អតីតតារាសម្តែងអ្នកនាង អ៊ុំ គន្ធា បានជួបបញ្ហាជីវភាពរស់នៅជាថ្មីម្តងទៀត បន្ទាប់ពីនាងត្រូវបានគេបញ្ឈប់ការងារនៅស្ថាប័នរដ្ឋមួយកន្លែង ខណៈពេលដែលស្ថានភាពសុខភាពរបស់នាងក៏កំពុងតែញាំញីខ្លាំងពីមួយថ្ងៃទៅមួយថ្ងៃ ។ គេនៅចាំបានថា ក្រោយពេលស្ថានភាពកំពុងជួបព្យុះភ្លៀង ជាមួយនឹងភាពក្រលំបាកខ្លាំង…
អតីតតារាសម្តែងអ្នកនាង អ៊ុំ គន្ធា បានជួបបញ្ហាជីវភាពរស់នៅជាថ្មីម្តងទៀត បន្ទាប់ពីនាងត្រូវបានគេបញ្ឈប់ការងារនៅស្ថាប័នរដ្ឋមួយកន្លែង ខណៈពេលដែលស្ថានភាពសុខភាពរបស់នាងក៏កំពុងតែញាំញីខ្លាំងពីមួយថ្ងៃទៅមួយថ្ងៃ ។
គេនៅចាំបានថា ក្រោយពេលស្ថានភាពកំពុងជួបព្យុះភ្លៀង ជាមួយនឹងភាពក្រលំបាកខ្លាំង និងផ្ទុកជំងឺកាចសាហាវនាពេលកន្លងមកនោះ អតីតារាសម្តែងដែលចូលចិត្តសម្ញែងភាពសិចស៊ីអ្នកនាង អ៊ុំ គន្ធា ត្រូវបានសប្បុរសនានាជួយឧបត្ថម្ភជាបន្តបន្ទាប់ រហូតដល់មានអង្គការសមាគមបានជួយសម្រួលការព្យាបាលជំងឺរបស់នាង និងផ្តល់ការងារឲ្យនាងបានធ្វើផងដែរ ។
ក្រោយមកទៀត អ្នកនាង អ៊ុំ គន្ធា ក៏តែងតែបានការជួយឧបត្ថម្ភជាបន្តបន្ទាប់ដូចជាអង្គរ និងគ្រឿងបរិភោគមួយពីសមាគមសិល្បករខ្មែរ ហើយអ្វីដែលធ្វើឲ្យស្ថានភាពនាងកាន់តែប្រសើរទៀតនោះគឺនាងក៏មានឱកាសបានចូលធ្វើការជាមន្ត្រីជាប់កិច្ចសន្យានៅអង្គភាពប្រឆាំងអំពើពុករលួយតាំងពីឆ្នាំ២០១៩ ។
យ៉ាងណា ក្នុងរយៈពេលប៉ុន្មានខែចុងក្រោយនេះ អ្នកនាង អ៊ុំ គន្ធា បានចាប់ផ្តើមជួបបញ្ហាជីវភាពសារជាថ្មីម្តងទៀត ដោយសារតែនាងបាត់បង់ការងារ ហើយជំនួយពីសមាគមសិល្បករខ្មែរក៏បានផ្អាកមួយរយៈ ខណៈពេលដែលនាងកំពុងតែជួបបញ្ហាសុខភាពផងដែរ ។
ក្នុងវ័យ៤៤ឆ្នាំ អតីតតារាសម្តែងអ្នកនាង អ៊ុំ គន្ធា បានអះអាងប្រាប់កោះសន្តិភាពតាមសារអេឡិចត្រូនិចថា កន្លងមកជីវភាពរបស់នាងមានភាពល្អប្រសើរ ដោយអាចមានហូបចុកគ្រប់គ្រាន់ និងលុយសម្រាប់បង់ផ្ទះជួលដូចគេឯង ប៉ុន្តែក្នុងរយះពេល៣ខែចុងក្រោយនេះ នាងបានជួបការលំបាកខ្លាំង ។
អ្នកនាងបញ្ជាក់ថា ការជួបការលំបាកនោះ គឺដោយសារការផ្អាកជំនួយពីសមាគមសិល្បករខ្មែរ ដោយសារសមាគមត្រូវជ្រើសរើសប្រធានថ្មី ហើយប្រសិនបើគេរើសបានហើយនោះទើបសមាគមផ្តល់ជំនួយបន្តទៀត ។
