រដ្ឋមន្ត្រីក្រសួងកសិកម្មចុះសួរសុខទុក្ខកម្លាំងឈរជើងតាមខ្សែបន្ទាត់ព្រំដែនកម្ពុជា-ថៃ
- បន្ទាយមានជ័យ
ខេត្តបន្ទាយមានជ័យ ៖ កាលពីព្រឹកថ្ងៃទី៤ ខែមិថុនា ឆ្នាំ២០២៥ កន្លងទៅ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម…
ខេត្តបន្ទាយមានជ័យ ៖ កាលពីព្រឹកថ្ងៃទី៤ ខែមិថុនា ឆ្នាំ២០២៥ កន្លងទៅ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានដឹកនាំគណៈប្រតិភូក្រសួងកសិកម្ម រុក្ខាប្រមាញ់ និងនេសាទ និងអាជ្ញាធរខេត្ត ចុះសួរសុខទុក្ខកងកម្លាំងឈរជើងតាមខ្សែបន្ទាត់ព្រំដែនកម្ពុជា-ថៃ នៅបញ្ជាការដ្ឋានកងពលតូចលេខ៥១ នៅស្រុកព្រះនេត្រព្រះ ខេត្តបន្ទាយមានជ័យ ។
ក្នុងឱកាសចុះសួរសុខទុក្ខនេះ ឯកឧត្តមរដ្ឋមន្ត្រី បានបញ្ជាក់ពីការយកចិត្តទុកដាក់ខ្ពស់របស់រាជរដ្ឋាភិបាល លើការការពារអធិបតេយ្យភាព និងបូរណភាពទឹកដី ដែលបានទទួលការគាំទ្រទាំងស្រុងពីសមាជរដ្ឋសភា-ព្រឹទ្ធសភា ក្នុងការដាក់ពាក្យបណ្ដឹងទៅតុលាការយុត្តិធម៌អន្តរជាតិ (ICJ) លើបញ្ហាជម្លោះព្រំដែនកម្ពុជា-ថៃ ។ឯកឧត្តមរដ្ឋមន្ត្រី ក៏បានពាំនាំនូវការផ្តាំផ្ញើសាកសួរសុខទុក្ខ និងការនឹករឭកពីសំណាក់សម្តេចអគ្គមហាសេនាបតីតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ចំពោះកងទ័ពនិងក្រុមគ្រួសារកងទ័ពឈរជើងតាមបណ្ដោយព្រំដែន ។
ឯកឧត្តមរដ្ឋមន្ត្រី បានកោតសរសេីរកិច្ចខិតខំប្រឹងប្រែង និងការលះបង់របស់កងទ័ព ក្នុងកិច្ចការពារជាតិប្រកបដោយឆន្ទៈមោះមុត និងស្មារតីស្នេហាជាតិ ជាពិសេសតាមខ្សែបន្ទាត់ព្រំដែន ។ ឯកឧត្តមរដ្ឋមន្ត្រី ឌិត ទីណា មានប្រសាសន៍ថា យន្តការសម្ព័ន្ធមេត្រីភាព និងការចុះសួរសុខទុក្ខ គឺជាការគិតគូរយកចិត្តទុកដាក់ពីសំណាក់រាជរដ្ឋាភិបាល និងសប្បុរសជនទាំងអស់ ដែលតែងតែបន្តកៀរគរបន្ថែមជានិច្ចសម្រាប់គាំទ្រទាហានជួរមុខ ។
នាឱកាសនោះដែរ លោកឧត្តមសេនីយ៍ត្រី សឹង្ហ ទុំ មេបញ្ជាការកងពលតូចថ្មើរជើងលេខ៥១ បានថ្លែងអំណរគុណយ៉ាងជ្រាលជ្រៅប្រមុខរាជរដ្ឋាភិបាលកម្ពុជា ដែលតែងតែគិតគូរចំពោះសុខទុក្ខ ឧបត្ថម្ភគាំទ្រជានិច្ច ជាពិសេសវត្តមានឯកឧត្តមរដ្ឋមន្ត្រី ដែលបានចុះមកសំណេះសំណាលផ្ទាល់លើកទឹកចិត្ត និងបានប្តេជ្ញាចិត្តបន្តការការពារបូរណភាពទឹកដី អធិបតេយ្យភាពជាតិភាពសុខសាន្តរបស់ប្រជាជនកម្ពុជា និងរក្សាសន្តិភាពជាតិ ។
ឯកឧត្តមរដ្ឋមន្ត្រី បាននាំយកនូវអំណោយជាថវិកា ព្រមទាំងស្បៀង អង្ករ គ្រឿងឧបភោគបរិភោគមួយចំនួនទៀត ចែកជូនកងកម្លាំង ជាការអរគុណចំពោះការលះបង់កម្លាំងកាយ និងញើសឈាម ដើម្បីការពារជាតិមាតុភូមិ និងលើកទឹកចិត្ត ឱ្យបន្តនូវកិច្ចការងារនេះតទៅមុខទៀត ជាខឿនការពារជាតិសម្រាប់កូនចៅជំនាន់ក្រោយ ៕
ចែករំលែកព័តមាននេះ