បើកពិព័រណ៍ផលិតផលក្នុងស្រុក «ភូមិមួយផលិតផលមួយ» នៅមាត់បឹងតាកែវ ដើម្បីជំរុញសេដ្ឋកិច្ចសហគមន៍
- តាកែវ
ខេត្តតាកែវ ៖ នៅល្ងាចថ្ងៃចន្ទ ទី២៥ ខែឧសភា ឆ្នាំ២០២៦នេះ លោក ផល សុជាតិ អគ្គលេខាធិការគណៈកម្មការធិការជាតិជំរុញចលនាភូមិមួយផលិតផលមួយ និងលោក ស៊ុត ខុន អភិបាលខេត្តស្តីទី នៃគណៈអភិបាលខេត្តតាកែវ បានអញ្ជើញចូលរួមជាអធិបតីក្នុងពិធីបើក និងអបអរ សាទរពិព័រណ៍ផលិតផលក្នុងស្រុក «ភូមិមួយផលិត ផលមួយ» ខេត្តតាកែវ ដែលព្រឹត្តិការណ៍នេះប្រារព្ធឡើងនៅបរិវេណមាត់បឹងតាកែវ ក្រុងដូនកែវ។
លោក ស៊ុត ខុន អភិបាល ខេត្តស្តីទី បានសម្តែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់គណៈ កម្មាធិការចលនាភូមិមួយផលិត ផលមួយ ក៏ដូចជាមន្ទីរ-អង្គភាពពាក់ព័ន្ធ និងសិប្បករទាំងអស់ថា ការរៀបចំពិព័រណ៍នាពេលនេះ មិនត្រឹមតែជាការបើកឱកាសទីផ្សារដ៏ធំទូលាយសម្រាប់ផលិតផលក្នុងស្រុក និងសិប្បកម្មប្រពៃណីរបស់ខេត្តតាកែវយើងប៉ុណ្ណោះទេ ប៉ុន្តែវាក៏ជាកាតាលីករយ៉ាងសំខាន់ក្នុងការជំរុញសេដ្ឋកិច្ចសហគមន៍ បង្កើតការងារ និងលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើងស្របតាមគោលនយោបាយរបស់រាជរដ្ឋាភិបាល ។
លោក ស៊ុត ខុន អភិបាលរងខេត្តក៏បានអំពាវនាវដល់បងប្អូនប្រជាពលរដ្ឋភ្ញៀវទេសចរជាតិ និងអន្តរជាតិទាំងអស់ សូមចូលរួមគាំទ្រ និងទិញផលិតផលខ្មែរឱ្យបានច្រើនកុះករ ដើម្បីជាការលើកទឹកចិត្តដល់ស្នាដៃកូនខ្មែរ និងរួមចំណែកពង្រឹងសេដ្ឋកិច្ចជាតិ។
សូមបញ្ជាក់ថា ពិព័រណ៍ផលិតផលក្នុងស្រុក «ភូមិមួយផលិតផលមួយ» នេះ មានការតាំងបង្ហាញនូវផលិតផលសក្តានុពលជាច្រើនរបស់ខេត្តតាកែវ ដូចជា សូត្រខ្មែរ ក្រមា បន្លែសុវត្ថិភាព ផលិតផលកែច្នៃ និងម្ហូបអាហារតំបន់ល្បីៗជាច្រើនមុខ ដែលឆ្លុះបញ្ចាំងពីភាពវៃឆ្លាត និងការច្នៃប្រឌិតរបស់ប្រជាសហគមន៍ក្នុងខេត្តតាកែវ ៕
ចែករំលែកព័តមាននេះ