ខេត្តត្បូងឃ្មុំ ៖ អ្នកភូមិចំនួន៤៧គ្រួសារ មកពីភូមិទន្លេបិទលើ និងភូមិទន្លេបិទក្រោម ដែលមានលំនៅឋាននៅតាមដងទន្លេមេគង្គ បាននាំគ្នាមកតវ៉ាដល់សាលាឃុំទន្លេបិទ ស្រុកត្បូងឃ្មុំ នារសៀលថ្ងៃទី៩ ឧសភា ដើម្បីឱ្យអាជ្ញាធរឃុំជួយអន្តរាគមន៍កុំឱ្យសាឡង់បូមខ្សាច់របស់ក្រុមហ៊ុនលោកឧកញ៉ា ឈន ថារី មកបូមខ្សាច់នៅកៀកនឹងច្រាំងទន្លេ ព្រោះខ្លាចបាក់លំនៅឋានពួកគាត់ចូលទៅក្នុងទន្លេជាយថាហេតុណាមួយ ។
អ្នកភូមិម្នាក់ឈ្មោះសេង អ៊ាង ភេទស្រី អាយុ៥២ឆ្នាំ រស់នៅភូមិទន្លេបិទក្រោម ឃុំទន្លេបិទ ប្រាប់ឱ្យដឹងថា រូបគាត់បានមកសាងសង់ផ្ទះឈើ១ខ្នង តាមជួរមាត់ទន្លេអស់រយៈពេលជាង២០ឆ្នាំមកហើយ ចាប់តាំងពីពេលដែលមានសាឡាងឆ្លងទៅមកទន្លេបិទ-កំពង់ចាម ។ លុះបច្ចុប្បន្ននេះគ្រាន់តែមានសាឡង់មកបូមយកខ្សាច់នៅកៀកនឹងច្រាំងទន្លេធ្វើឱ្យរូបគាត់និងអ្នកភូមិឯទៀតមានក្ដីកង្វល់ជាខ្លាំងព្រោះខ្លាចបាក់ផ្ទះចូលទៅក្នុងទន្លេមេគង្គ ។
ស្ត្រីឈ្មោះសេង អ៊ាង បានបន្តថា នៅរសៀលថ្ងៃទី៩ ឧសភា ឃើញមានសាឡង់៣ទៅ៤គ្រឿងបានមកបូមខ្សាច់នៅកៀកច្រាំងតែពេលឃើញអ្នកភូមិជាច្រើននាក់ជ្រួលច្រាលតវ៉ានោះគេឃើញសាឡង់២គ្រឿងបើកទៅចូលច្រាំងនៅក្រុងកំពង់ចាមវិញ ។ បើសិនជាបាក់ច្រាំងដល់ផ្ទះមែនមិនដឹងជាមានដីឯណាសម្រាប់ធ្វើផ្ទះទេ ហេតុនេះសូមឱ្យរាជរដ្ឋាភិបាលមេត្តាជួយដល់ពួកគាត់ផង ។
អ្នកភូមិម្នាក់ទៀតឈ្មោះប៊ិន ផល្លី ភេទស្រី អាយុ៤៨ឆ្នាំ នៅភូមិទន្លេបិទក្រោម និយាយថា កាលពីឆ្នាំ២០១៣ កន្លងទៅ ក្រុមសាឡង់ខាងលើធ្លាប់បានមកបូមយកខ្សាច់នៅកៀកនឹងច្រាំងទន្លេ ប៉ុន្តែបូមបានតែ២ថ្ងៃប៉ុណ្ណោះក៏ត្រូវអ្នកភូមិនាំគ្នាដេញចេញទៅវិញ ។ លុះក្រោយមកបានមកបូមទៀតតែដោយលេចឮថាអាជ្ញាធរខេត្តបានជួយបណ្ដេញសាឡង់នោះក៏ចេញទៅវិញបាត់ ។ មិនបានប៉ុន្មានផង ផ្ទះប្រជាពលរដ្ឋចំនួន៣គ្រួសារក្នុងនោះមាន ១-ផ្ទះឈ្មោះចាន់ ធី ២-ផ្ទះឈ្មោះមុំ និង៣-ផ្ទះឈ្មោះហេង បានស្រុតផ្នែកខាងក្រោយតែបាននាំគ្នារុញមកខាងមុខទាន់ពេលវេលា ។ អ្នកភូមិបានបន្លុយពាក្យថា ប្រសិនណាបើអាជ្ញាធរឃុំដោះស្រាយមិនចេញទេ នោះពួកគាត់នឹងនាំគ្នាទៅសាលាខេត្តតែម្តង ។
លោកគឹម ជុន មេឃុំទន្លេបិទមានប្រសាសន៍ថា តាមដែលគាត់ដឹងសាឡង់បូមខ្សាច់ទាំងនោះតាមច្បាប់ត្រូវបូមនៅកណ្ដាលទន្លេ តែបើគំនិតរបស់គាត់វិញយល់ថា ប្រសិនបើមូបនៅកណ្ដាលទន្លេមែននោះត្រូវការទម្លាក់ទុយោវែងចូលទៅក្នុងទន្លេធ្វើឱ្យការបូមក្រពេញសាឡង់ ទើបគេមកបូមនៅកៀកច្រាំង ព្រោះងាយចំណេញពេលវេលា ដោយសារតែទឹករាក់បូមខ្សាច់បានងាយស្រួល ។ លោកមេឃុំបន្តថា នារសៀលថ្ងៃទី៩ ឧសភា អ្នកភូមិចំនួន៤៧គ្រួសារ បានមកពឹងរូបលោកឱ្យជួយអន្តរាគមន៍ធ្វើយ៉ាងណាឱ្យសាឡង់បូមខ្សាច់ទៅកណ្ដាលទន្លេដើម្បីបញ្ចប់បញ្ហា ។ លោក អីុ ចាន់ធី ប្រធានមន្ទីររ៉ែនិងថាមពលខេត្តប្រាប់តាមទូរស័ព្ទថា តាមច្បាប់សាឡង់ត្រូវបូមខ្សាច់យ៉ាងហោចណាស់ចម្ងាយពីច្រាំងទន្លេពី២០០ម៉ែត្រទៅ៣០០ម៉ែត្រ ពោលគឺបូមត្រង់ចំណុចកណ្ដាលទន្លេមេគង្គ ។ ទោះជាយ៉ាងណា លោកសុំឱ្យទៅទាក់ទងជំនាញធនធានទឹកខេត្តទើបអាចដឹងច្បាស់ជាងព្រោះគេជាអ្នកអនុញ្ញាតឱ្យបូម ។
មន្ត្រីសាលាខេត្តមួយរូប បានប្រាប់តាមទូរស័ព្ទឱ្យដឹងដែរថា ករណីសាឡង់បូមខ្សាច់នេះសូមឱ្យអ្នកភូមិដាក់ពាក្យបណ្ដឹងទៅ ដើម្បីងាយស្រួលមន្ត្រីជំនាញចុះទៅពិនិត្យ ៕
ចែករំលែកព័តមាននេះ