រាជធានីភ្នំពេញ ៖ អ្នកនាំពាក្យរាជរដ្ឋាភិបាលកម្ពុជាបានគូសបញ្ជាក់ពីការធ្វើបាតុកម្មរបស់ ក្រុមបាតុករថៃនៅស្ថានទូតកម្ពុជា ប្រចាំនៅប្រទេសថៃ លើកយករឿងបញ្ជាទឹក ដី ព្រំដែន វាមិនអាចដោះស្រាយបាននោះទេ គឺមានតុលាការយុត្តិធម៌អន្តរជាតិ(ICJ)…
រាជធានីភ្នំពេញ ៖ អ្នកនាំពាក្យរាជរដ្ឋាភិបាលកម្ពុជាបានគូសបញ្ជាក់ពីការធ្វើបាតុកម្មរបស់ ក្រុមបាតុករថៃនៅស្ថានទូតកម្ពុជា ប្រចាំនៅប្រទេសថៃ លើកយករឿងបញ្ជាទឹក ដី ព្រំដែន វាមិនអាចដោះស្រាយបាននោះទេ គឺមានតុលាការយុត្តិធម៌អន្តរជាតិ(ICJ) ។
ការលើកឡើងរបស់អ្នកនាំពាក្យរាជរដ្ឋាភិបាលកម្ពុជា ខណៈពេលដែលក្រុមបាតុករមួយក្រុមរបស់ថៃបានធ្វើបាតុកម្មនៅមុខស្ថានទូតខ្មែរប្រចាំនៅប្រទេសថៃ នៅថ្ងៃទី៦ ខែមិថុនា ឆ្នាំ២០២៥ ។
ឯកឧត្តម ប៉ែន បូណា រដ្ឋមន្ត្រីប្រតិភូអមនាយរដ្ឋមន្ត្រី និងជាប្រធានអ្នកនាំពាក្យរាជរដ្ឋាភិបាល បានគូសបញ្ជាក់ឲ្យដឹង នៅថ្ងៃទី៦ ខែមិថុនា ឆ្នាំ២០២៥ យ៉ាងដូច្នេះថា ការសម្តែងមតិដោយសន្តិវិធី(បាតុកម្ម) គឺជារឿងធម្មតាទេ ឲ្យតែគាត់ធ្វើឡើងស្របតាមច្បាប់របស់ប្រទេសគាត់ គឺអត់មានបញ្ហាអ្វីនោះទេ ។
ឯកឧត្តមថា ចំពោះការសម្តែងមតិថា ស្រឡាញ់ទឹកដីស្រឡាញ់ជាតិ ក៏ជារឿងធម្មតាដែរ ព្រោះថាប្រទេសណា ជនជាតិណា ក៏គេមានទឹកចិត្តដូចគ្នា ។ យ៉ាងណាក្តី ចំពោះបញ្ហាព្រំដែននេះដែរ ឯកឧត្តមប្រធានអ្នកនាំពាក្យរាជរដ្ឋាភិបាលបានគូសបញ្ជាក់យ៉ាងដូច្នេះថា «ការដោះស្រាយបញ្ហាទឹកដី រឿងព្រំដែនវាមិនអាចដោះស្រាយបាន ដោយសារការធ្វើបាតុកម្មលើកបដានោះទេ ។ គឺដោះស្រាយបានតែតាមរយៈផ្លូវច្បាប់ជាតិ ច្បាប់អន្តរជាតិ ឧត្តមមានុវត្តន៍អន្តរជាតិ និងយន្តការតុលាការអន្តរជាតិទើបអាចដោះស្រាយបាន» ។
ឯកឧត្តមបានបន្តថា អីញ្ចឹងហើយបានកម្ពុជាយើងបបួលភាគីថៃ ដើម្បីឡើងទៅតុលាការ
យុត្តិធម៌អន្តរជាតិ ICJ ដើម្បីឲ្យតុលាការនេះកាត់សេចក្តី ហើយប្រសិនបើគាត់អះអាងថាតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី របស់គាត់ ប្រាកដជាគាត់ (ភាគីថៃ) មានឯកសារ ភស្តុតាងត្រឹមត្រូវ ដើម្បីដាក់ជូនតុលាការធ្វើការពិនិត្យ ។
បើតាមឯកឧត្តម ប៉ែន បូណា បានអះអាងថា ភាគីកម្ពុជាបានសន្យាថា នឹងទទួលយកការសម្រេចរបស់តុលាការយុត្តិធម៌អន្តរជាតិ ។ ចំណុចនេះ គឺជាវិធីដោះស្រាយដ៏ងាយបំផុត ដោយមិនចាំចំណាយពេលធ្វើបាតុកម្ម ឬក៏ការប្រឈមមុខដាក់គ្នាខាងយោធានោះទេ ដូច្នេះហើយបានកម្ពុជាបានជ្រើសរើសយកចំណុចនេះ ។
