រាជធានីភ្នំពេញ ៖ យុវជនម្នាក់បានផ្ដល់បទសម្ភាសន៍ដល់អ្នកសារព័ត៌មានអនឡាញក្នុងស្រុកមួយដោយចោទប្រកាន់ទៅលើនគរបាលប៉ុស្តិ៍ចោមចៅទី១ថា ខ្លួនត្រូវចោរលួចម៉ូតូ១គ្រឿងទៅបាត់ ហើយ១៩ថ្ងៃក្រោយទើបរកឃើញ ខណៈមានបុរស២នាក់កំពុងយកម៉ូតូរបស់ខ្លួនឲ្យជាងដោះគ្រឿង ។ បន្ទាប់មក ខ្លួនបានហៅនគរបាលប៉ុស្តិ៍ខាងលើទៅឃាត់ខ្លួនបុរស២នាក់នោះ ព្រោះសង្ស័យថា…
រាជធានីភ្នំពេញ ៖ យុវជនម្នាក់បានផ្ដល់បទសម្ភាសន៍ដល់អ្នកសារព័ត៌មានអនឡាញក្នុងស្រុកមួយដោយចោទប្រកាន់ទៅលើនគរបាលប៉ុស្តិ៍ចោមចៅទី១ថា ខ្លួនត្រូវចោរលួចម៉ូតូ១គ្រឿងទៅបាត់ ហើយ១៩ថ្ងៃក្រោយទើបរកឃើញ ខណៈមានបុរស២នាក់កំពុងយកម៉ូតូរបស់ខ្លួនឲ្យជាងដោះគ្រឿង ។ បន្ទាប់មក ខ្លួនបានហៅនគរបាលប៉ុស្តិ៍ខាងលើទៅឃាត់ខ្លួនបុរស២នាក់នោះ ព្រោះសង្ស័យថា ជាចោរលួចម៉ូតូរបស់ខ្លួន ឬអាចជាអ្នកទទួលផលចោរកម្ម ប៉ុន្តែពេលនាំទៅដល់ប៉ុស្តិ៍ បែរជានគរបាលដោះលែងបុរស២នាក់នោះទៅវិញបាត់ ។
ក្រោយពីមានការចោទប្រកាន់នេះ នគរបាលបានអះអាងថា យុវជននោះក្រឡិចក្រឡុច ដោយសារពេលបាត់ម៉ូតូបានដាក់ពាក្យប្ដឹងឲ្យជួយអន្តរាគមន៍ លុះពេលរកឃើញម៉ូតូភ្លាម បាននិយាយសម្រួលលើកដៃសំពះគ្នាទៅវិញទៅមកជាមួយបុរស២នាក់នោះ ។ មិនតែប៉ុណ្ណោះ ទាំងប្រាប់បុរស២នាក់នោះថា «ខ្ញុំអត់ប្ដឹងទេ សុំត្រឹមតែយកម៉ូតូរបស់ខ្ញុំវិញប៉ុណ្ណោះ» រួចក៏ដកពាក្យបណ្ដឹងវិញ ។ ដោយសារតែគ្មានពាក្យបណ្ដឹង ទើបនគរបាលធ្វើសាវតារជាតិបុរស២នាក់នោះទុក រួចក៏ឲ្យត្រឡប់ទៅវិញ ។ យុវជនជាម្ចាស់ម៉ូតូរូបនេះឈ្មោះ សុខ ដេវីត អាយុ២២ឆ្នាំ បម្រើការនៅហាងមួយ និងស្នាក់នៅផ្ទះជួលក្នុងភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ ។ ឯម៉ូតូដែលត្រូវចោរលួចនោះម៉ាកយ៉ាម៉ាហា ពណ៌ខៀវ ពាក់ផ្លាកលេខ ភ្នំពេញ ១IQ-៦៦៧៨ ។
