រាជធានីភ្នំពេញ ៖ លំនៅឋានធ្វើពីឈើប្រក់ក្បឿងរបស់ពលរដ្ឋ អ៊ីស្លាម ចំនួន២ខ្នងក្នុងនោះ១ខ្នងជាផ្ទះជួលរបស់លោកជំទាវ ម៉ាណ ណាវី ត្រូវបានអគ្គិភ័យឆាបឆេះយ៉ាងសន្ធោសន្ធៅរងការខូចខាតទាំងស្រុង។ ហេតុការណ៍នេះបង្កអោយមានការភ្ញាក់ផ្អើល កាលពីវេលាម៉ោងប្រមាណ១០និង១០នាទីព្រឹក…
រាជធានីភ្នំពេញ ៖ លំនៅឋានធ្វើពីឈើប្រក់ក្បឿងរបស់ពលរដ្ឋ អ៊ីស្លាម ចំនួន២ខ្នងក្នុងនោះ១ខ្នងជាផ្ទះជួលរបស់លោកជំទាវ ម៉ាណ ណាវី ត្រូវបានអគ្គិភ័យឆាបឆេះយ៉ាងសន្ធោសន្ធៅរងការខូចខាតទាំងស្រុង។ ហេតុការណ៍នេះបង្កអោយមានការភ្ញាក់ផ្អើល កាលពីវេលាម៉ោងប្រមាណ១០និង១០នាទីព្រឹក ថ្ងៃទី៣០ ខែមេសា ឆ្នាំ២០២៤ នៅគីឡូម៉ែត្រលេខ៩ ក្នុងភូមិទី២ សង្កាត់ច្រាំងចំរេះទី១ ខណ្ឌឬស្សីកែវ រាជធានីភ្នំពេញ ។
តាមព័ត៌មានអោយដឹងថា នៅមុនពេលកើតហេតុគេឃើញភ្លើងបានឆាបឆេះចេញពីផ្ទះលក់អីវ៉ាន់ចាបហួយធ្វើពីថ្មក្រោម និងឈើលើដែលមានម្ចាស់ឈ្មោះសុះ សារោះ ភេទស្រី អាយុ៧៧ឆ្នាំ ហើយបានឆេះរាលដាលយ៉ាងរហ័សទៅផ្ទះឈើមួយខ្នងទៀត របស់លោកជំទាវ ម៉ាណ ណាវី ដែលបានជួលទៅអោយឈ្មោះ ស្រី អាយុ៤៥ឆ្នាំ លក់ខ្មៅនិងអំពៅ ។
តាមឈ្មោះ តាំ រ៉ាសាត ភេទប្រុស អាយុ៤៩ឆ្នាំ ដែលត្រូវជាកូនប្រសារ ម្ចាស់ផ្ទះ ដើមឡើយបានអោយដឹងថា នៅមុនពេលកើតហេតុ ម្តាយក្មេក និងប្រពន្ធរបស់គាត់ ស្ថិតនៅក្នុងផ្ទះ ហើយភ្លើងបានឆាបឆេះ នៅជាន់លើ និងរាលដាលយ៉ាងរហ័ស ។
ទាក់ទិនការកើតហេតុអគ្គិភ័យនេះ កូនប្រសារម្ចាស់ផ្ទះរូបនោះបានអោយដឹងទៀតថា បណ្តាលមកពីឆ្លងចរន្តអគ្គិសនី (ទុស្សេខ្សែភ្លើង) ។ នៅក្នុងហេតុការណ៍នេះ គេឃើញលោក ជិន ប៊ុន ធឿន អភិបាលខណ្ឌឬស្សីកែវ ក៏បានចុះទៅដល់កន្លែងកើតភ្លាម ដឹកនាំកម្លាំងសហការជាមួយនគរបាលការិយាល័យបង្ការពន្លត់អគ្គិភ័យ និងសង្គ្រោះ ដើម្បីអន្តរាគមន៍បាញ់ពន្លត់ផងដែរ ។
តាមរបាយការណ៍បឋមរបស់នគរបាលការិយាល័យបង្ការពន្លត់អគ្គិភ័យ និងសង្គ្រោះនៃស្នងការនគរបាលរាជធានីភ្នំពេញបានអោយដឹងថា នៅក្នុងហេតុការណ៍នេះរថយន្តពន្លត់អគ្គិភ័យចំនួន១៣គ្រឿងបានទៅអន្តរាគមន៍បាញ់ពន្លត់ក្នុងនោះរថយន្តការិ.អគ្គិភ័យចំនួន ១១គ្រឿង ប្រើប្រាស់ទឹកអស់ចំនួន១១ឡាន ស្មើនឹង៤៤ម៉ែត្រគូប,រថយន្តអគ្គិភ័យបុរីវិមានភ្នំពេញចំនួន០១គ្រឿងប្រើប្រាស់ទឹកអស់ចំនួន ០១ឡាន,រថយន្តអគ្គិភ័យក្រុមហ៊ុនស្រាចំនួន ០១គ្រឿង បានបាញ់រលត់នៅម៉ោង១១និង១៥នាទីព្រឹក នាថ្ងៃខែឆ្នាំដដែល ។
តាមនគរបាលបានអោយដឹងទៀតថា អគ្គិភ័យនេះបណ្តាលអោយផ្ទះដើមភ្លើងជាធ្វើពីឈើលើថ្មក្រោមទំហំ០៦ម៉ែត្រគុណ១១ម៉ែត្រ រួមជាមួយសម្ភារៈបានរងការខូចខាតទាំងស្រុង ហើយឆេះរាលដាលទៅផ្ទះធ្វើពីឈើប្រក់ក្បឿងចំនួន០១ខ្នងទៀត (ដែលជាផ្ទះជួលលោកជំទាម៉ាណ ណាវី) អស់ទាំងស្រុងរួមទាំងម៉ូតូម៉ាក Viva ពណ៌ខ្មៅចំនួន០១គ្រឿងផ្លាកលេខភ្នំពេញ 1AW. 6129 ព្រមទាំងឆេះរោលៗជញ្ជាំងផ្ទះវីឡារបស់លោកជំទាវម៉ាណ ណាវី រងខូចខាតប្រមាណ២០% និងឆេះរោលដល់ជញ្ជាំងផ្ទះថ្មនៅខាងក្រោយរងការខូចខាតប្រមាណ១០%។
ទោះបីជាយ៉ាងណា ពុំបណ្តាលអោយមនុស្ស ស្លា.ប់ ឬរងរបួសឡើយ ។ តាមរបាយការណ៍បានអោយដឹងដែលថា អគ្គិភ័យនេះ បណ្តាលមកពីឆ្លងចរន្តអគ្គិសនី ៕
ចែករំលែកព័តមាននេះ