ខេត្តកំពង់ស្ពឺ៖ ដីព្រៃនៅជើងភ្នំសេះសរ ឬហៅថាភ្នំ អញ្ញាសេះ ស្ថិតនៅក្នុងភូមិអូរនាងហ៊ីង ឃុំតាំងក្រូច ស្រុកសំរោងទង ត្រូវបានក្រុមជនខិលខូចយករណាយន្ត(ត្រង់តឺន័រ)កាត់ដើមឈើ និង ជីក…
ខេត្តកំពង់ស្ពឺ៖ ដីព្រៃនៅជើងភ្នំសេះសរ ឬហៅថាភ្នំ អញ្ញាសេះ ស្ថិតនៅក្នុងភូមិអូរនាងហ៊ីង ឃុំតាំងក្រូច ស្រុកសំរោងទង ត្រូវបានក្រុមជនខិលខូចយករណាយន្ត(ត្រង់តឺន័រ)កាត់ដើមឈើ និង ជីក បោះបង្គោលរបង ហ៊ុមព័ទ្ធយកធ្វើជាកម្មសិទ្ធិផ្ទាល់ខ្លួន តើអស់លោកណាខ្លះនៅពីក្រោយខ្នងក្នុងរុករានទន្ទ្រានយកដីជើងភ្នំនេះ មិនអត់ទេ…ព្រោះសុទ្ធតែផលប្រយោជន៍ ។
បើតាមការលើកឡើងរបស់អ្នកជីកដីដើម្បីបោះបង្គោលរបងដែលអ្នកមានលុយជួលមកជីកនោះ និយាយថា ការឈួសឆាយជីករបង បោះបង្គោល ហ៊ុមព័ទ្ធដីជើងភ្នំនេះ ជាងមួយខែកន្លងទៅហើយ គឺគេបែងចែកគ្នាខ្លះក្បាល១០ម៉ែត្រជម្រៅទល់ភ្នំ អ្នកខ្លះបានក្បាល១៥ម៉ែត្រ អ្នកខ្លះទៀតក្បាល២០ម៉ែត្រ ទល់ជើងភ្នំតែម្តង លោកត្រឹមជាអ្នកស៊ីឈ្នួលគេ មិនអាចដឹងរឿងច្រើននោះទេ។
បើតាមប្រភពព័ត៌មានបានបង្ហើបឱ្យដឹងថា ការបែងចែក កាប់ឆ្ការ ឈួសឆាយ រុករានទន្ទ្រានយកដីជើងភ្នំអញ្ញាសេះ (ឬហៅថា ភ្នំសេះសរ) នេះគឺការបើកភ្លើងខៀវពីលោកមេភូមិ អនុភូមិអូរនាងហ៊ីង ។ ដែលអះអាងថាជាដីរួមភូមិ(ដីសហគមន៍) មានទំហំជាង៣ហិកតា។ ការបែងចែកដីជើងភ្នំដែលជារបស់រដ្ឋគ្រប់គ្រងនេះ ចែកឱ្យប្រជាពលរដ្ឋ និងអ្នកមានលុយមានអំណាចមួយចំនួននៅក្នុងឃុំតាំងក្រូច ស្រុកសំរោងទង ខេត្តកំពង់ស្ពឺ។
ប្រភពព័ត៌មានបានបន្តថា ការដែលលោកមេភូមិ លោកអនុប្រធានភូមិហ៊ានបែងចែកដីជើងភ្នំនេះ គឺសំអាងថាជាដីសហគមន៍ (ដីរួមភូមិអូរនាងហ៊ីង) ហើយមួយទៀត អាងមានខ្នងបង្អែកជាមន្ត្រី សុរិយោដីម្នាក់ដែលធ្វើការងារ នៅក្នុងមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តកំពង់ស្ពឺ និងម្នាក់ទៀតជាចាងហ្វាងគេហទំព័រមិនសូវល្បីឈ្មោះមួយរូប កំពុងក្លាយជាឈ្មួញដែលមានដី និងជួលឱ្យគេកាប់ដើមឈើ និងធ្វើរបងរួចរាល់ហើយដែរ។
ប្រជាពលរដ្ឋ និងអ្នកដឹងរឿង បាននិយាយថា បើបណ្តែតបណ្តោយតទៅទៀតច្បាស់ណាស់ ដីជើងភ្នំរបស់រដ្ឋ ក្លាយទៅជាកម្មសិទ្ធឯកជន ជាក់ជាមិនខានឡើយ។
ពាក់ព័ន្ធនិងការលើកឡើងខាងលើនេះ អ្នកយកព័ត៌មានយើងបានទៅជួបលោក សៅ សំបូរ មេឃុំតាំងក្រូច នៃស្រុកសំរោងទង លោកបានលើកឡើងថា លោកមិនបានដឹងថា មានការកាប់ ឆ្ការ ឈួសឆាយ រុករានទន្ទ្រានដីព្រៃរបស់រដ្ឋយកធ្វើកម្មសិទ្ធិផ្ទាល់ខ្លួននោះទេ។ ហើយក៏មិនបានដឹងថា លោកមេភូមិ លោកអនុប្រធានភូមិបែងចែកដីឱ្យប្រជាពលរដ្ឋជាង១០០គ្រួសារនោះដែរ។ ជាមួយគ្នានេះដែរ ភូមិអូរនាងហ៊ីងនេះ មិនទាន់មានឈ្មោះនៅក្នុងបញ្ជីរបស់ក្រសួងមហាផ្ទៃនៅឡើយទេ។
ជុំវិញការលើកឡើងខាងលើនេះដែរ អ្នកយកព័ត៌មានយើង បានទូរស័ព្ទទៅ លោកមេភូមិអូរនាងហ៊ីង និងលោក អនុប្រធានភូមិអូរនាងហ៊ីង ដើម្បីសួរនាំ ប៉ុន្តែតេចូលជាច្រើនលើក មិនមានអ្នកលើកទទួលនោះទេ ។
ចាំមើលទៀត តើបុរសណាខ្លះដែលនៅកាពារពីក្រោយខ្នង?
តើអាជ្ញាធរខេត្តកំពង់ស្ពឺហ៊ានទប់ស្កាត់ ក្រុមខិលខូចខាងលើនេះបានក្នុងកម្រិតណា?
ព័ត៌មានបន្ថែមនឹងមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