ចំណែកជនសង្ស័យទាំង២នាក់ ម្នាក់ឈ្មោះ ឃីម ថាវ អាយុ២៧ឆ្នាំ និងម្នាក់ទៀតឈ្មោះ ស៊ុន ទី អាយុ២៥ឆ្នាំ ទាំង២នាក់មានទីលំនៅក្នុងភូមិត្រពាំងរំចេក សង្កាត់ចោមចៅទី១ ខណ្ឌពោធិ៍សែនជ័យ ។ នគរបាលប៉ុស្តិ៍ចោមចៅទី១ និងនគរបាលព្រហ្មទណ្ឌខណ្ឌពោធិ៍សែនជ័យបានឲ្យដឹងថា កាលពីជិត២០ថ្ងៃមុន យុវជនឈ្មោះ សុខ ដេវីត បានទៅដាក់ពាក្យប្ដឹងឲ្យជួយអន្តរាគមន៍ក្រោយពីចោរលួចម៉ូតូបាត់ ហើយនគរបាលក៏បានធ្វើការស្រាវជ្រាវរហូតមកដែរ ប៉ុន្តែមិនបានឃើញឡើយ ។
លុះមកដល់ថ្ងៃទី៤ ខែមិថុនា ឆ្នាំ២០២៥ យុវជននោះទៅប្រាប់ថា រកម៉ូតូឃើញហើយ និងបានហៅឲ្យទៅជួយឃាត់ខ្លួនបុរស២នាក់ដែលកំពុងឲ្យជាងជួសជុលម៉ូតូ ។ ពេលនោះនគរបាលប៉ុស្តិ៍ចោមចៅទី១ បានទៅឃាត់ខ្លួនហើយនាំយកទាំងមនុស្សនិងម៉ូតូទៅកាន់ប៉ុស្តិ៍ ។ នគរបាលបានឲ្យដឹងទៀតថា ក្រោយពេលទៅដល់ប៉ុស្តិ៍ យុវជនដែលជាម្ចាស់ម៉ូតូនោះ មិនបានសួរដេញដោលរកឫសគល់ម៉ូតូរបស់ខ្លួនទៅកាន់បុរស២នាក់នោះអ្វីទាំងអស់ ប៉ុន្តែបាននិយាយសម្របសម្រួលគ្នាបញ្ចប់រឿងទៅវិញ ។ ភាគីទាំង២បានលើកដៃសំពះគ្នាទៅវិញទៅមក រួចយុវជននោះបាននិយាយទៅកាន់ឈ្មោះ ឃីមថាវ និងឈ្មោះ ស៊ុន ទី ដែលជាជនសង្ស័យថា «ខ្ញុំអត់ប្ដឹងទេ សុំត្រឹមតែយកម៉ូតូរបស់ខ្ញុំវិញប៉ុណ្ណោះ » រួចក៏បានដកពាក្យបណ្ដឹងវិញមែន ។
នគរបាលនិយាយទៀតថា ដោយសារតែបុរស២នាក់នោះប្រាប់ថា ពួកខ្លួនទិញម៉ូតូខាងលើពីជនមិនស្គាល់អត្តសញ្ញាណម្នាក់ យកទៅឲ្យជាងជួសជុលដើម្បីទុកជិះធ្វើការ ហើយម្ចាស់ម៉ូតូក៏បានដកពាក្យបណ្ដឹងវិញ និងសុំបញ្ចប់រឿង ដើម្បីឆាប់បានយកម៉ូតូត្រឡប់ទៅវិញនោះ ទើបនគរបាលឲ្យបុរស២នាក់នោះត្រឡប់ទៅផ្ទះវិញ ។ ប៉ុន្តែមុននឹងឲ្យទៅវិញ នគរបាលក៏បានធ្វើសាវតារជាតិបុរស២នាក់នោះតម្កល់ទុកនៅប៉ុស្តិ៍រួចរាល់ហើយ មិនបានឲ្យទៅដោយមិនបានធ្វើអ្វីសោះនោះឡើយ ។
