ដងខ្លួនទេវរូបធ្វើពីថ្មភក់ ក្នុងរចនាបថបាភួន ត្រូវបានប្រគល់ជូនអាជ្ញាធរជាតិព្រះវិហារ ដើម្បីរក្សាទុកក្នុងសារមន្ទីរ
- ព្រះវិហារ
អាជ្ញាធរជាតិព្រះវិហារ ទទួលវត្ថុបុរាណចំនួន១ពីសហគមន៍ ភូមិកន្ទួត ឃុំកន្ទួត ស្រុកជាំក្សាន្ត ខេត្តព្រះវិហារ
ខេត្តព្រះវិហារ ៖ នាយកដ្ឋានស្រាវជ្រាវ បណ្ដុះបណ្ដាល និងតម្កល់ឯកសារ និងនាយកដ្ឋានសណ្ដាប់ធ្នាប់ និងសហប្រតិបត្តិការ បានដឹកនាំមន្ត្រីចុះទៅភូមិកន្ទួត ឃុំកន្ទួត ស្រុកជាំក្សាន្ត ខេត្តព្រះវិហារ ដើម្បីទទួលវត្ថុបុរាណចំនួន១ពីមេភូមិកន្ទួត នៅថ្ងៃទី២៥ ខែឧសភា ឆ្នាំ២០២៦នេះ ។ នេះបើយោងតាមផេក ក្រសួងវប្បធម៌ និងវិចិត្រសិល្ប: បានប្រកាសនារសៀលថ្ងៃទី២៦ ខែឧសភានេះ ។
អ្នកជំនាញអាជ្ញាធរជាតិព្រះវិហារអះអាងថា វត្ថុបុរាណនេះជា ដងខ្លួនទេវរូបធ្វើពីថ្មភក់ រចនាបថបាភួន សតវត្សទី១១ មានប្រភពពីភូមិកន្ទួត ។ ក្រោយទទួលបានវត្ថុនេះបាននាំយកមករក្សាទុក ការពារ និងសិក្សាស្រាវជ្រាវបន្តនៅសារមន្ទីរធម្មជាតិសកល សម្តេចតេជោ ហ៊ុន សែន ព្រះវិហារ ។
ក្នុងការចុះពិនិត្យទីតាំងផ្ទាល់ ស្ថិតនៅខាងត្បូងភូមិកន្ទួតប្រមាណ៣គីឡូម៉ែត្រ ក្រុមការងារបានសង្កេតឃើញទីតាំងនោះជាទួលបុរាណមានត្រពាំងបុរាណ សំណល់បំណែកកុលាលភាជន៍ប្រភេទផុយ និងប្រភេទរឹងមានស្រទាប់រលោង ។
ទោះជាយ៉ាងណា ទីតាំងនេះ បានរងការខូចខាត និងបាត់បង់ទ្រង់ទ្រាយដើមមួយចំនួន ដោយសារការភ្ជួរដីធ្វើចម្ការដំឡូងមី តាំងពីឆ្នាំ២០០២ ។
អាជ្ញាធរជាតិព្រះវិហារ សូមថ្លែងអំណរគុណចំពោះអាជ្ញាធរមូលដ្ឋាន និងប្រជាពលរដ្ឋ ដែលបានសហការប្រគល់វត្ថុបុរាណនេះ ដើម្បីចូលរួមថែរក្សា ការពារ សម្រាប់រក្សាទុកដល់កូនចៅជំនាន់ក្រោយ ៕
ចែករំលែកព័តមាននេះ