ខេត្តកណ្តាល ៖ សេចក្តីរាយការណ៍បឋមបានឲ្យដឹងថា អំពើហិង្សាមួយបានកើតឡើងបង្កដោយប្អូនថ្លៃផឹកស្រាស្រវឹង បែកគំនិតជេរប្រមាថយកដុំថ្មគប់បងថ្លៃឲ្យរបួស និងយកកាំបិតដេញកាប់បងប្អូនរត់ពេញផ្ទះ បណ្តាលឲ្យបងថ្លៃរងរបួស ដែលហេតុការណ៍នេះបានកើតឡើងនៅវេលាម៉ោង១១និង០០នាទីថ្ងៃទី៣១ ខែតុលានេះ ស្ថិតនៅក្នុងភូមិទួលក្របៅ ឃុំគគីរ ស្រុកកៀនស្វាយ ខេត្តកណ្តាល ។
ជនរងគ្រោះឈ្មោះ ម៉ាក ផល្លី ភេទស្រី អាយុ៣០ឆ្នាំ ជនជាតិខ្មែរ មានទីលំនៅភូមិទួលក្របៅ ឃុំគគីរ ស្រុកកៀនស្វាយ ខេត្តកណ្តាល មុខរបរកសិករ ។ ជនសង្ស័យឈ្មោះ នៅ វណ្ណះ (ខ្មៅ) ភេទប្រុស អាយុ២៣ឆ្នាំ ជនជាតិខ្មែរ មានទីលំនៅ ភូមិទួលក្របៅ ឃុំគគីរ ស្រុកកៀនស្វាយ ខេត្តកណ្តាល មុខរបរមិនពិត ។
បើតាមសមត្ថកិច្ចបានឲ្យដឹងថា ជនរងគ្រោះ (បងថ្លៃ) កំពុងតែធ្វើម្ហូបនៅផ្ទះបាយ ចំណែកជនសង្ស័យ (ប្អូនថ្លៃ) កំពុងអង្គុយផឹកស្រាថ្នាំជាមួយមិត្តភក្តិម្នាក់ទៀតឈ្មោះ នី យ៉េត ភេទប្រុស អាយុ២៨ឆ្នាំ ជនជាតិខ្មែរ មុខរបរកម្មករ មានទីលំនៅភូមិឃុំជាមួយគ្នា នៅក្រោមផ្ទះឪពុកម្តាយរបស់ខ្លួន (រស់នៅក្នុងផ្ទះជាមួយ) ពេលនោះជនសង្ស័យបានជេរប្រមាថទៅលើជនរងគ្រោះនូវពាក្យសម្តីមិនសមរម្យជាច្រើន ពេលនោះជនរងគ្រោះលឺបានតបសម្តី (ជេរទៅវិញ) ធ្វើឲ្យជនសង្ស័យបានយកដុំថ្មមួយដុំមកគប់លើជនរងគ្រោះ តែគប់មិនត្រូវ ហើយបានស្រែកជេរប្រមាថដល់ឪពុកម្តាយបង្កើតជនរងគ្រោះទៀត និងបានដេញជនរងគ្រោះ ឲ្យចេញពីផ្ទះរបស់ខ្លួន ពេលនោះប្តីជនរងគ្រោះឈ្មោះ នៅ ណិត អាយុ២៦ឆ្នាំ ជនជាតិខ្មែរ មុខរបរកសិករ ត្រូវជាបងបង្កើតជនសង្ស័យបានមកឃាត់កុំឲ្យឈ្លោះគ្នា តែជនសង្ស័យមិនព្រមស្តាប់បានស្ទុះយកដបស្រាបៀរគប់មកលើជនរងគ្រោះ ចំស្មងជើងខាងឆ្វេង បណ្តាលឲ្យហូរឈាម រួចហើយបានយកកាំបិតផ្គាក់ដេញកាប់មកលើជនរងគ្រោះទៀត តែត្រូវបានប្តីរបស់ជនរងគ្រោះចាប់កាំបិតនោះជាប់ ។
ជនរងគ្រោះបានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលគគីរ ក្រោយពីទទួលបានព័ត៌មានកម្លាំងប៉ុស្តិ៍នគរបាលរដ្ឋបាលគគីរបានចុះទៅដល់កន្លែងកើតហេតុឃាត់ខ្លួនជនសង្ស័យ និងវត្ថុតាងយកមកប៉ុស្តិ៍ ដើម្បីសួរនាំរួចបញ្ជូនជនសង្ស័យរួមទាំវត្ថុតាងមកអធិការដ្ឋាននគរបាលស្រុកកៀនស្វាយ ដើម្បីបន្តចាត់ការតាមនីតិវិធី ៕ កែសម្រួលដោយ ៖ សុឃាក់
ចែករំលែកព័តមាននេះ