បន្ទាប់មក ក៏បានធ្វើកំណត់ហេតុបដិសេធបណ្ដឹងរបស់ម្ចាស់ម៉ូតូ ព្រមទាំងធ្វើកំណត់ហេតុប្រគល់ម៉ូតូនោះទៅឲ្យម្ចាស់វិញហើយដែរ ។ ដោយឡែក យុវជនជាម្ចាស់ម៉ូតូរូបនោះបានផ្ដល់បទសម្ភាសន៍ជាមួយអ្នកសារព័ត៌មានអនឡាញក្នុងស្រុកមួយថា ម៉ូតូរបស់ខ្លួនត្រូវចោរលួចយកចេញពីផ្ទះជួល នៅខាងក្រោយផ្សារឯករាជ្យ១ ក្នុងភូមិត្រពាំងថ្លឹង១ សង្កាតចោមចៅទី១ ខណ្ឌពោធិ៍សែនជ័យ កាលពីវេលាម៉ោងជាង២រំលងអធ្រាត្រឈានចូលថ្ងៃទី១៦ ខែឧសភា ឆ្នាំ២០២៥កន្លងទៅ ។ បន្ទាប់មក ខ្លួនបានទៅប៉ុស្តិ៍នគរបាលចោមចៅទី១ ដាក់ពាក្យបណ្ដឹងឲ្យនគរបាលជួយស្រាវជ្រាវ ។
លុះរំលងបាន១៩ថ្ងៃក្រោយមក គឺនៅថ្ងៃទី៤ ខែមិថុនា ឆ្នាំ២០២៥ ខ្លួនបានប្រទះឃើញជនសង្ស័យ២នាក់ខាងលើនោះ កំពុងយកម៉ូតូរបស់ខ្លួនឲ្យជាងដោះគ្រឿងនៅតាមផ្លូវវ៉េងស្រេង ហួសពីផ្សារកាណាឌីយ៉ាប្រហែល១០០ម៉ែត្រ ស្ថិតក្នុងភូមិត្រពាំងថ្លឹង១នោះដែរ ។ម្ចាស់ម៉ូតូបាននិយាយនៅក្នុងបទសម្ភាសន៍នោះទៀតថា ពេលនោះខ្លួនបានជិះម៉ូតូចូលទៅមើលជិត ដោយធ្វើជាចូលទៅសប់កង់ម៉ូតូ ដើម្បីកុំឲ្យជនសង្ស័យដឹងខ្លួន ។
នៅពេលមើលឃើញច្បាស់ថា ជាម៉ូតូរបស់ខ្លួនហើយ ក៏ត្រឡប់ទៅផ្ទះរួចយកឯកសារ កាតគ្រីម៉ូតូ ធ្វើដំណើរទៅប៉ុស្តិ៍នគរបាលចោមចៅទី១ ឲ្យនគរបាលទៅជួយឃាត់ខ្លួនជនសង្ស័យដើម្បីសួរនាំនិងយកម៉ូតូទៅប៉ុស្តិ៍ ។ ពេលនោះ នគរបាលបានសួរនាំច្រើនដែរ ហើយបានប្រាប់ខ្លួនថា ចាំថ្ងៃស្អែកថ្ងៃទី៥ ខែមិថុនា ឆ្នាំ២០២៥ ចាំមកដោះស្រាយគ្នាទទួលយកម៉ូតូទៅវិញ ។ លុះបានប្រហែលជិត១ម៉ោងក្រោយមក ស្រាប់តែនគរបាលប៉ុស្តិ៍ចោមចៅទី១ បានដោះលែងជនសង្ស័យទាំង២នាក់ឲ្យមានសេរីភាពវិញ ដោយមិនបានឃាត់ខ្លួនឡើយ ៕
ចែករំលែកព័តមាននេះ