សិស្សវិទ្យាល័យម្នាក់ ជិះម៉ូតូស្គូពីបុ.កម៉ូតូហុងដាឌ្រីមឆ្លងផ្លូវ នាងរបួសធ្ង.ន់
- ភ្នំពេញ
រាជធានីភ្នំពេញ៖ សិស្សវិទ្យាល័យម្នាក់បានជិះម៉ូតូម៉ាហុងដាស្កូបពី១គ្រឿងជ្រុលទៅបុកជាមួយម៉ូតូម៉ាកហុងដាឌ្រីមសេ១២៥មួយគ្រឿងទៀត ដែលបើកបរដោយបុរសជាងធ្វើវិហារវត្តជម្ពូវ័នម្នាក់ កំពុងបើកឆ្លងផ្លូវ បណ្ដាលដួលទៅលើថ្នល់ ហើយក្មេងសិស្សស្រីខាងលើបានរងរបួសធ្ងន់ធ្ងរ ។
ឧប្បត្តិហេតុគ្រោះថ្នាក់ចរាចរណ៍ខាងលើនោះបានកើតឡើង កាលពីវេលាម៉ោង១២ថ្ងៃត្រង់ថ្ងៃទី២៦ ខែឧសភា ឆ្នាំ២០២៦ នៅតាមផ្លូវជាតិលេខ៤ ត្រង់ចំណុចមុខវត្តជម្ពូវ័ន និងមុខផ្សារជម្ពូវ័ន ស្ថិតនៅក្នុងភូមិជម្ពូវ័ន១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ក្មេងស្រីរងគ្រោះឈ្មោះឃាង វិជ្ជរ៉ា អាយុ១៥ឆ្នាំ ជាសិស្សថ្នាក់ទី៩L វិទ្យាល័យចំណេះទូទៅ និងបច្ចេកទេស ហ៊ុន សែន ជម្ពូវ័ន មានស្រុកកំណើតនៅភូមិកងតាណឹងទី៨ ឃុំកងតាណឹង ស្រុកកងមាស ខេត្តកំពង់ចាម ។ មានទីលំនៅបច្ចុប្បន្ននៅភូមិស្រែក្នុង សង្កាត់កន្ទោក ខណ្ឌកំបូល រាជធានីភ្នំពេញ ចំណែកឯបុរសជាជាងធ្វើវិហារវត្តជម្ពូវ័ននោះ មិនត្រូវបានស្គាល់ឈ្មោះនោះទេ គាត់រងរបួស្រាលប៉ុណ្ណោះ ។
បើតាមបុរសអ្នករត់ម៉ូតូកង់បីម្នាក់ដែលកំពុងអង្គុយចាំម៉ូយនៅមុខផ្សារជម្ពូវ័ននោះបាននិយាយថា នៅវេលាម៉ោងខាងលើគាត់បានឃើញក្មេងស្រីសិស្សសាលាជិះម៉ូតូ១គ្រឿងម៉ាកហុងដាស្កូបពីពណ៍ខ្មៅ ពាក់ស្លាកលេខភ្នំពេញ1HA-8717 ។ ធ្វើដំណើរក្នុងទិសដៅពីលិចទៅកើត ចំណែកជាងវិហារ បានជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៍ខ្មៅ ពាក់ស្លាកលេខកំពង់ស្ពឺ1K-1896 ធ្វើដំណើរឆ្លងផ្លូវ ក្នុងទិសដៅពីជើងទៅត្បូងចូលទៅកាន់វត្តជម្ពូវ័ន ។
បុរសនោះបាននិយាយបន្តទៀតថា ខណៈនោះភាគីទាំង២បានវាក់គ្នា ក៏ជ្រុលទៅបុកគ្នាពេញទំហឹង បណ្ដាលឲ្យដួលទៅលើថ្នល់ ហើយក្មេងស្រីសិស្សសាលានោះបានរងរបួសធ្ងន់ធ្ងរ ចំណែកឯបុរសដែលជិះម៉ូតូឆ្លងផ្លូវអត់មើលឆ្វេងស្ដាំបង្កឲ្យមានគ្រោះថ្នាក់នោះ រងរបួសស្រាលប៉ុណ្ណោះ ។ ក្រោយពេលកើតហេតុ កម្លាំងនគរបាលប៉ុស្តិ៍ចោមចៅទី៣ បានចុះទៅកាន់ទីនោះ រួចបញ្ជូនក្មេងស្រីរងគ្រោះទៅសង្គ្រោះនៅមន្ទីរពេទ្យកុមារជាតិ បន្ទាប់មកបាននាំយកម៉ូតូទាំង២គ្រឿងទៅរក្សាទុករង់ចាំការដោះស្រាយគ្នានៅពេលក្រោយ ៕
ចែករំលែកព័តមាននេះ