រាជធានីភ្នំពេញ ៖ តារាចម្រៀងអ្នកនាង ទេព បូព្រឹក្ស បានថ្លែងអំណរគុណ និងលើកសរសើរនូវភាពអង់អាចក្លាហានរបស់កងទ័ពខ្មែរ ដែលកំពុងឈរការពារយ៉ាងរឹងមាំចំពោះប្រាសាទតាក្របីមិនឱ្យមានការឈ្លានពានពីប្រទេសជិតខាង ។ ជាមួយនឹងការមកទស្សនាប្រាសាទតាក្របីដោយផ្ទាល់និងជាលើកដំបូងនាពេលនេះ…
រាជធានីភ្នំពេញ ៖ តារាចម្រៀងអ្នកនាង ទេព បូព្រឹក្ស បានថ្លែងអំណរគុណ និងលើកសរសើរនូវភាពអង់អាចក្លាហានរបស់កងទ័ពខ្មែរ ដែលកំពុងឈរការពារយ៉ាងរឹងមាំចំពោះប្រាសាទតាក្របីមិនឱ្យមានការឈ្លានពានពីប្រទេសជិតខាង ។
ជាមួយនឹងការមកទស្សនាប្រាសាទតាក្របីដោយផ្ទាល់និងជាលើកដំបូងនាពេលនេះ ទេព បូព្រឹក្ស ក៏បានលើកសសើរផងដែរ ពីភាពស្រស់ស្អាតរបស់ប្រាសាទរបស់ដូនតាខ្មែរមួយនេះ ខណៈពេលដែលនាងក៏បានធ្វើការបុណ្យផ្សងអោយខ្លួនកើតជាខ្មែរគ្រប់ៗជាតិ ។
តាមរយៈវីដេអូបង្ហោះលើបណ្តាញសង្គមបង្ហាញសកម្មភាពដើរទស្សនាប្រាសាទតាក្របីតារាចម្រៀងអ្នកនាង ទេព បូព្រឹក្ស បានលើកឡើងថា នេះជាលើកទីមួយហើយដែលនាងបានមកដល់ប្រាសាទតាក្របី ហើយពេលមកដល់នាងឃើញទាំងប្រាសាទ ទេសភាព និងអាកាសធាតុនៅទីនេះ ពិតជាស្រស់ស្អាតខ្លាំង ។
នាងបន្តថា សម្រាប់ការទស្សនាប្រាសាទមួយនេះ ជាលើកទីមួយ នាងពិតជាមានអារម្មណ៍ស្រស់ស្រាយ ហើយនាង និងស្វាមីពិតជាសូមអរគុណ និងសរសើរដល់បងៗដែលជាកងទ័ពជួរមុខការពារតំបន់រៀងៗខ្លួន ដែលពួកគាត់មានស្មារតីយ៉ាងស្វាហាប់ឈរការពារយ៉ាងរឹងមាំជារនាំងការពារជាតិយើង ។
នាងបញ្ជាក់ថា សម្រាប់ពួកយើងគឺមិនមានអ្វីច្រើនទេ គឺមានតែពាក្យអរគុណ ហើយពួកយើងនឹងនៅក្បែរបងៗ ពូៗ ជាកម្លាំងជួរមុខជានិច្ច ក្នុងការចូលរួមជាចំណែកក្នុងបុព្វហេតុការពារទឹកដី និងប្រាង្គប្រាសាទរបស់ដូនតាខ្មែរយើង ។
ទេព បូព្រឹក្ស បានលើកឡើងបន្ថែមទៀតថា ក្រោយបានមកឃើញប្រាសាទមួយនេះ នាងសូមផ្សងដោយធ្វើបុណ្យទានអោយបានច្រើន ដើម្បីសុំអោយកើតជាតិណាជាជនជាតិខ្មែរ ដោយសារកើតលើដីខ្មែរអ្វីក៏មានដែរមិនខ្វះបង្អួតគេនោះឡើយ ហើយជាពិសេសគឺប្រាសាទបុរាណដែលល្អៗជាច្រើន ។
យ៉ាងណា បើតាម ទេព បូព្រឹក្ស ដូចអ្វីដែលនាងបានផុសលើបណ្តាញសង្គមកន្លងមកគឺ ការរាប់អានគឺជាមិត្តភាព និងសុជីវធម៌ ប៉ុន្តែការការពាររក្សា និងការផ្សារភ្ជាប់ និងការដាស់តឿន គឺជាកាតព្វកិច្ចដើម្បីបុព្វហេតុជាតិ ខណៈពេលដែលមិនថា ពេលណានោះឡើយ រឿងជាតិគឺជារឿងទីមួយ ចំណែករឿងផ្សេងចាំគិតតាមក្រោយ ។
គួរបញ្ជាក់ថា កាលពីពេលថ្មីៗនេះតារាចម្រៀងអ្នកនាង ទេព បូព្រឹក្ស រួមជាមួយស្វាមីគឺលោក ជី ដេវីដ បានធ្វើដំណើរចុះសួរសុខទុក្ខដោយផ្ទាល់ និងនាំយកអំណោយជូនដល់កងទ័ពជួរមុខដែលកំពុងស្ថិតនៅក្នុងភូមិសាស្ត្រតំបន់មុំ៣ ថ្មដូន និងប្រាសាទតាក្របី ។
សកម្មភាពទាំងនេះ ត្រូវបាន ទេព បូព្រឹក្ស និងលោក ជី ដេវីដ អះអាងបញ្ជាក់ថា គឺដើម្បីលើកទឹកចិត្ត និងបង្ហាញពីឆន្ទៈនៃការគាំទ្រយ៉ាងខ្លាំងក្លាជូនចំពោះវីរៈភាពដ៏អង់អាចនៃកងទ័ពចក្រភពខ្មែរ ដែលកំពុងឈរការពារដែនដីរបស់ខ្មែរ ៕
ចែករំលែកព័តមាននេះ