អ្នកនាងបន្តថា កន្លងមក នាងក៏បានធ្វើការជាមន្ត្រីជាប់កិច្ចសន្យានៅអង្គភាពប្រឆាំងអំពើពុករលួយដែរ ប៉ុន្តែរយៈពេល៣ខែមកនេះ ខាងអង្គភាពក៏បានបញ្ឈប់នាង ដោយសារនាងមានជំងឺកើតរបេងកូនកណ្តុរ ដោយមិនអាចទៅចុះវត្តមានបានទើបខាងបុគ្គលិកក៏បញ្ឈប់នាងតែម្តង ។
អ្នកនាង អ៊ុំ គន្ធា បានលើកឡើងបន្ថែមថា បន្ទាប់ពីបញ្ចប់ការងារនៅអង្គភាពប្រឆាំងអំពើពុករលួយនេះមក ក្នុងរយៈពេល៣ខែមកនេះ នាងក៏បានសាកល្បងធ្វើការងារថ្មី ដោយចូលធ្វើការនៅរោងចក្រ និងអ្នកអនាម័យ ប៉ុន្តែការងារទាំអស់នេះនាងធ្វើមិនបានយូរឡើយ ដោយសារតែនាងជួបបញ្ហាសុខភាព (ឈឺ) ។
នាងបញ្ជាក់ថា បច្ចុប្បន្ននាងរស់នៅក្នុងបន្ទប់ជួលតម្លៃ៥០ដុល្លារ ហើយគិតទាំងថ្លៃទឹកភ្លើងគឺមួយខែអស់ប្រមាណជាង៧០ដុល្លារ ខណៈពេលដែលកូនៗរបស់នាងបានចេញទៅរស់នៅកន្លែងពួកគេធ្វើការអស់ហើយ ។
នាងបន្តថា មូលហេតុដែលនាងជួលបន្ទប់តម្លៃខាងលើនេះ ដោយសារកន្លងមក នាងមានប្រាក់ខែនៅអង្គភាពប្រឆាំងអំពើពុករលួយដែលអាចអោយនាងមានលទ្ធភាពបង់បាន ប៉ុន្តែពេលនេះនាងបាត់បង់ការងារមិនមានលុយបង់គ្រប់ឡើយ ហេតុនេះនាងកំពុងគិតរើពីបន្ទប់ចាស់ទៅរកបន្ទប់ជួលណាមួយដែលមានតម្លៃធូរថ្លៃជាងនេះ ។
យ៉ាងណា បើតាមអ្នកនាង អ៊ុំ គន្ធា ការងារគេរើសច្រើន ប៉ុន្តែនៅពេលដែលនាងសុំគេធ្វើនោះគឺគេមិនទទួលនាងឡើយ ដោយសារនាងចាស់ពេក គេរកតែក្មេងៗ ក្នុងពេលដែលនាងក៏មិនចេះអ្វីផងនោះ ។ មកទល់នាពេលនេះ អ្នកនាងក៏មិនទាន់ដឹងទេថា នឹងត្រូវដោះស្រាយជីវភាពដោយរបៀបណានោះដែរ ដោយសារការងារក៏គ្មានធ្វើ ខណៈពេលដែលការងារសិល្បៈនាងក៏អស់និស្ស័យព្រោះនាងវ័យកាន់តែចាស់ និងផ្ទុកដោយជំងឺផងនោះ ។
ពាក់ព័ន្ធទៅនឹងបញ្ហាជំងឺ និងសុខភាពនោះអ្នកនាង អ៊ុំ គន្ធា បានបញ្ជាក់ថា រហូតមកទល់នាពេលនេះនាងបានរស់នៅជាមួយជំងឺកាចសាហាវនេះអស់រយៈពេលប្រមាណ២០ឆ្នាំហើយ ហើយជំងឺនេះធ្វើទុក្ខដល់រូបនាងពីមួយថ្ងៃទៅមួយថ្ងៃ ប៉ុន្តែសម្រាប់នាងបញ្ហាជំងឺនេះវាលេងសំខាន់សម្រាប់នាងហើយ អ្វីដែលសំខាន់គឺសុខភាពផ្លូវចិត្តដែលនាងគិតថា ស្ថានភាពរបស់នាងគឺមានតែទៅមុខ ដោយមិនអាចបកក្រោយឡើយ ៕
ចែករំលែកព័តមាននេះ