រាជធានីភ្នំពេញ ៖ ក្រសួងយុត្តិធម៌បញ្ចប់ការលក់ដេញថ្លៃម៉ូតូដែលរឹបអូសពីបទល្មើសជិត៥ពាន់គ្រឿងដោយមានការចូលរួមពីសាធារណៈជន រួមទាំងអង្គភាពប្រឆាំងអំពើពុករលួយ។ នេះបើតាមអ្នកនាំពាក្យក្រសួងយុត្តិធម៌។ ឯកឧត្តម សេង ឌីណា អ្នកនាំពាក្យក្រសួងយុត្តិធម៌បានប្រាប់កោះសន្តិភាពនៅរសៀល ថ្ងៃទី៣០…
រាជធានីភ្នំពេញ ៖ ក្រសួងយុត្តិធម៌បញ្ចប់ការលក់ដេញថ្លៃម៉ូតូដែលរឹបអូសពីបទល្មើសជិត៥ពាន់គ្រឿងដោយមានការចូលរួមពីសាធារណៈជន រួមទាំងអង្គភាពប្រឆាំងអំពើពុករលួយ។ នេះបើតាមអ្នកនាំពាក្យក្រសួងយុត្តិធម៌។
ឯកឧត្តម សេង ឌីណា អ្នកនាំពាក្យក្រសួងយុត្តិធម៌បានប្រាប់កោះសន្តិភាពនៅរសៀល ថ្ងៃទី៣០ មិថុនា ឆ្នាំ២០២៥យ៉ាងដូច្នេះថា៖«ការដេញថ្លៃនេះ ត្រូវបានធ្វើចប់សព្វគ្រប់អស់ហើយ ហើយគ្រប់ភាគីពាក់ព័ន្ធ ដែលចូលរួមក្នុងការដេញថ្លៃនេះក៏បានទទួលការជូនដំណឹង អំពីលទ្ធផលនៃការដេញថ្លៃនេះដែរ ។
ឯកឧត្តមអ្នកនាំពាក្យបានអះអាងថា ដំណើរការនៃការដេញថ្លៃនេះ ត្រូវបានធ្វើឡើង ប្រកបដោយតម្លាភាព ដោយមានការចូលរួមសង្កេតការណ៍ ពីសំណាក់អង្គភាពប្រឆាំងអំពើពុករលួយ ព្រមទាំងបានប្រកាសបើកចំហឱ្យអ្នកសារព័ត៌មានចូលយកព័ត៌មានផងដែរ។
សូមជម្រាបថា កាលពីប៉ុន្មានខែមកនេះ ក្រសួងយុត្តិធម៌ ប្រកាសលក់ម៉ូតូ ដែលរឹបអូសពីបទល្មើសជិត៥ពាន់គ្រឿងដោយសាធារណៈជនទាំងអស់ អាចចូលរួមដេញថ្លៃបានដោយសេរីតាមរយៈការដាក់ពាក្យស្នើសុំទៅក្រសួងយុត្តិធម៌ ។
បើតាមគណៈកម្មការគ្រប់គ្រង និងចាត់ចែងវត្ថុតាង (គ.គ.ច.វ.) ដែលត្រូវបានបង្កើតឡើងស្របតាមប្រកាស រួមលេខ១៩២ សហវ.ប្រក.អទច ចុះថ្ងៃទី០១ ខែមេសា ឆ្នាំ២០២៤ រវាងក្រសួងសេដ្ឋកិច្ច និងហិរញ្ញវត្ថុ និងក្រសួងយុត្តិធម៌ បានឱ្យដឹងថា គ.គ.ច.វ. នឹងធ្វើការដាក់ឱ្យដេញថ្លៃលក់ជាសាធារណៈនូវវត្ថុតាង/វត្ថុចាប់យកដែលជាសំណល់អេតចាយ រួមមានទោចក្រយានយន្តសរុបចំនួន ៤,៥៤៤គ្រឿង របស់សាលាដំបូងរាជធានីភ្នំពេញ និងសាលាដំបូងខេត្តព្រះសីហនុ ។
សាធារណជន អាចចូលរួមដេញថ្លៃបានដោយត្រូវបំពេញសំណុំបែបបទ និងលក្ខខណ្ឌដូច មានចែងក្នុងសៀវភៅបន្ទុកដេញថ្លៃ ។ សាលាដំបូងរាជធានីភ្នំពេញ មានការដាក់លក់ម៉ូតូ ចំនួនប្រមាណ៤,០៧៦គ្រឿង ដែលមានតម្លៃមូលដ្ឋានជាសរុប១២២,២៨០ ដុល្លារអាមេរិក ចំណែកឯសាលាដំបូងខេត្តព្រះសីហនុ មានចំនួនម៉ូតូប្រមាណ៤៦៨ គ្រឿង ដែលមានតម្លៃមូលដ្ឋាន១៤,០៤០ ដុល្លារអាមេរិក ចាប់ផ្តើមបើកលក់ និងទទួលពាក្យស្នើសុំចាប់ពី ថ្ងៃទី២១ ខែកុម្ភៈ ឆ្នាំ២០២៥ រហូតដល់ថ្ងៃទី២៨ ខែកុម្ភៈ ឆ្នាំ២០២៥៕
ចែករំលែកព័តមាននេះ