សហរដ្ឋអាមេរិក ៖ ប្រធានាធិបតី​អា​មេ​រិ​ក លោក ដូ​ណា​ល់ ត្រាំ (Donald Trump) បាន​បង្ហើប​ប្រាប់​នៅ​ក្នុង​បទ​សម្ភាសន៍​ជាមួយ​ទូរទស្សន៍ Fox News ដែល​ចាក់​ផ្សាយ​កាលពី​ថ្ងៃអាទិត្យ​ស​ប្តា​ហ៍​មុន​ថា លោក​រកបាន​ហើយ​អ្នកទិញ​យក​កម្មវិធី TikTok ដែល​លោក​បាន​ពណ៌នា​ថា​គឺជា​ក្រុម​អ្នកមាន​លុយ​ចាយ​មិន​អស់ ហើយ​អត្តសញ្ញាណ​ពួក​គេ​លោក​នឹង​បង្ហាញ​ក្នុង​រយៈពេល​ប្រហែល​ពី​រស​ប្តា​ហ៍​ទៀត​។

លោក ត្រាំ បាន​ធ្វើការ​កត់សម្គាល់​ក្នុង​បទ​សម្ភាសន៍​មួយ​លើ​កម្មវិធី «Sunday Morning Futures with Maria Bartiromo» របស់​ទូរទស្សន៍ Fox News ដោយ​លោក​អះអាង​ថា កិច្ចព្រមព្រៀង​ដែល​លោក​កំពុង​បង្កើត ប្រហែលជា​ត្រូវការ​ការ​យល់ព្រម​ពី​ចិន ដើម្បី​បន្ត​ឈាន​ទៅ​មុខ​ទៀត ហើយ​លោក​ព្យាករណ៍​ថា ប្រធានាធិបតី​ចិន លោក ស៊ី ជិន​ភីង (Xi Jinping) ទំនងជា​នឹង​យល់ព្រម​។

ប្រ​ធានា​ធិ​ប​តិ​អា​មេ​រិ​ក​ទី​៤៧ វ័យ​៧៩​ឆ្នាំ​រូប​នេះ កាលពី​ដើមខែ​នេះ បាន​បន្ត​ពន្យារពេល ដល់​ថ្ងៃ​ទី​១៧ ខែកញ្ញា ឆ្នាំ​២០២៥ គឺជា​ថ្ងៃ​ផុតកំណត់​សម្រាប់​ក្រុមហ៊ុនមេ ByteDance ដែល​មាន​មូលដ្ឋាន​ក្នុង​ប្រទេស​ចិន ដើម្បី​យល់ព្រម​លក់​ប្រតិបត្តិការ​កម្មវិធី TikTok មក​ឱ្យ​អា​មេ​រិ​ក ឬ​ប្រឈម​នឹង​ការ​បិទ​នៅ​ទូ​ទាំង​សហរដ្ឋអាមេរិក​តែ​ម្តង​។

កិច្ចព្រមព្រៀង​មួយ​ត្រូវ​បាន​បង្កើត​កើតឡើង ដែល​នឹង​ធ្វើ​ឱ្យ​ប្រតិបត្តិការ​កម្មវិធី TikTok ស្ថិត​នៅ​ក្រោម​ការ​គ្រប់គ្រង​របស់​ក្រុមហ៊ុន​ថ្មី ដែល​មាន​មូលដ្ឋាន​នៅ​សហរដ្ឋអាមេរិក ភាគច្រើន​គ្រប់គ្រង និង​ដំណើរការ​ដោយ​វិនិយោគិន​ជនជាតិ​អា​មេ​រិ​ក ប៉ុន្តែ​កិច្ចព្រមព្រៀង​នេះ​ត្រូវ​បាន​ផ្អាក​ទៅ​វិញ បន្ទាប់​ពី​ប្រទេស​ចិន​បាន​បង្ហាញ​ថា ខ្លួន​នឹង​មិន​យល់ព្រម​លក់​ជា​ដាច់ខាត បើ​ទោះបីជា​លោក ត្រាំ បាន​ប្រកាស​ដាក់​ពន្ធ​ដ៏​ច្រើន​លើ​ទំនិញ​ចិន​របស់​ក៏​ដោយ​។

យ៉ាងណាមិញ នៅ​ក្នុង​បទ​សម្ភាសន៍​ជាមួយ Fox News កាលពី​ពេល​ថ្មី​ៗ​នេះ លោក ត្រាំ បាន​ថ្លែង​ថា «​យើង​មាន​អ្នកទិញ TikTok​។ ខ្ញុំ​គិត​ថា​ខ្ញុំ​ប្រហែលជា​ត្រូវការ​ការ​យល់ព្រម​ពី​ប្រទេស​ចិន​។ ខ្ញុំ​គិត​ថា​លោក​ប្រធានាធិបតី ស៊ី ប្រហែលជា​យល់ព្រម​»​។

ច្បាប់​របស់​សហរដ្ឋអាមេរិក កាលពី​ឆ្នាំ​២០២៤ តម្រូវ​ឱ្យ TikTok បញ្ឈប់​ប្រតិបត្តិការ​លើ​ទឹកដី​អា​មេ​រិ​ក​ត្រឹម​ថ្ងៃ​ទី​១៩ ខែមករា ឆ្នាំ​២០២៥ លុះត្រាតែ​ក្រុមហ៊ុនមេ ByteDance លក់​កម្មវិធី​នេះ​មក​ឱ្យ​អា​មេ​រិ​ក​។ ទោះ​យ៉ាងណា​ក៏​ដោយ ឱសានវាទ​នេះ ត្រូវ​បាន​ពន្យារពេល​រហូត​ដល់​៣​ដង​ពី​លោក ត្រាំ​៕ ប្រភព ៖ Reuters