រាជធានីភ្នំពេញ ៖ អ្នកនាំពាក្យក្រសួងសាធារណការ និងដឹកជញ្ជូន បានបំភ្លឺរឿងភ្លើងផ្លូវល្បឿនលឿនភ្នំពេញ-ព្រះសីហនុ អនុវត្តតាមគោលការណ៍ និងមាត្រដ្ឋានដែលទទួលស្គាល់ពីអន្តរជាតិ ។ លោកផន រឹម…
រាជធានីភ្នំពេញ ៖ អ្នកនាំពាក្យក្រសួងសាធារណការ និងដឹកជញ្ជូន បានបំភ្លឺរឿងភ្លើងផ្លូវល្បឿនលឿនភ្នំពេញ-ព្រះសីហនុ អនុវត្តតាមគោលការណ៍ និងមាត្រដ្ឋានដែលទទួលស្គាល់ពីអន្តរជាតិ ។
លោកផន រឹម អ្នកនាំពាក្យក្រសួងសាធារណការ និងដឹកជញ្ជូនបានសរសេលើបណ្តាញសង្គម កាលពីថ្មីៗនេះថា មានចម្ងល់ សំណួរ និងសំណូមពររបស់បងប្អូន ប្រជាពលរដ្ឋ អ្នកធ្វើដំណើរលើផ្លូវល្បឿនលឿនភ្នំពេញ-ព្រះសីហនុ ពាក់ព័ន្ធនឹងភ្លើងបំភ្លឺផ្លូវ ។
អ្នកនាំពាក្យបានលើកឡើងថា ឆ្លើយតបនឹងមតិយោបល់របស់សាធារណជន ពាក់ព័ន្ធនឹងការបំពាក់ភ្លើងបំភ្លឺ តាមដងផ្លូវល្បឿនលឿន ៖ ១- ផ្លូវល្បឿនលឿនត្រូវបានបំពាក់នូវប្រព័ន្ធចំណាំងផ្លាតលើផ្លូវ ដែលអាចឆ្លុះបញ្ចាំងឃើញគំនូសផ្លូវ ទ្រូងផ្លូវ គំនូសបែងចែកគន្លងផ្លូវ និងរបាំងកណ្តាលបានយ៉ាងច្បាស់លាស់ ។ ពេលអ្នកបើកបរបើកភ្លើងបំភ្លឺផ្លូវខាងមុខ នៅពេលយប់ ប្រព័ន្ធចំណាំងផ្លាតគន្លងផ្លូវទាំងសងខាង នឹងផ្លាតពន្លឺបានយ៉ាងច្បាស់ នៅពេលប៉ះជាមួយភ្លើងរថយន្ត ។
២- ផ្លូវល្បឿនលឿន គឺមិនអនុញ្ញាតិឱ្យអ្នកថ្មើរជើង ទោចក្រយាន(កម្លាំងក្រោម៥០០CC) ត្រីចក្រយាន យានអូសដោយសត្វ ម៉ូតូកង់បួនប្រើប្រាស់ផ្លូវនេះទេ ។ ភ្លើងបំភ្លឺផ្លូវជាធម្មតា គឺរចនាឡើងដើម្បីសម្រួលដល់អ្នកថ្មើរជើរ និងទោចក្រ ឬត្រីចក្រយានក្នុងករណីគ្មានពន្លឺបញ្ចាំង ឬខ្សោយពន្លឺ ។
៣- ដើម្បីកាត់បន្ថយការប្រើប្រាស់ថាមពល ព្រមទាំងគិតគូរអំពីបរិស្ថាន និងផលប៉ះពាល់ផ្សេងៗជាយថាហេតុ ម្យ៉ាងវិញទៀតបង្គោលភ្លើងត្រូវមានចន្លោះកំណត់ ពន្លឺដែលបំភ្លឺតាមផ្លូវ អាចមានការបំភ្លឺមិនស្មើគ្នា ខ្លះភ្លឺខ្លះងងឹត ។
ក្នុងការបើកបរដោយល្បឿនលឿន ការប្រែប្រួលពន្លឺបែបនេះ អាចធ្វើឱ្យភ្នែកអស់កម្លាំង ឆាប់ហត់ និងបង្កការងងុយក្នុងការបើកបរ ដែលអាចបណ្តាលឱ្យមានហានិភ័យលើសុវត្ថិភាពចរាចរណ៍ ។ ការមិនដំឡើងអំពូលភ្លើងបំភ្លឺ តាមដងផ្លូវ គឺជាការអនុវត្តតាមគោលការណ៍ និងមាត្រដ្ឋានដែលទទួលស្គាល់ពីអន្តរជាតិ ។
សូមអរគុណដល់បងប្អូនប្រជាពលរដ្ឋអ្នកធ្វើដំណើរចំពោះការចូលរួមបញ្ចេញមតិស្ថាបនា ប្រកបដោយសីលធម៌ ពាក់ព័ន្ធផ្លូវល្បឿនលឿនភ្នំពេញ-ក្រុងព្រះសីហនុ ។
អ្នកនាំពាក្យបានលើកឡើងថា មតិយោបល់របស់លោកអ្នកពិតជាមានសារៈសំខាន់ សម្រាប់ធ្វើការកែលម្អ បំពេញបន្ថែមនូវចំណុចខ្វះខាត ដើម្បីផ្តល់សេវាកម្មឱ្យកាន់តែប្រសើរឡើងមួយកម្រិតទៀត៕
ចែករំលែកព័តមាននេះ