ្វើដំណើរ ។
លោកមេឃុំក្តុលសែនជ័យបញ្ជាក់ថាបច្ចុប្បន្នភ្ញៀវទៅលេងជាហូរហែរាល់ថ្ងៃ គ្រាន់តែមិនច្រើនដូចថ្ងៃបុណ្យទាន ឬថ្ងៃសៅរ៍អាទិត្យតែប៉ុណ្ណោះ ។ នៅថ្ងៃធម្មតាខ្លះមានភ្ញៀវមិនក្រោមពី៣០រថយន្តទេ ។ លោកមេឃុំនិយាយថា «ខ្ញុំសង្ឃឹមថា តទៅថ្ងៃអនាគតរមណីយដ្ឋានទឹកធ្លាក់ស្រែអំពិល និងពិតជាល្បីរន្ទឺទូរទាំងប្រទេស និងមានភ្ញៀវទេសចរកាន់តែ ច្រើនឡើងៗ មិនចាញ់តំបន់ទេចរណ៍ដទៃទៀតឡើយ »។
លោកម៉ឹង វិសាលសុខ បានថ្លែងអំណរគុណដល់បណ្ដាញផ្សព្វផ្សាយដែលកន្លងមកធ្លាប់ផ្សាយពីសក្តានុពលតំបន់ទេសចរណ៍ទឹកធ្លាក់ស្រែអំពិល និងនៅតែជួយផ្សាយជាបន្តបន្ទាប់ទៀត ធ្វើឱ្យតំបន់ទេសចរណ៍របស់ខេត្តកំពង់ឆ្នាំង ដែលកើតចុងក្រោយគេមួយនេះមានអ្នកទេសចរទៅលេងកម្សាន្តកាន់តែច្រើនឡើង ។
ទឹកធ្លាក់ស្រែអំពិល មានចម្ងាយជាង៦០គីឡូម៉ែត្រពីទីរួមខេត្តកំពង់ឆ្នាំង ។ អ្នកទេសចរចង់ទៅលេងកម្សាន្ត អាចធ្វើដំណើរចេញពីទីរួមខេត្តកំពង់ឆ្នាំង តាមផ្លូវជាតិលេខ៥ជាង៣០គីឡូម៉ែត្រ ទៅដល់វត្តវិហារហ្លួង ហៅវត្តផ្សារ ជាប់ផ្សារបរិបូណ៍ មានផ្លូវលំក្រាលក្រួសក្រហមបត់ឆ្វេងជាប់របងសាលារៀន ធ្វើដំណើរជាង២០គីឡូម៉ែត្រទៅដល់ផ្សារក្តុល និងបន្តដំណើរកាត់ថ្នល់រថភ្លើងចម្ងាយ៩គីឡូម៉ែត្រទៀត ។ រមណីយដ្ឋានទឹកធ្លាក់ស្រែអំពិល ជាទឹកធ្លាក់ធម្មជាតិ មានភ្នំ និងព្រៃឈើ ខ្ពស់ៗ គួរជាទីមនោរម្យសម្រាប់ចាំស្វាគមន៍អ្នកទេសចរគ្រប់ពេលវេលា ៕
ចែករំលែកព័តមាននេះ