ពាក់ព័ន្ធនឹងស្ថានភាពពលករខ្មែរកំពុងធ្វើការនៅក្នុងប្រទេសថៃវិញ ខាងក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងបានកំពុងតែតាមដានរាល់ស្ថានការណ៍ដែលកំពុងកើតឡើងនៅក្នុងប្រទេសថៃ ហើយរហូតមកដល់ពេលនេះ ពលករខ្មែរដែលកំពុងធ្វើការនៅក្នុងប្រទេសថា មានសភាពធម្មតា ។ នេះបើតាមឯកឧត្តម ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ។
សូមជម្រាបថា ពលរដ្ឋថៃមួយក្រុមបានប្រមូលផ្តុំគ្នាតវ៉ា នៅខាងមុខស្ថានទូតខ្មែរ ក្នុងទីក្រុងបាងកក ។ ហើយក្រុមប៉ូលិសថៃត្រូវបានដាក់ពង្រាយ នៅខាងមុខស្ថានទូតកម្ពុជា ប្រចាំទីក្រុងបាងកក ប្រទេសថៃ ។
គួរជម្រាបផងដែរថា ភាពតានតឹងរវាងប្រទេសថៃ និងកម្ពុជា បានកើតឡើងបន្ទាប់ពីមានការប៉ះទង្គិចគ្នា រវាងកងទ័ពនៃប្រទេសទាំងពីរ នៅតំបន់ជម្លោះក្នុងស្រុកជាំក្សាន្ត ខេត្តព្រះវិហារ(តំបន់មុំបី)នៃប្រទេសកម្ពុជា កាលពីថ្ងៃទី២៨ ខែឧសភា ដែលបណ្ដាលឱ្យក ងកម្លាំងកម្ពុជាម្នាក់បាត់បង់ជីវិត ។
ផ្តើមចេញពីភាពតានតឹងនេះ កម្ពុជាបានអះអាងថា នឹងលើកយកបញ្ហាព្រំដែនទៅ តុលាការយុត្តិធម៌អន្តរជាតិ(ICJ) ខណៈដែលភាគីថៃបានបង្ហាញជំហរបដិសេធក្នុងការបញ្ជូនសំណុំរឿងទៅភាគីទី៣ ។
នៅថ្ងៃទី៥ ខែមិថុនា ឆ្នាំ២០២៥នេះ រាជរដ្ឋាភិបាលថៃបានចេញសេចក្ដីថ្លែងការណ៍ទី២ ដោយបញ្ជាក់ជាថ្មីថា ប្រទេសថៃមិនបានទទួលស្គាល់យុត្តាធិការរបស់តុលាការយុត្តិធម៌អន្តរជាតិ(ICJ) តាំងពីឆ្នាំ១៩៦០មក ។
កាលពីថ្ងៃទី៤ ខែមិថុនា ឆ្នាំ២០២៥ រាជរដ្ឋាភិបាលកម្ពុជា បានបញ្ជាក់ពីការសម្រេចយកបញ្ហាជម្លោះព្រំដែនជាមួយថៃ ដែលរួមមានបញ្ហានៅតំបន់មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី ទៅតុលាការយុត្តិធម៌អន្តរជាតិ បើទោះជាគ្មានកិច្ចសហការណាមួយពីប្រទេសថៃ។
គួរបញ្ជាក់ថា រាជរដ្ឋាភិបាលកម្ពុជានឹងទទួលធ្វើជាម្ចាស់ផ្ទះនៃកិច្ចប្រជុំគណៈកម្មការចម្រុះព្រំដែន(JBC) ដែលជាយន្តការទ្វេភាគីរវាងប្រទេសទាំងពីរ នៅថ្ងៃទី១៤ ខែមិថុនា ឆ្នាំ២០២៥ ខាងមុខ នៅរាជធានីភ្នំពេញ ។ ប៉ុន្តែដោយសារតែកម្ពុជាបានសម្រេច លើកយកបញ្ហាជម្លោះព្រំដែនជាមួយថៃក្នុងតំបន់ទាំង៤ខាងលើ ទៅតុលាការ ICJហើយ, នោះបញ្ហានៃតំបន់ទាំងបួននេះ នឹងមិនត្រូវដាក់ចូលក្នុងរបៀបវារ:នៃកិច្ចប្រជុំ JBC នាពេលខាងមុខនោះទេ ៕
ចែករំលែកព័តមាននេះ